Għeżież ħuti il-jum it-tajjeb u ll-festa t-tajba!
Fiċ-ċelebrazzjoni tal-lum, festa tal-Qaddisin Kollha, inħossu partikolarment ħajja fina r-realtà tal-komunjoni tal-qaddisin, il-familja kbira tagħna, iffurmata mill-membri kollha tal-Knisja, kemm aħna li għadna pellegrini hawn fl-art, kif ukoll dawk – f’għadd immensament akbar – li diġà ħallewha u marru s-Sema. Ilkoll magħqudin, u din tissejjaħ “il-komunjoni tal-qaddisin”, jiġifieri l-komunità ta’ kull min hu mgħammed.
Fil-liturġija, l-Ktieb tal-Apokalissi jiddeskrivi karatteristika essenzjali tal-qaddisin u jgħid hekk: huma bnedmin kollha kemm huma ta’ Alla. Jippreżenathom bħala għadd bla qies ta’ “magħżulin”, lebsin l-abjad u mmarkati bis-siġill ta’ Alla (cfr 7,2-4. 9-14). Permezz ta’ dan id-dettal, b’lingwaġġ allegoriku, jintwera lilna li l-qaddisin huma ta’ Alla b’mod sħiħ u esklussiv, huma propjetà tiegħu. U xi jfisser li f’ħajtek u fil-persuna tiegħek ikollok is-siġilll ta’ Alla? Jgħidulna mill-ġdid l-Appostlu Ġwanni: ifisser li f’Ġesù Kristu aħna sirna verament ulied Alla (cfr 1 Ġw 3, 1-3).
Aħna konxji minn dan ir-rigal kbir? Ilkoll aħna ulied Alla! Niftakru li fil-Magħmudija rċevejna “s-siġill” tal-Missier Ċelesti tagħna u sirna wliedu? Biex ngħiduha bi kliem sempliċi: aħna nġibu l-kunjom ta’ Alla, kunjomna hu Alla, għax aħna wliedu. Din hi l-vokazzjoni għall-qdusija! U l-qaddisin li qed infakkru llum huma propju dawk li għexu fil-grazzzja tal-Magħmudija tagħhom u żammew sħiħ “is-siġill” billi ġabu ruħhom ta’ ulied Alla, ippruvaw jixbħu lil Ġesù; u issa waslu fid-destinazzjoni tagħhom “qed jaraw ‘l Alla kif inhu”.
It-tieni karatteristika tipika tal-qaddisin hi li huma eżempji li għandna nimitawhom. Noqgħodu attenti: mhux biss dawk li huma kanoniżżati, imma l-qaddisin, biex ngħidu hekk, “tad-dar ta’ ħdejna”, li bil-grazzja t’Alla għamlu ħilithom kollha biex jipprattikaw l-Evanġelju fil-ħajja ordinarja ta’ kuljum. Anki aħna ltqajna ma’ wħud minn dawn il-qaddisin: forsi kellna xi ħadd minnhom fil-familja tagħna jew fost ħbiebna jew fost in-nies li nafu. Għandna nkunu grati lejhom, u, fuq kollox, għandna nkunu grati lejn Alla li rregalaholmlna, li qiegħdhom qrib tagħna bħala eżempji ħajjin li minnhom “nittieħdu” l-mod ta’ kif ngħixu u mmutu fidili lejn il-Mulej Ġesù u l-Evanġelju tiegħu. Kemm konna nafu u kemm nafu nies tajbin, u ngħidu: “Imma dal-bniedem qaddis!”, ngħiduha b’mod spontanju. Dawn huma l-qaddisn “tad-dar ta’ ħdejna”, dawk mhux kanoniżżati imma jgħixu magħna.
Meta nimitaw il-ġesti ta’ mħabba u ta’ ħniena tagħhom inkunu qiesna qed inżommu ħajja l-preżenza tagħhom f’din id-dinja. Fil-fatt, dawn il-ġesti evanġeliċi huma l-uniċi li jirreżistu l-qerda li tnissel il-mewt: att ta’ tenerezza, għajnuna ġeneruża, ftit ħin nisimgħu, żjara, kelma tajba, tbissima.... F’għajnejna dawn jistgħi jidhru affarijiet mingġġajr tifsira, imma f’għajnejn Alla huma eterni, għax l-imħabba u l-kompassjoni huma ajtar qawwija mill-mewt.
