MA’
PIETRU U PAWLU WARA L-IMGĦALLEM
Mixja ta’ talb bi tħejjija għall-Ġublew tas-saċerdoti
Daħla
Ħadd ma jista’ jeħlisha t-tentazzjoni li nibqgħu mwaħħlin fl-attiviżmu frenetiku tas-soċjetà li ngħixu fiha, li tidher li trid tittrasforma lill-bniedem f’ xi ħadd dejjem jiġri wara l-ħin, iktar milli ‘pellegrin fl-istorja’, l-anqas aħna s-saċerdoti. Maħkumin mill-elf ħaġa li ‘trid issir’ nirriskjaw li ninsew min aħna: jiġifieri, dixxipli mexjin wara l-Imgħallem, xhieda tat-tama li ma tiddiżappuntax. Irġiel magħżula u msejħin biex ikunu miegħu, biex jintbagħtu fid-dinja biex iwasslu l-aħbar it-tajba tal-Vanġelu (ara Mk 3, 13-16); irġiel magħżula minn fost il-bnedmin u maħtura, minħabba l-bnedmin, biex jieħdu ħsieb l-affarijiet li għandhom x’jaqsmu ma’ Alla (ara Lhud 5:1).
Il-mixja proposta hawnhekk lejn iċ-ċelebrazzjoni tal-Ġublew saċerdotali tagħna – fl-okkażjoni tas-Solennità tal-Qalb ta’ Ġesù f’Ġunju 2025 – hija opportunità biex nerġgħu lura lejn il-prinċipju u l-pedament ta’ dak li aħna għall-Mulej u, flimkien miegħu, għall-poplu kollu ta’ Alla.
Hija mixja ta’ ċelebrazzjoni magħmula minn erba’ ‘mumenti’ fil-mixja tagħna wara l-Imgħallem, billi nieħdu bħala eżempju l-appostli Pietru u Pawlu. Fuq l-eżempju ta’ dawn l-irġiel straordinarji li nsejħulhom bħala l-“kolonni tal-Knisja”, u fid-dawl tal-maġisteru, se ngħixu mill-ġdid is-sejħa tagħna, il-professjoni tagħna tal-fidi, il-provi li għaddejna minnhom u l-ħajja ta’ xhieda li huma komuni għal kull bniedem imsejjaħ għall-ministeru saċerdotali.
Dan il-materjal huwa għodda għas-servizz tas-saċerdoti djoċesani, li jistgħu jiltaqgħu mal-isqof tagħhom għal ċelebrazzjonijiet komunitarji – hawnhekk qed nipproponu materjal ta’ rilevanza universali – iżda jista’ wkoll jintuża minn saċerdoti individwali għal mumenti ta’ riflessjoni u talb personali. Bħall-għajnuniet kollha, dan il-materjal jista’ jiġi emendat u rranġat skont il-ħtiġijiet ta’ kull komunità lokali.
Bit-tama li hawnhekk issibu għajnuna konkreta għal kull saċerdot, ejjew nimxu flimkien lejn iċ-ċelebrazzjoni tal-Ġublew meta nġeddu l-wegħdiet saċerdotali tagħna, ċerti li ġejna magħżulin “sabiex inkunu għat-tifħir tal-glorja tiegħu, aħna li sa mill-bidu konna nittamaw fi Kristu (Ef 1:12).”
1.
IS-SEJĦA
Kant
Daħla
Fl-isem tal-Missier u tal-Iben u tal-Ispirtu s-Santu.
Ammen
Is-sliem, l-imħabba u l-fidi mingħand Alla l-Missier u l-Mulej Ġesù Kristu jkunu magħkom ilkoll.
U
miegħek ukoll
Ejjew niftħu qalbna għat-tama li ma tqarraqx bina.
Missier li inti fis-smewwiet,
il-fidi li inti tajtna
f’Ibnek Ġesù Kristu, ħuna,
u l-fjamma tal-imħabba
imkebbsa fi qlubna mill-Ispirtu s-Santu,
jerġgħu jqajmu fina t-tama ħienja
tal-miġja tas-Saltna tiegħek.
Jalla l-grazzja tiegħek tibdilna
f’ħaddiema bieżlin li jiżirgħu ż-żerriegħa tal-Evanġelju.
Jalla din iż-żerriegħa tkun il-ħmira li tibdel minn ġewwa lill-umanità u lill-univers,
fl-istennija ħienja ta’ smewwiet ġodda u art ġdida,
meta tidher il-glorja tiegħek għal dejjem,
wara li jkunu megħluba s-setgħat tal-Ħażen.
Jalla l-grazzja ta’ dan il-Ġublew
tagħmel minna Pellegrini tat-Tama,
imxennqin għall-ġid tas-sema.
Jalla din il-grazzja xxerred fuq id-dinja kollha
il-ferħ u s-sliem tal-Feddej tagħna.
Lilek O Alla, int l-Imbierek għal dejjem,
tifħir u glorja għal dejjem.
Ammen.
Għeżież ħuti,
F’din is-sena ta’ tħejjija għall-ġublew tas-saċerdoti, ejjew nimxu aħna wkoll bħala pellegrini tat-tama, permezz tat-talb, fuq l-eżempju u l-passi tal-qaddisin appostli Pietru u Pawlu.
Ejjew nerġgħu lura għall-għeruq tas-sejħa tagħna, inġeddu r-rabta tagħna mal-Mulej, nitolbu maħfra għad-dgħufijiet kollha tagħna fil-mument tal-prova, sabiex b’ħeġġa mġedda inkunu nistgħu nagħtu xhieda ta’ l-Imgħallem u l-Mulej tagħna, li huwa t-tama waħdanija tad-dinja. Fil-fraternità saċerdotali, ejjew flimkien nitolbu maħfra, ngħinu lil xulxin fl-infedeltajiet żgħar u kbar tagħna lejn l-imħabba ta’ Alla u tal-proxxmu.
Ħin
ta’ skiet
Mulej, inti li ħfrit lil Pietru li nidem, ikollok ħniena minna.
Kyrie eleison
Kristu, li minn Pawlu għamilt strument magħżul, ikollok ħniena minna.
Christe eleison
Mulej, li għamilt lill-appostli Pietru u Pawlu bħala kolonni tal-fidi, ikollok ħniena minna.
Kyrie eleison
Alla li jista’ Kollox, iħenn għalina, jaħfrilna dnubietna u jwassalna fil-ħajja ta’ dejjem.
Ammen
Nitolbu. Kolletta
Missier qaddis, li mingħajr ebda merti tagħna, sejjaħtilna għall-komunjoni mas-saċerdozju etern ta’ Kristu Ibnek u għas-servizz tal-Knisja kollha, agħtina li nkunu xandâra mansweti u u kuraġġużi tal-Vanġelu u li nwasslu l-misteri tiegħek b’fedeltà. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen
Qari mill-Ktieb ta’ l-Atti
tal-Appostli (22,6-16)
“Kif kont sejjer, meta wasalt
qrib Damasku, f’daqqa waħda għall-ħabta ta’ nofsinhar dawl kbir
mis-sema idda madwari. Waqajt mal-art, u smajt leħen jgħidli,
‘Sawl, Sawl, għaliex qiegħed tippersegwitani?’ Jien weġibt,
‘Min int, Mulej?’ U hu qalli, ‘Jien Ġesù ta’ Nazaret, li int qiegħed
tippersegwitah.’ Dawk li kienu miegħi raw id-dawl, imma ma
semgħux il-leħen ta’ min kien ikellimni. Imbagħad jien
għedt, ‘X’għandi nagħmel, Mulej?’ U l-Mulej qalli, ‘Qum u mur
Damasku. Hemm jgħidulek kulma għandek tagħmel.’ Billi ma
stajtx nara minħabba d-dija ta’ dak id-dawl, mexxewni minn idi dawk li
kienu miegħi, u hekk wasalt Damasku.
“Hemmhekk kien hemm
wieħed, jismu Ħananija, raġel sewwa skont il-Liġi, li kellu
fama tajba mal-Lhud li kienu joqogħdu hemm; ġie għandi,
resaq fuqi u qalli, ‘Sawl, ħija, ħu d-dawl.’ Dak il-ħin stess bdejt
nara u nħares lejh. Imbagħad hu qalli, ‘Alla ta’ missirijietna
għażlek biex tagħraf ir-rieda tiegħu, tara lil dak li hu
l-Ġust u tisimgħu jkellmek b’fommu stess. Għax int
għad trid tixhed għalih quddiem il-bnedmin kollha fuq dak li rajt u
smajt. U issa x’int tistenna? Qum! Tgħammed u nħall minn
dnubietek, int u ssejjaħ ismu.’
Il-Kelma tal-Mulej.
Irroddu ħajr lil Alla.
Salm Responsorjali Salm 138(139)
Inwieġbu flimkien: Mulej, int tgħarbilni u tagħrafni.
Mulej, int tgħarbilni u tagħrafni;
int taf meta noqgħod u meta nqum,
int tagħraf mill-bogħod ħsibijieti.
Int tagħraf il-mixi u l-waqfien tiegħi;
triqati kollha inti tafhom sewwa.
R/.
L-għerf tiegħek tal-għaġeb, ma nwassalx għalih;
għoli wisq, u ma nlaħħaqx miegħu.
Fejn immur ’il bogħod mill-ispirtu tiegħek?
Jew fejn nista’ naħrab minn quddiem wiċċek?
Jekk nitla’ fis-smewwiet, hemm int;
jekk nimtedd f’qiegħ l-art, int hemm ukoll. R/.
Jekk nilbes il-ġwienaħ tas-sebħ,
u mmur ngħammar fi truf il-baħar,
hemm ukoll tilħaqni idek,
u taqbadni l-leminija tiegħek. R/.
Għax int sawwart il-ġewwieni tiegħi,
u f’ġuf ommi inti nsiġtni.
Irroddlok ħajr, għax b’mod tal-għaġeb għamiltni:
tal-għaġeb huma l-għemejjel tiegħek.
U ’l ruħi inti tafha tajjeb. R/.
Ma kienx moħbi għadmi minnek,
meta kont qiegħed insir fis-satra
u nintiseġ fil-qigħan tal-art.
Raw għajnejk l-għemejjel tiegħi:
kollha nkitbu fil-ktieb tiegħek;
u jiemi kienu ġa magħduda
meta ebda wieħed ma kien għad hemm. R/.
Kemm huma tqal ħsibijietek għalija, o Alla!
Kemm hu bla tarf l-għadd tagħhom!
Li kelli ngħoddhom, huma aktar mir-ramel;
xħin nasal fl-aħħar, inkun għadni fil-bidu
miegħek. R/.
Għarbilni, o Alla, u agħraf qalbi;
iflini, u kun af ħsibijieti.
Ara iniex miexi fi triq ħażina,
u mexxini fit-triq ta’ dejjem. R/.
Kant għall-Evanġelju
Hallelujah, hallelujah
Tibżax, minn issa ‘l quddiem tkun taqbad in-nies.
Hallelujah
Qari mill-Evanġelju skont San Luqa (5, 1-11)
Darba l-kotra bdiet tross fuqu biex
tisma’ l-kelma ta’ Alla. Hu kien qiegħed f’xatt l-għadira ta’
Ġennesaret. U ra żewġ dgħajjes qegħdin max-xatt; is-sajjieda
kienu niżlu minn fuqhom u kienu qegħdin jaħslu x-xbiek. Tela’
fuq waħda minnhom, li kienet ta’ Xmun, u talbu jaqla’ kemmxejn ’il barra
mill-art; imbagħad qagħad bilqiegħda u beda jgħallem
lin-nies mid-dgħajsa. Meta temm li kellu jgħid, qal lil Xmun: “Aqdef
’il barra fil-fond, u kalaw ix-xbiek tagħkom għas-sajd.” Wieġbu
Xmun u qallu: “Mgħallem, għamilna lejl sħiħ nitħabtu u
ma qbadna xejn. Imma, la qiegħed tgħid int, ħa nkala x-xbiek.”
Hekk għamlu, u qabdu kotra hekk kbira ta’ ħut li x-xbiek tagħhom
kien għoddu nqasam. Għalhekk għamlu sinjal lil sħabhom li
kienu fid-dgħajsa l-oħra biex jiġu jgħinuhom. Dawk
ġew, u mlew iż-żewġ dgħajjes hekk li għal ftit ma
għerqux.
Xmun Pietru, kif ra dan, inxteħet
f’riġlejn Ġesù u qallu: “Tbiegħed minni, Mulej, għaliex
jiena raġel midneb!” Għax baqgħu tassew mistagħġba,
kemm hu u kemm dawk kollha li kienu miegħu, għal dik il-qabda
ħut li qabdu. U hekk ukoll ġralhom Ġakbu u Ġwanni, ulied
Żebedew, li kienu sħab Xmun. Imbagħad Ġesù qal lil Xmun:
“Tibżax; minn issa ’l quddiem tkun taqbad in-nies.” Meta mbagħad
ressqu d-dgħajjes mal-art, telqu kollox u marru warajh.
Il-Kelma tal-Mulej
Tifħir lilek, Kristu
Ħin
ta’ skiet
Talba korali
O Ġesù, Ragħaj Divin,
li sejjaħt lill-Appostli
biex tagħmel minnhom sajjieda
tal-bnedmin,
Iġbed lejk il-qlub mixgħula u
ġenerużi tagħna,
biex tagħmel minna dixxipli u
ministri tiegħek.
Int, o Mulej,
dejjem ħaj biex tidħol
għalina,
iftaħ għalina x-xefaq tad-dinja
kollha,
fejn l-għajta siekta u mimlija
wġigħ ta’ tant aħwa
Qegħda titlob id-dawl tal-Fidi u
l-barka tat-Tama.
Filwaqt li nwieġbu
għas-sejħa tiegħek,
Għamel minna l-melħ tal-art u
d-dawl tad-dinja,
biex inħabbru l-ħajja
sabiħa tal-Evanġelu.
Ifrex, Mulej, is-sejħa ta’
mħabba tiegħek
fuq ħafna qlub disponibbli u
ġenerużi;
nissel f’kulħadd ix-xewqa ta’
perfezzjoni evanġelika
u ta’ dedikazzjoni għas-servizz
tal-Knisja u ta’ ħutna.
Ammen
Meħuda
mill-ewwel messaġġ għall-ewwel jum dinji tal-Vokazzjonijiet,
San
Pawlu VI, 1964
Mill-Eżortazzjoni Appostolika Pastores Dabo Vobis ta’ San Ġwanni Pawlu II
“Ejjew u taraw” (Ġw
1,39). Din hi t-tweġiba li Ġesù ta liż-żewġ dixxipli
ta’ San Ġwann Battista, li staqsewh fejn kien joqgħod. F’dan il-kliem
insibu t-tifsir tal-vokazzjoni.
Il-Knisja hi mistiedna tidħol fil-fond
tat-tifsir oriġinali w personali tas-sejħa għall-mixi wara
Kristu fil-ministeru saċerdotali u tar-rabta li ma tista’ qatt
tinħall bejn il-grazzja t’Alla u r-responsabbiltà tal-bniedem, rabta li
tinsab u turi ruħha fiż-żewġ kelmiet li spiss issibhom
flimkien fl-Evanġelju: “Ejja u imxi
warajja” (ara Mt 19, 21). Il-Knisja hi mistiedna tifhem u tagħraf dak
id-dinamiżmu li hu proprju tal-vokazzjoni, u tintebaħ bit-tliet
mumenti li fihom tiżviluppa fil-fatt; l-ewwel tfittex 'il Ġesù, imbagħad tmur warajh, u fl-aħħar tibqa’ miegħu.
Iva, il-ħerqa
għall-vokazzjonijiet hi ħerqa naturali w essenzjali tal-pastorali
tal-Knisja, u r-raġuni hi l-fatt li l-vokazzjoni turi, b’xi mod, “x’inhi”
l-Knisja, u x’inhi l-ħidma tagħha. L-istess isem tal-Knisja - ecclesia - turi l-aspett vokazzjonali
intimu tagħha, għaliex il-Knisja hi “ġemgħa”, il-ġemgħa ta’ dawk li
ssejħu. Alla laqqa’ l-ġemgħa ta’ dawk kollha li jħarsu
bil-fidi lejn Ġesù, l-awtur tas-salvazzjoni u l-bidu tal-għaqda u
s-sliem , u waqqaf il-Knisja biex tkun għal kulħadd u għal kull
wieħed is-Sagrament li jidher ta’din l-għaqda ta’ salvazzjoni”[1].