Il-Verġni Marija, Reġina tal-Qaddisin Kollha, tgħinna niksbu aktar fiduċja fil-grazzja t’Alla biex nimxu b’ħerqa kbira fil-ħajja tal-qdusija. Inħallu f’idejn OmmnaMarija il-ħidma tagħna ta’ kuljum u nitolbuha wkoll għall-għeżież mejtin tagħna, b’tama minn qalbna li jum wieħed, niltaqgħu flimkien, ilkoll, fil-komunjoni glorjuża tas-Sema.
APPELL
Għeżież ħuti,
l-episodji ta’ niket li dawn l-aħħar jien ħarrxu s-sitwazzjoni delikata fir-Repubbika tal-Afrika tan-Nofs, iqanqluli f’qalbi tħassib kbir. Nappella lill-partijiet kollha konċernati biex iwaqqfu dan iċ-ċiklu ta’ vjolenza. Inħossni spiritwalment qrib il-patrijiet Kombonjani tal-parroċċa tal-Madonna ta’ Fatima f’Bangui, li qed jagħtu kenn lil ħafna maħruba. Nesprimi s-solidarjetà tiegħi mal-Knisja u mal-konfessjonijiet reliġjużi l-oħrajn u man-nazzjon kollu tar-Repubbika tal-Afrika tan-Nofs, li qed isofri bla qies, biex isir kull sforz ħalli jintgħelbu l-firdiet u jerġgħu jaqbdu t-triq tal-paċi. Biex nuri l-qrubija bit-talb tal-Knisja kollha lil dan in-nazzjon hekk imnikket u tturmentat u biex inħeġġeġ lill-popolazzjoni kollha ta’ dan il-pajjiż biex ikunu dejjem xhieda tal-ħniena u r-rikonċiljazzjoni, għandi f’moħħi lil-Ħadd 29 ta’ Novembru niftaħ il-“Porta Santa” fil-katidral ta’ Bangui, waqt il-Vjaġġ Appostoliku li nittama li nkunu nista’ nagħmel f’dak in-nazzjon.
Wara l-Angelus:
Għeżież ħuti,
Ilbieraħ fi Frascati ġiet dikjarata beata Madre Tereża Casini, fundatriċi tas-Sorijiet Oblati tal-Qalb ta’ Ġesù. Kienet mara ta’ kontemplazzjoni u missjunarja li ħajitha għamlitha offerta ta’ talb u karità konkreta u sapport għas-saċerdoti. Niżżu ħajr lil Alla għax-xhieda tagħha.
Insellem lilkom ilkoll, pellegrini li ġejjin mill-Italja u minn tant pajjiżi oħra, partikolarment li dawk li ġew mill-Malasja u minn Valencia (Spanja).
Insellem lill-parteċipanti li qed jieħdu sehem fil-Corsa dei Santi u Marcia dei Santi, li huma organiżżati rispettivament mill-Fundazzjoni “Don Bosco nel Mondo” u mill-Assoċjazzjoni “Famiglia Piccola Chiesa”. Napprezza dawn il-manifestazzjonijiet li joffru dimensjoni ta’ festa popolari fiċ-ċelebrazzjoni tal-Qaddisin Kollha. Insellem ukoll lill Kor ta’ San Cataldo, liż-żgħażagħ minn Ruvo di Puglia u li dawk li ġejjin minn Papanice.
Illum wara nofsinhar se mmur fiċ-ċimiterju tal-Verano, fejn se niċċelebra l-quddiesa b’suffraġju għall-mejtin. Jien u nżur iċ-ċimiterju prinċipali ta’ Ruma, ningħaqad spiritwalment ma’ dawk kollha li f’dawn il-jiem imorru jitolbu fuq l-oqbra tal-għeżież tagħhom f’kull rokna tad-dinja.
Nawgura lil kulħadd paċi u serenità fil-kumpanija spiritwali tal-qaddisin. Il-Ħadd it-tajjeb u, jekk jogħġobkom, tinsewx titolbu għalija. L-ikla t-tajba u arrivederci!
Miġjub għall-Malti mit-Taljan minn Joe Huber