Il-ġrajja ta’ kull
vokazzjoni saċerdotali, kif hi madankollu l-ġrajja ta’ kull
vokazzjoni nisranija, hi l-ġrajja ta’ djalogu, li ma jitfissirx bil-kliem,
bejn Alla u bejn il-bniedem, bejn l-imħabba t’Alla li jsejjaħ u
l-bniedem ħieles li jwieġeb 'l Alla bl-imħabba. Dawn
iż-żewġ elementi tal-vokazzjoni, li ma jistgħu qatt
jiġu mifrudin minn xulxin: id-don kollu kemm hu b’xejn t’Alla u l-libertà
responsabbli tal-bniedem, jiddu b’mod tassew effikaċi fl-erba’ kelmiet li
bihom l-evanġelista San Mark jirrakonta s-sejħa tat-Tnax: “Ġesù
tela’ fuq l-għoljiet u sejjaħ
hdejh dawk li ried u huma resqu lejh” (Mk 3,13). Min-naħa
għandna d-deċiżjoni ħielsa ta’ Ġesù, u min-naħa
l-oħra għandna t-Tnax li “jmorru wara” Ġesù. Din hi dejjem
l-iskema, is-snin fondamentali ta’ kull vokazzjoni; dik tal-profeti, tal-Appostli,
tas-saċerdoti, tar-reliġjużi, tal-lajċi, ta’ kull persuna.
Żgur li l-vokazzjoni
hi misteru hekk għoli li ma nistgħux nifhmuh, u jħaddan fih
ir-relazzjoni li Alla jwaqqaf ma’ kull bniedem, kull wieħed kollu kemm hu
u ma hemmx ieħor bħalu, misteru li jingħaraf u jinħass
bħala sejħa li tistenna tweġiba fil-fond tal-kuxjenza
tal-bniedem, “dak is-santwarju fejn il-bniedem hu kollu kemm hu waħdu m’Alla, li jsemma’ leħnu fil-fond
tiegħu”[2].
Iżda dan ma jwarrabx fil-ġenb l-aspett komunitarju w ekkleżjali
tal-vokazzjoni: il-Knisja wkoll tinsab tassew u taħdem fil-vokazzjoni ta’
kull saċerdot.
Il-Knisja trid kuljum tilqa’ l-istedina li
għaliha l-Mulej iħajjarha bil-ħlewwa kollha huwa w
jgħidilha: “Itolbu mela lil Sid il-ħsad biex jibgħat
ħaddiema għall-ħsad tiegħu (Mt 9,38). Hija w tobdi dan il-kmand
tal-Mulej il-Knisja tkun qed tagħmel qabel kollox stqarrija umli tal-fidi,
hija w titlob għall-vokazzjonijiet, waqt li tagħraf kemm dawn huma
meħtieġa malajr għal ħajjitha w għall-missjoni
tagħha, tagħraf li huma don ta’Alla w għalhekk trid titlobhom
b’fiduċja kbira bla ma qatt tieqaf.
(Siltiet
minn 33 – 38)
Kant
Talba
korali
Għall-Knisja qegħdin infittxu
saċerdot li jkun kapaċi
jerġa’ jitwieled fl-Ispirtu kuljum.
Għall-Knisja qegħdin infittxu
bniedem li ma jibżax minn għada
U lanqas jibża’ mil-lum,
mingħajr kumplessi mill-passat.
Għall-Knisja qegħdin infittxu
bniedem li ma jibżax jibdel l-affarijiet,
li ma jbiddilx biex ikun biddel,
u li ma jitkellimx biex ikun tkellem.
Għall-Knisja qegħdin infittxu
bniedem li kapaċi jgħix mal-oħrajn
jaħdem magħhom
jibki magħhom
jidħaq magħhom
iħobb magħhom
u joħlom magħhom.
Għall-Knisja qegħdin infittxu
bniedem
Li jkun kapaċi jitlef mingħajr
ma jħossu mkisser,
li jiddubita mingħajr ma jitlef
il-fidi,
li jġib il-paċi fejn ikun hemm
l-inkwiet
u nuqqas ta’ kwiet fejn hemm
il-paċi.
Għall-Knisja qegħdin infittxu
bniedem
Li jaf juża jdejh biex ibierek u
biex juri t-triq lill-oħrajn.
Għall-Knisja qegħdin infittxu
bniedem bla ħafna mezzi,
imma li għandu ħafna
x’jagħmel,
bniedem li fil-kriżijiet ma jmurx
ifittexx xi xogħol ieħor,
imma li jara kif se jaħdem
aħjar.
Għall-Knisja qegħdin infittxu
bniedem
li jaf isib il-libertà tiegħu
billi jgħix u jaqdi
u mhux billi jagħmel dak li
jogħġbu.
Għall-Knisja qegħdin infittxu
bniedem
li jixxennaq għal Alla,
li jħobb lill-Knisja
iħobb lin-nies
iħobb il-faqar ta’ Ġesù,
iħobb l-ubbidjenza ta’ Ġesù.
Għall-Knisja qegħdin infittxu
bniedem
li ma jħawwadx it-talb ma’ kliem li
mdorri jgħid,
l-ispiritwalità mas-sentimentaliżmu,
il-vokazzjoni ma’ dak li jħobb
jagħmel,
il-qadi mal-kumdità tiegħu.
Għall-Knisja qegħdin infittxu
bniedem li kapaċi jmut għaliha,
imma li jkun iktar kapaċi jgħix
għall-Knisja;
bniedem li kapaċi jsir ministru ta’
Kristu,
profeta ta’ Alla, bniedem li jitkellem
b’ħajtu.
Don Primo Mazzolari
Minn
kitba tal-Beatu Pino Puglisi
“Għandna bżonn vokazzjonijiet
għas-servizz tal-komunikazzjoni, għas-servizz tax-xandir tal-Kelma,
għas-servizz missjunarju, għas-servizz fil-kura soċjali u
fil-kura tas-saħħa, għas-servizz tal-fqar u l-persuni
b’diżabilità, tal-emarġinati u d-drogati, tal-priġunieri u ta’
dawk li ħarġu mill-ħabs, taż-żgħażagħ u
tal-anzjani, tal-ħaddiema u ta’ dawk bla xogħol. Għandna
bżonn vokazzjonijiet għas-servizz politiku u amministrattiv.
Iżda fuq kollox għandna bżonn nies li jpoġġu lilhom
infushom għas-servizz tal-vokazzjoni tagħhom, jiġifieri nies li
jkunu għas-servizz ta’ ħuthom, li jpoġġu lilhom infushom
maġenb kull persuna fi vjaġġ gradwali ta’ dixxerniment. Nies li
għal dan il-għan kapaċi jagħtu pariri, fid-dawl tal-Kelma
ta’ Alla, biex kulħadd jifhem x’inhi l-vokazzjoni tiegħu u x’servizz
irid jagħti”. “L-akbar ġid li kull wieħed minna jista’
jagħmel għal ħuh huwa li ngħinuh jiskopri s-sejħa tiegħu
biex imbagħad ikun jista’ jimxi fis-sejħa tiegħu. Jiġifieri
li tifhem x’inhu l-pjan t’Alla għalih biex ikun jista’ jgħixu”.
“Aħna lkoll bħall-wiċċ uniku ta’ Kristu. Ejjew naħsbu
dwar il-mużajk ta’ Ġesù li wieħed jista’ jara fil-Katidral ta’
Monreal. Kull wieħed minna huwa bħal biċċa minn dan
il-mużajk kbir. Ilkoll kemm aħna jeħtieġ li nifhmu fejn hu
postna. U rridu ngħinu wkoll lill-oħrajn biex jifhmu fejn hu posthom
sabiex il-wiċċ wieħed ta’ Kristu jkun iffurmat sew , jiddi
bil-glorja tiegħu”.
Talb fis-skiet
Ċelebrant:
Għeżież ħuti,
Il-vokazzjoni ministerjali tagħna
hija msejsa fuq is-sejħa komuni għall-qdusija tal-poplu ta’ Alla,
permezz tal-magħmudija. Aħna ġejna magħżulin minn fost
il-bnedmin u mqegħdin
għall-bnedmin f’dak li għandu x’jaqsam ma’ Alla (ara Lhud
5:1). Konxji minn dan id-don u waqt li qed nippreparaw għall-ġublew
tagħna, ejjew inġeddu l-grazzja li biha sirna parti mill-poplu rjali,
profetiku u saċerdotali, u nwegħdu li naqduh b’ħajjitna kollha.
Għalhekk ejjew, bl-umiltà kollha,
nitolbu lil Alla, Missierna, biex ibierek dan l-ilma li se nroxxu fuqna
b’tifkira tal-magħmudija tagħna. Il-Mulej innifsu jġedded
ħajjitna u jagħmilna dejjem fidili għad-don tal-Ispirtu li
rċevejna, sabiex b’kariżmi differenti, nibnu l-Knisja waħda
tiegħu.
Infaħħruk, O Alla ħallieq
ta’ kollox,
Li permezz tal-ilma u tal-Ispirtu
Inti ħlaqt il-bniedem u
l-ħolqien kollu.
Glorja
lilek, Mulej!
Infaħħruk, O Kristu,
Li minn ġenbek minfud fuq is-salib
Ħarġu s-Sagramenti
tas-salvazzjoni tagħna.
Glorja
lilek, Mulej!
Infaħħruk, Spirtu s-Santu li
mill-ġuf tal-fonti tal-Magħmudija
Inti tajtna twelid ġdid bħala
ħlejjaq ġodda.
Glorja
lilek, Mulej!
O Alla li tista’ kollox
Li permzz tas-sinjali qaddisa tal-fidi
tagħna
Inti ġġedded
l-għeġubijiet tal-ħolqien u tal-fidwa,
bierek X
dan l-ilma
ħalli dawk kollha li twieldu
mill-ġdid fil-Magħmudija
ikunu ħabbâra
u xhieda tal-Għid li dejjem jiġġedded fil-Knisja tiegħek.
Bi Kristu Sidna.
Ammen.
Iċ-Ċelebrant ibierek lill-Assemblea
Ċelebrant:
O Alla li tista’ kollox, Missier Sidna
Ġesù Kristu, li ħelisna mid-dnub u tana ħajja ġdida
mill-ilma u mill-Ispirtu s-Santu, iħarisna bil-grazzja tiegħu
sal-ħajja ta’ dejjem.
Bi Kristu Sidna.
Ammen
Omelija
Talba
tal-komunità
Ċelebrant: L-aħwa
għeżież, ejjew noffru l-intenzjonijiet tagħna ta’ talb
lill-Mulej, ċerti mill-ħniena infinita tiegħu li sejħina
biex nimxu warajh.
Qarrej: Nitolbu flimkien u ngħidu:
Mgħallem, isma’ t-talba tagħna.
1. Nitolbu għall-Knisja. Sabiex
dejjem terġa’ jiskopri l-għana infinita tas-saċerdozju komuni li
ħadna fil-Magħmudija u jsaħħaħha sabiex, fid-diversità
tal-kariżmi u l-ministeri, tikber l-għaqda tal-ġisem mistiku ta’
Kristu. Nitolbu.
2. Nitolbu għas-soċjetà
ċivili u għal dawk imsejħin biex imexxuha. Sabiex ir-rispett
lejn kull persuna, il-kura u l-promozzjoni tal-ħajja ikunu
fiċ-ċentru tal-ħidma tagħhom, u sabiex tingħata kull
attenzjoni għal dawk il-persuni li jinsabu fil-periferija, imwarrbin u
miċħudin. Nitolbu.
3. Nitolbu għall-familji. Jalla
f’kull dar ikun hemm kuljum l-imħabba reċiproka li tagħmel kull
familja bħala Knisja domestika, li fiha tikber kull vokazzjoni
għas-saċerdozju u għall-ħajja konsagrata. Nitolbu.
4. Nitolbu
għaż-żgħażagħ.
Sabiex anke f’dan iż-żmien ta’ ħajjithom ikunu lesti u
disponibbli li jisimgħu u jilqgħu l-leħen ta’ Ġesù li
jsejħilhom biex ikunu miegħu ħalli joffru lid-dinja x-xhieda ta’ ħajja
mogħtija fis-servizz u fid-don tagħhom infushom. Nitolbu.
5. Nitolbu għas-saċerdoti.
Jalla l-Ispirtu tal-Mulej li għażilhom minn fost il-bnedmin u
mqegħdin fost il-bnedmin f’dak li hu ta’ Alla, jiffurmahom kontinwament
fl-iskola tal-Imgħallem. Nitolbu.
6. Nitolbu għal dawk li qed ibatu.
Jalla l-għajnuna tal-komunità Nisranija tkun strument tal-providenza
tal-Missier li qatt ma jħalli lil uliedu waħedhom. Nitolbu.
7. Ejjew nitolbu għalina
miġbura hawn. Jalla din is-sena ta’ tħejjija, permezz tat-talb,
għall-Ġublew li jmiss tkun opportunità biex nikkonfermaw ruħna
fil-vokazzjoni li rċevejna billi nimxu bit-tama fit-toroq li l-Mulej qed
ifassal għall-Knisja Tiegħu. Nitolbu.
Ċelebrant: Mulej, għajn u gwida ta’ kull
vokazzjoni, sostnina bil-qawwa tal-Ispirtu tiegħek u għatina li,
matul iż-żmien, qatt ma jkun hemm nuqqas ta’ ħaddiema
għall-ħsad tal-Missier. Int li tgħix u ssaltan għal dejjem
ta’ dejjem.
Ammen
Barka
Alla, il-bidu u l-mexxej tal-Knisja,
Iħariskom dejjem bil-grazzja
tiegħu,
sabiex tkunu tistgħu taqdu b’fedeltà
il-missjoni tagħkom.
Ammen.
Jagħmilkom qaddejja u xhieda
tal-verità u l-imħabba,
u ministri fidili
tar-rikonċiljazzjoni.
Ammen.
Jagħmel minnkom rgħajja
awtentiċi,
li jqassmu l-ħobż u l-kelma
tal-ħajja lil dawk li jemmnu
biex jikbru dejjem aktar fl-għaqda
tal-Ġisem ta’ Kristu.
Ammen.
U fuqkom ilkoll hawn preżenti
tinżel il-barka ta’ Alla li jista’ kollox:
Il-Missier u l-Iben u l-Spirtu s-Santu.
Ammen.
Għatu glorja lill-Mulej
b’ħajjitkom u morru fil-paċi.
Irroddu ħajr lil Alla.
Kant
tal-għeluq
2.
Il-professjoni tal-fidi
Kant
Daħla
Fl-isem tal-Missier u tal-Iben u tal-Ispirtu
s-Santu.
Ammen
Is-sliem, l-imħabba u l-fidi mingħand Alla l-Missier u l-Mulej Ġesù Kristu jkunu magħkom ilkoll.
U
miegħek ukoll
Ejjew niftħu qalbna għat-tama li ma tqarraqx bina.
Missier li inti fis-smewwiet,
il-fidi li inti tajtna
f’Ibnek Ġesù Kristu, ħuna,
u l-fjamma tal-imħabba
imkebbsa fi qlubna mill-Ispirtu s-Santu,
jerġgħu jqajmu fina t-tama ħienja
tal-miġja tas-Saltna tiegħek.
Jalla l-grazzja tiegħek tibdilna
f’ħaddiema bieżlin li jiżirgħu ż-żerriegħa tal-Evanġelju.
Jalla din iż-żerriegħa tkun il-ħmira li tibdel minn ġewwa lill-umanità u lill-univers,
fl-istennija ħienja ta’ smewwiet ġodda u art ġdida,
meta tidher il-glorja tiegħek għal dejjem,
wara li jkunu megħluba s-setgħat tal-Ħażen.
Jalla l-grazzja ta’ dan il-Ġublew
tagħmel minna Pellegrini tat-Tama,
imxennqin għall-ġid tas-sema.
Jalla din il-grazzja xxerred fuq id-dinja kollha
il-ferħ u s-sliem tal-Feddej tagħna.
Lilek O Alla, int l-Imbierek għal dejjem,
tifħir u glorja għal dejjem.
Ammen.
Ħuti għeżież,
Fil-mixja tagħna lejn il-Ġublew
li jmiss, bħala pellegrini tat-tama, ejjew nimxu fuq il-passi tal-qaddisin
appostli Pietru u Pawlu. Wara li
rriflettajna fuq l-għeruq tal-vokazzjoni ministerjali tagħna, ejjew
illum nġeddu l-professjoni tal-fidi tagħna fi Kristu Ġesù,
l-Imgħallem u l-Feddej tagħna. Fil-fraternità saċerdotali ejjew
nitolbu lill-Mulej maħfra flimkien, sabiex ikollu ħniena minna.
Ħin
ta’ skiet
Mulej, inti ma ġejtx biex
tikkundanna imma biex taħfer, Kýrie, eléison.
Kýrie, eléison.
Kristu, li tagħmel festa lil kull
midneb li jindem, Christe, eléison.
Christe, eléison.
Mulej, inti taħfer ħafna lil
min iħobb ħafna, Kýrie, eléison.
Kýrie, eléison.
Iħenn għalina Alla li jista’
kollox, jaħfrilna dnubietna u jwassalna għall-ħajja ta’ dejjem.
Ammen
Kolletta
Nitolbu.
Mulej Alla tagħna, li tmexxi
lill-poplu tiegħek permezz tal-ministeru tas-saċerdoti, għatihom
li jkunu perseveranti biex jaqdu r-rieda tiegħek, sabiex fil-ministeru u
fil-ħajja tagħhom ikunu jistgħu jagħtuk glorja fi Kristu.
Hu li Hu Alla, u li miegħek jgħix u jsaltan, flimkien mal-Ispirtu
s-Santu, għal dejjem ta’ dejjem.
Ammen
Qari mill-Ittra lil-Lhud (11,1-2,8-19)
Ħuti, il-fidi hija pedament
tal-ħwejjeġ li għandna nittamaw, hija l-prova
tal-ħwejjeġ li ma narawx. In-nies tal-imgħoddi għoġbu
lil Alla sewwasew għax kellhom il-fidi.
Kienet il-fidi li ġagħlet lil
Abraham jobdi s-sejħa ta’ Alla, meta dan qallu biex imur f’art li kien se
jagħtih b’wirt; u telaq, bla ma kien jaf fejn kien sejjer. Kienet il-fidi
li ġagħlitu jgħammar fl-art imwiegħda, qisu barrani f’art
barranija, u jgħix taħt it-tined flimkien ma’ Iżakk u
Ġakobb, li kienu werrieta miegħu tal-istess wegħda; għax hu
kien iħares ’il quddiem, lejn il-belt mibnija fis-sod, li l-imgħallem
u l-bennej tagħha huwa Alla.
Kienet ukoll il-fidi li biha Sarah, mara
mdaħħla fiż-żmien, setgħet titqal, għax hija
għarfet li ta’ kelmtu kien dak li għamlilha l-wegħda. Kien
għalhekk li minn bniedem wieħed, li kien tista’ tgħid mejjet,
twieldu nies bil-kotra daqs il-kwiekeb tas-sema u daqs ir-ramel ta’ xatt
il-baħar, li ħadd ma jista’ jgħoddu.
Kollha bil-fidi mietu dawn in-nies. Kienu
għadhom ma ħadux dak li kien imwiegħed, iżda huma rawh
mill-bogħod u sellmulu, waqt li għarfu li huma kienu barranin u
għorba fuq l-art. Tabilħaqq, dawk li jitkellmu b’dan il-mod juru
ċar li huma qegħdin ifittxu pajjiż għalihom. Li kieku
kellhom fi ħsiebhom il-pajjiż li minnu kienu ħarġu, kellhom
żmien biżżejjed biex jerġgħu lura fih. Imma issa huma
jixtiequ pajjiż aħjar, jiġifieri, dak tas-sema. Huwa
għalhekk li Alla ma jistmellx jissejjaħ Alla tagħhom, għax
hu ħejja belt għalihom.
Kienet il-fidi li ġagħlet lil
Abraham joffri ’l Iżakk meta Alla ġarrbu; u kien se joffri lil ibnu
l-waħdieni sewwasew dak li kien ħa l-wegħdiet, hu li Alla kien
qallu: “Minn Iżakk int għad ikollok nisel.” Huwa fehem li Alla kellu
s-setgħa saħansitra li jqajjem mill-mewt; u, fis-sens ta’ tixbiha,
ħadu tabilħaqq lura mill-mewt.
Il-Kelma tal-Mulej.
Irroddu ħajr lil Alla.
Salm Responsorjali (minn
Salm26)
Inwieġbu flimkien: Il-Mulej id-dawl
u s-salvazzjoni tiegħi.
Il-Mulej id-dawl u s-salvazzjoni
tiegħi;
minn min għandi nibża’?
Il-Mulej hu l-kenn tiegħi;
quddiem min għandi nitwerwer? R/.
Ħaġa waħda tlabt
lill-Mulej,
ħaġa waħda nfittex:
li ngħammar f’dar il-Mulej
tul il-jiem kollha ta’ ħajti;
biex nitgħaxxaq bil-ħlewwa
tal-Mulej
jien u nħares lejn it-tempju
tiegħu. R/.
Isma’, Mulej, leħen l-għajta
tiegħi,
ħenn għalija u weġibni.
jien wiċċek infittex, Mulej.
la taħbix wiċċek
minni. R/.
Nemmen li għad nara t-tjieba
tal-Mulej f’art il-ħajjin.
Ittama fil-Mulej, żomm
sħiħ u qawwi qalbek;
ittama fil-Mulej. R/.
Kant għall-Evanġelju
Hallelujah, hallelujah
Inti Pietru, u fuq din il-blata jiena
nibni l-Knisja tiegħi,
U s-setgħat tal-infern ma
jegħlbuhiex.
Hallelujah
Qari mill-Evanġelju skont San Mattew (Mt 16, 13-19)
F’dak iż-żmien, meta wasal
fl-inħawi ta’ Ċesarija ta’ Filippu, Ġesù staqsa lid-dixxipli
tiegħu u qalilhom: “Min jgħidu n-nies li hu Bin il-bniedem?” U huma
weġbuh: “Xi wħud, Ġwanni l-Battista; oħrajn, Elija; u
oħrajn, Ġeremija jew wieħed mill-profeti.” Imma intom min
tgħidu li jien?” staqsiehom. U qabeż Xmun Pietru u qallu: “Inti
l-Messija, Bin Alla l-ħaj.” U Ġesù wieġbu u qallu: “Hieni int,
Xmun bin Ġona, għax mhux bniedem tad-demm u l-laħam uriek dan,
imma Missieri li hu fis-smewwiet. U jiena ngħidlek: Inti Pietru, u fuq din
il-blata jiena nibni l-Knisja tiegħi, u s-setgħat tal-infern ma
jegħlbuhiex. Jiena nagħtik l-imfietaħ tas-Saltna tas-Smewwiet, u
kulma torbot fuq l-art ikun marbut fis-smewwiet, u kulma tħoll fuq l-art ikun
maħlul fis-smewwiet.”
Il-Kelma tal-Mulej
Tifħir lilek, Kristu!
Skiet
Talba alternata bejn żewġ kori
O Kristu, l-uniku medjatur tagħna,
aħna għandna bżonnok:
Biex ngħixu f’komunjoni ma’ Alla
l-Missier;
Biex miegħek, Int li Int Iben
waħdieni u l-Mulej tagħna,
Insiru ulied adottivi tiegħu,
Biex nitwieldu mill-ġdid
mill-Ispirtu s-Santu.
Għandna bżonnok,
Int li Int l-uniku mgħallem ta’ dawk
il-veritajiet
li huma moħbija imma
meħtieġa għall-ħajja,
biex inkunu nafu min aħna u d-destin
tagħna, u l-mod kif niksbuh.
Għandna bżonnok, Feddej
tagħna,
biex insiru konxji tad-dgħufija
tagħna u biex infejquha;
Biex inkunu nistgħu nagħrfu
t-tajjeb mill-ħażin u jkollna t-tama tal-qdusija;
biex niċħdu dnubietna u jkollna
l-maħfra tagħhom.
Għandna bżonnok, Inti li Inti
ħuna l-kbir u l-ikbar fost il-bnedmin,
biex niskopru mill-ġdid:
ir-raġunijiet veri tal-fratrnità
fost il-bnedmin,
il-pedamenti tal-ġustizzja,
it-teżori tal-imħabba,
U l-ogħla ġid li hija
l-paċi.
Għandna bżonnok, inti li
ġġorr fuqek l-uġigħ tagħna,
Biex inkunu nafu t-tifsira tat-tbatija
u biex nagħtuha valur - biha inpattu
u biha insalvaw.
Għandna bżonnok, Int li Int
Rebbieħ fuq il-mewt,
biex teħlisna mid-disperazzjoni u
miċ-ċaħda
u biex ikollna dawk iċ-ċertezzi
li qatt ma jittraduna.
Ilkoll flimkien:
Għandna bżonnok, o Kristu,
Mulej, Alla magħna, biex minnek
nitgħallmu l-vera imħabba
U biex, matul it-triq iebsa ta’
ħajjitna,
nimxu bil-ferħ u bil-qawwa
tal-imħabba tiegħek,
sa ma naslu għall-aħħar
laqgħa tagħna miegħek,
aħna li nħobbuk, u li qed
nistennewk,
Int, li Int l-Imbierek għal dejjem. Ammen
(meħuda minn ittra Pastorali
lid-Djoċesi ta’ Milan, San Pawlu VI, 1955)
Mill-Eżortazzjoni Appostolika Pastores Dabo Vobis ta’ San Ġwanni Pawlu II
Hija w taqdi
l-missjoni profetika tagħha, il-Knisja tħoss li ma tistax twarrab
fil-ġenb id-dmir urġenti li tħabbar u tagħti xhieda
tat-tifsir nisrani tal-vokazzjoni, anzi tal-“Evanġelju
tal-vokazzjonijiet”. Il-Knisja f’dan il-qasam tagħraf ukoll kemm hu
urġenti llum kliem l-Appostlu:”Ħażin għalija jekk ma
nxandarx l-Evanġelju” (1 Kor 9,16). Din it-twissija hi l-ewwelnett
għalina r-ragħajja, u, flimkien magħna, hi wkoll għall-edukaturi
kollha fil-Knisja. Il-predikazzjoni u l-katekeżi iridu dejjem juru dimensjoni
vokazzjonali, li hi naturali għalihom: il-Kelma ta’ Alla iddawwal lil min
jemmen biex iqis il-ħajja tiegħu bħala tweġiba
għas-sejħa ta’ Alla u tissieħeb miegħu biex jilqa’ bil-fidi
d-don tal-vokazzjoni personali.
Iżda dan
mhux biżżejjed għalkemm hu importanti w essenzjali:
meħtieġa “predikazzjoni diretta dwar il-misteru tal-vokazzjoni
fil-Knisja, dwar il-valur tas-saċerdoti ministerjali, u dwar
il-ħtieġa urġenti tal-vokazzjonijiet għall-Poplu ta’ Alla”
. Katekeżi organika mogħtija b’mod xieraq lill-membri kollha
tal-Knisja, barra li twarrab id-dubju li jkun hemm u tneħħi fehmiet
mgħawġa w unilaterali dwar il-ministeru saċerdotali, tiftaħ
qlub dawk li jemmnu ħa jistennew id-doni ta’ Alla, u toħloq
kundizzjonijiet favorevoli għat-twelid ta’ vokazzjonijiet ġodda.
Wasal iż-żmien li nitkellmu bil-kuraġġ kollu dwar
il-ħajja tas-saċerdot bħala valur ta’ siwi bla qjies u
bħala sura l-ġmiel tagħha, sura privileġġjata
tal-ħajja nisranija. L-edukaturi, u fuq kollox is-saċerdoti, ma’
għandhom jibżgħu juru b’mod ċar u qawwi li l-vokazzjoni
għas-saċerdozju hi ħaġa li verament tista’ tkun għal
dawk iż-żgħażagħ li jidher li għandhom id-doni u
l-kwalitajiet meħtieġa għaliha. Wieħed m’ għandu
jibża’ li jkun qiegħed jinfluwenzahom iżżejjed jew
jillimitalhom il-libertà tagħhom; anzi proposta xierqa, f’ waqtha, tista’
twassal biex tqanqal fiż-zgħażagħ tweġiba ħielsa
w vera. Fl-aħħar mill-aħħar, il-ġrajja tal-Knisja hi
l-ġrajja ta’ ħafna vokazzjonijiet li nibtu wkoll fi tfal
żgħar, u turi sewwa kemm hi provvidenzjali l-kelma ta’ saċerdot
li jkun qrib it-tfal u ż-żgħażagħ: mhux biss il-kelma,
imma wkoll li jkun qrib tagħhom, jiġifieri xhieda ferrieħa
bil-fatt kapaċi tqanqal ħafna mistoqsijiet u twassal ukoll għal
deċiżjonijiet effettivi.
(kap 38)
Kant
Talba
korali:
O Ġesù, qassis il-kbir u ta’ dejjem,
ħares lis-saċerdot tiegħek
Fil-Qalb Imqaddsa Tiegħek.
Żomm bla tebgħa lil idejh
midlukin
li jmissu l-Ġisem Imqaddes
Tiegħek ta’ kuljum.
Ħares ukoll xufftejh iħammru
bid-Demm Prezzjuż Tiegħek.
Żomm il-qalb tiegħu safja
Qalb immarkata mill-karattru
saċerdotali tiegħek.
Għamel li jikber fil-fedeltà u
l-imħabba lejk u ħarsu
mit-taħsir tad-dinja.
Flimkien mas-setgħa li jibdel
il-ħobż u l-inbid, agħtih ukoll is-setgħa li jibdel
il-qlub.
Bierku u agħmel li l-ħidma
tiegħu tħalli frott
u meta jasal il-waqt agħtih ukoll
il-kuruna tal-ħajja ta’ dejjem.
Ammen
(Santa
Tereża ta’ Lisieux)
Omelija
tal-Papa Benedittu Sittax fis-Solennità tal-Qalb Imqaddsa ta’ Ġesù,
11
ta’ Ġunju 2010
Is-saċerdot mhux sempliċiment
xi ħadd li għandu kariga, bħal dawk li kull soċjetà
teħtieġ biex ikunu jistgħu jitwettqu fiha ċerti
uffiċċji. Iżda hu jagħmel xi ħaġa li l-ebda bniedem
ma jista’ jagħmel waħdu: ilissen f’isem Kristu l-kelma
tal-maħfra tad-dnubiet u b’hekk
ibiddel, bis-setgħa li ġejja minn Alla, is-sitwazzjoni ta’
ħajjitna. Ilissen il-kliem ta’ radd il-ħajr fuq l-offerti
tal-ħobż u l-imbid, li huma kliem ta’ transustanzazzjoni – kliem li
jagħmlu lilu nnifsu preżenti, Hu li Hu l-Irxoxt, Ġismu u Demmu,
kliem li jibdlu l-elementi tad-dinja: kliem li jiftaħ beraħ id-dinja
kollha għal Alla u jgħaqqadna miegħu.
Mela is-saċerdozju mhux
sempliċiment “uffiċċju”, imma sagrament: Alla juża
sempliċi bniedem biex permezz tiegħu jkun preżenti
għall-bnedmin u jaġixxi f’isimhom. Kemm hu kbir dan
il-kuraġġ ta’ Alla, li jafda lilu nnifsu f’idejn il-bnedmin; li
minkejja li jaf id-dgħufijiet tagħna, iqis lill-bnedmin li huma
kapaċi jaġixxu u jkunu preżenti minfloku – dan
il-kuraġġ ta’ Alla huwa tassew tal-għaġeb, u huwa moħbi
fil-kelma “saċerdozju”. Il-fatt li Alla jqisna kapaċi għal dan;
il-fatt li b’dan il-mod huwa jsejjaħ lill-bnedmin għas-servizz
tiegħu u b’hekk jintrabat magħhom: huwa propju dan li ridna
nirriflettu u nifhmu mill-ġdid matul din is-sena. Ridna nerġgħu
nqajmu fina l-ferħ ta’ kemm Alla hu tant qrib tagħna, u l-gratitudni
tal-fatt li Hu jafda lilu nnifsu f’idejn id-dgħufija tagħna; u li Hu
jmexxina u jsostnina kuljum. B’hekk ridna wkoll nerġgħu nuru
liż-żgħażagħ li din il-vokazzjoni, din il-komunjoni
ta’ servizz għal Alla u ma’ Alla, fil-fatt teżisti – anzi, huwa Alla
qed jistenna l-“iva” tagħna.
Qegħdin niċċelebraw
il-festa tal-Qalb ta’ Ġesù u permezz tal-liturġija, biex ngħidu
hekk, nidħlu u niskopru din il-qalb ta’ Ġesù, li fil-mewt tiegħu
infetħet mil-lanza tas-suldat Ruman. Iva, qalbu hija miftuħa
għalina – u b’dan tinfetaħ għalina l-qalb ta’ Alla nnifsu.
Il-liturġija tinterpreta għalina l-lingwaġġ tal-qalb ta’
Ġesù, li tkellimna, fuq kollox, li Alla huwa r-Ragħaj tal-bnedmin, u
b’dan il-mod turina li s-saċerdozju ta’ Ġesù għandu
l-għeruq fil-fond ta’ qalbu; u b’hekk turina li dan il-pedament jibqa’
għal dejjem, u huwa l-kriterju ta’ kull ministeru saċerdotali, li
għandu dejjem ikun ankrat fil-qalb ta’ Ġesù u li għandu l-bidu
tiegħu fih.
Ir-ragħaj juri t-triq it-tajba lil
dawk fdati lilu. Hu jimxi quddiemhom u jmexxiehom. Ejjew ngħidu dan b’mod
differenti: il-Mulej jurina kif għandna nkunu bnedmin. Jgħallimna
l-arti ta’ kif inkunu bnedmin. X’għandi nagħmel biex nevita li naqa’,
biex nevita li naħli ħajti f’ħajja bla sens? Din hija proprju
l-mistoqsija li kull bniedem irid jagħmel lilu nnifsu u li tgħodd
f’kull waqt ta’ ħajjitna. U kemm jeżisti dlam madwar din
il-mistoqsija llum! Għal darb’oħra niftakru fil-kliem ta’ Ġesù,
li ġietu ħniena min-nies, għax kienu bħal nagħaġ
mingħajr ragħaj. Mulej, ikollok ħniena minna wkoll! Urina
t-triq! Mill-Evanġelju nafu dan: Hu nnifsu huwa t-triq. Li ngħixu ma’
Kristu, li nimxu warajh – dan ifisser li nsibu t-triq it-tajba, biex
ħajjitna tikseb tifsira u biex xi darba nkunu nistgħu ngħidu:
“Iva, kienet xi ħaġa tajba li jiena għext”.
Il-poplu ta’ Iżrael huwa grat lejn
Alla, għax Hu wera l-mod ta’ kif ngħixu permezz tal-Kmandamenti.
Is-Salm il-kbir 119 (118) huwa espressjoni unika ta’ ferħ għal dan
il-fatt: m’aħniex mexjin fid-dlam. Alla wriena x’inhi t-triq, kif
nistgħu nimxu sewwa. Dak li jgħidu l-Kmandamenti huwa miġbur
fil-qosor fil-ħajja ta’ Ġesù li sar għalina mudell ħaj.
Għalhekk nifhmu li dawn l-indikazzjonijiet mingħand Alla mhumiex
ktajjen, imma huma t-triq li jurina Hu. Nistgħu nkunu ħenjin
minħabba dawn il-kmandamenti, u nifirħu għax narawhom quddiemna
bħala realtà ħajja permezz ta’ Kristu. Hu stess għamilna
ħenjin. Fil-mixja flimkien ma’ Kristu nesperjenzaw il-ferħ
tar-Rivelazzjoni, u bħala saċerdoti rridu nikkomunikaw lin-nies il-ferħ
għax lilna intweriet it-triq it-tajba tal-ħajja.
Imbagħad hemm il-kelma dwar il-“wied
mudlam” li minnu l-Mulej imexxi lill-bniedem. It-triq ta’ kull wieħed
minna xi darba se twassalna fil-wied mudlam tal-mewt fejn ħadd ma jista’
jakkumpanjana. Imma Hu se jkun hemm. Kristu nnifsu niżel fil-lejl mudlam
tal-mewt. Anke hemmhekk hu ma jħalliniex waħedna. Imexxina hemm
ukoll. “Jekk ninżel f’qiegħ l-art, inti hemm,” jgħid Salm 139
(138). Iva, int preżenti anki fl-aħħar taqtiegħa, u
għalhekk is-Salm responsorjali tagħna jgħid: anke hemm, fil-wied
mudlam, ma nibżax. Meta nitkellmu dwar dan il-wied mudlam, iżda,
nistgħu naħsbu wkoll fil-widien mudlama ta’ tentazzjoni, ta’
qtigħ il-qalb u provi li kull persuna umana trid tgħaddi minnhom.
Anke f’dawn il-widien mudlama tal-ħajja Hu qiegħed hemm. Iva, Mulej,
fid-dlam tat-tentazzjoni, fis-sigħat tad-dlam li fihom id-dwal kollha
donnhom jintfew, urini li int qiegħed hemm. Għinna lilna
s-saċerdoti, sabiex inkunu qrib in-nies fdati f’idejna fl-iljieli mudlama
tagħhom. Sabiex inkunu nistgħu nuruhom id-dawl tiegħek.
“Il-ħatar tiegħek u
l-għasluġ tiegħek huma jwennsuni”: ir-ragħaj għandu
bżonn il-ħatar kontra l-bhejjem salvaġġi li jridu
jidħlu qalb il-merħla, kontra l-ħallelin li jfittxu l-priża
tagħhom. Minbarra l-ħatar għandu bżonn ukoll
l-għasluġ li jitwieżen fuqu u jgħinu biex jaqsam
mogħdijiet iebsa. Dawn iż-żewġ ħwejjeġ
jagħmlu sehem ukoll mill-ministeru tal-Knisja, fil-ministeru
tas-saċerdot. Il-Knisja trid tuża wkoll il-ħatar
tar-ragħaj, il-ħatar li bih tħares il-fidi kontra t-tagħlim
falz, kontra l-kurrenti li jbiegħdu lill-merħla.
Preċiżament l-użu tal-ħatar jista’ jkun servizz ta'
mħabba. Illum nistgħu naraw li m’għandha x’taqsam xejn
mal-imħabba meta tiġi tollerata imġieba mhux xierqa għall-ħajja
saċerdotali. Hekk ukoll kif mhix kwistjoni ta’ mħabba jekk
l-ereżija, it-tgħawwiġ u t-tnaqqir tal-fidi jitħallew
jinfirxu, bħallikieku l-fidi hi xi ħaġa li vvintajna aħna
stess! Bħallikieku m’għadhiex rigal mingħand Alla, il-fidi hija
l-ġawhra għażiża li ma nistgħux inħallu min
jaħtafhielna. Fl-istess ħin, iżda, il-ħatar dejjem irid
isir għasluġ, il-bastun tar-ragħaj – bastun li jgħin
lill-bnedmin biex ikunu jistgħu jimxu f’mogħdijiet diffiċli wara
l-Mulej.
Fl-aħħar tas-Salm tissemma’
l-mejda mħejjija, iż-żejt li bih tindilek ir-ras, il-kalċi
mfawwar, u li ngħammru fid-dar tal-Mulej. Fis-Salm dan l-ewwelnett
jesprimi l-ferħ meta nkunu fil-preżenza ta’ Alla fit-tempju, li nkunu
l-mistednin tiegħu, li huwa hu stess li jgħaddi jservina, u li
ngħammru miegħu. Għalina
li nitolbu dan is-Salm ma’ Kristu u mal-Ġisem tiegħu li hu l-Knisja,
din it-tama tikseb wisa’ u fond akbar. F’dan il-kliem naraw, biex ngħidu
hekk, antiċipazzjoni profetika tal-misteru ta’ l-Ewkaristija li fih Alla
nnifsu jistedinna meta joffrilna lilu nnifsu bħala ikel – bħal dak
il-ħobż u dak l-inbid mill-itjeb li, hu waħdu jista’ jaqta’
l-ġuħ u l-għatx ġewwieni tal-bniedem. Kif nistgħu ma
nkunux ħenjin meta għad jasal dak il-jum aħna nkunu mistednin
għall-mejda t’Alla u ngħixu miegħu? Kif nistgħu ma nkunux
ħenjin meta Hu kkmandana: “Agħmlu dan b’tifkira tiegħi”? Kif
nistgħu ma nkunux ħenjin meta Hu ħalliena nħejju l-mejda
ta’ Alla għall-bnedmin, nagħtuhom Ġismu u Demmu, u noffrulhom
id-don prezzjuż tal-preżenza tiegħu stess? Iva, nistgħu
nitolbu flimkien bil-qalb il-kliem tas-Salm: “It-tjieba u l-ħniena jkunu
miegħi l-jiem kollha ta’ ħajti” (23 [22], 6).
Fl-aħħar ejjew nagħtu
ħarsa fil-qosor lejn iż-żewġ antifoni tat-tqarbin li
tipproponielna llum il-Knisja fil-liturġija tagħha. L-ewwel nett hemm
il-kelma li biha San Ġwann itemm ir-rakkont tat-tislib ta’ Ġesù: “Suldat
nifidlu ġenbu b’lanza u minnufih ħareġ demm u ilma” (Ġw
19,34). Qalb Ġesù hija minfuda mil-lanza. Din il-qalb miftuħa ssir
għajn: l-ilma u d-demm li joħorġu jirreferu
għaż-żewġ Sagramenti ewlenin li bihom tgħix il-Knisja:
il-Magħmudija u l-Ewkaristija. Mill-ġenb minfud tal-Mulej, minn qalbu
miftuħa toħroġ l-għajn ħajja li nixxiet tul is-sekli,
u hija din l-għajn li tagħmel il-Knisja. Il-qalb miftuħa hija
n-nixxiegħa ġdida ta’ ħajja; f’dan il-kuntest, Ġwanni
żgur ħaseb ukoll fil-profezija ta’ Eżekjel li jara xmara
toħroġ mit-tempju l-ġdid, xmara li tagħti frott u
ħajja (Eż 47): Ġesù nnifsu hu t-tempju l-ġdid, u l-qalb
miftuħa tiegħu hija l-għajn li minnha toħroġ
ħajja ġdida, ħajja li tiġi kkomunikata lilna
fil-Magħmudija u l-Ewkaristija.
Madankollu, fil-liturġija
tas-Solennità tal-Qalb ta’ Ġesù hemm kelma oħra fl-antifona
tat-tqarbin, u tixbaħ lil din, meħuda mill-Evanġelju ta’
Ġwanni: “Min jieħdu l-għatx, jiġi għandi u jixrob.
Kif tgħid l-Iskrittura, min jemmen fija minnu joħorġu xmajjar
ta’ ilma ħaj” (ara Ġwanni 7:37f). Permezz tal-fidi nixorbu, biex
ngħid hekk, mill-ilma ħaj tal-Kelma ta’ Alla. B’dan il-mod il-bniedem
li jemmen isir hu nnifsu għajn li tagħti ilma ħaj lill-art
għatxana. Dan narawh fil-qaddisin. Narawh f’Marija li, bħala mara
kbira ta’ fidi u mħabba, saret għajn ta’ fidi, ta’ imħabba u ta’
ħajja matul is-sekli. Kull nisrani u kull saċerdot għandu jsir
għajn li jagħti l-ħajja lill-oħrajn, u dan billi jibda minn
Kristu. Jeħtieġ nagħtu l-ilma tal-ħajja lid-dinja
bil-għatx. Mulej, nirringrazzjawk għax int ftaħt qalbek
għalina; meta permezz tal-mewt u l-qawmien tiegħek sirt għajn
tal-ħajja. Għatina l-ħajja, għatina li ngħixu bik int
li int l-għajn vera, u għatina li aħna wkoll inkunu għejjun
li nagħtu l-ilma tal-ħajja lil dan iż-żmien li qed
ngħixu fih.
Nirringrazzjawk tal-grazzja tal-ministeru
saċerdotali. Mulej, berikna u bierek lil dawk kollha li jinsabu
bil-għatx u għadhom qed ifittxu. Ammen.
Skiet
għal ħin ta’ riflessjoni
Ċelebrant:
Għeżież ħuti,
Meta aħna weġibna
għas-sejħa tal-Mulej Ġesù, aħna qbadna t-triq biex nimxu
warajh u wegħidnieh li nħarsu, u li ngħaddu lill-oħrajn
il-fidi tagħna. Din il-fidi hija simbolizzata mid-dawl li ingħatalna
fil-jum tal-magħmudija tagħna. Il-Mulej irxoxt, li għażilna
sa minn ġuf ommna, l-ewwel sejħilna għall-eżistenza, u
mbagħad sejħilna biex nimxu warajh, huwa d-dawl tad-dinja, “il-belt
mibnija fuq il-muntanja”.
Konxji ta’ dan id-don, u waqt li qed
nippreparaw għall-ġublew tagħna, ejjew nerġgħu
nirċievu dan id-dawl u nġeddu l-istqarrija tal-fidi tagħna,
il-wegħdiet tal-magħmudija tagħna, li permezz tagħhom
aħna għażilna lil Kristu l-Mulej.
Jinxtegħlu
x-xemgħat mill-blandun
u
jitqassmu lis-saċerdoti preżenti.
Imbagħad,
iċ-ċelebrant jistieden lil dawk preżenti
biex
jagħmlu l-istqarrija tal-fidi
u
jġeddu l-wegħdiet tal-magħmudija.
Inqumu
bilwieqfa
Tiċħdu lid-dnub, biex
tgħixu fil-ħelsien ta’ wlied Alla?
IVA NIĊĦAD.
Tiċħdu lill-qerq
tal-ħażen biex id-dnub ma jaħkimx fuqkom?
IVA NIĊĦAD.
Tiċħdu lix-xitan, li jqanqal u
jħajjar għad-dnub?
IVA NIĊĦAD.
Temmnu intom f’Alla, il-Missier li jista’
kollox, li ħalaq is-sema u l-art?
IVA NEMMEN.
Temmnu f’Ġesù Kristu, Ibnu
l-waħdieni, Sidna, li twieled minn Marija Verġni, bata, miet u
difnuh, qam mill-imwiet, u qiegħed fil-lemin tal-Missier?
IVA NEMMEN.
Temmnu fl-Ispirtu s-Santu, fil-Knisja
Mqaddsa Kattolika, fi-xirka tal-qaddisin, fil-maħfra tad-dnubiet,
fil-qawmien mill-imwiet u fil-ħajja ta’ dejjem?
IVA NEMMEN.
U Alla li jista’ kollox, Missier Sidna
Ġesù Kristu, li ħelisna mid-dnub u tana ħajja ġdida
mill-ilma u l-Ispirtu s-Santu, iħarisna bil-grazzja tiegħu u
jwassalna fil-ħajja ta’ dejjem.
Ammen.
Noqogħdu
bilqiegħda
OMELIJA
Talb tal-komunità
Ċelebrant:
Ħuti għeżież, ejjew
nagħmlu t-talb tagħna lill-Mulej, ċerti mill-ħniena
tiegħu bla tarf, hu li sejjaħna biex nimxu warajh.
Qarrej: Nitolbu flimkien u ngħidu:
Mgħallem, isma’ t-talba tagħna.
1.Għall-Knisja kollha, li permezz
tagħha l-leħen tal-Mulej li jsejjaħ lil kulħadd
għad-dixxipulat għadu jinstema’ sal-lum. Nitolbu sabiex
bil-ħidma tal-Ispirtu s-Santu l-Knisja tkompli turi s-sejħa ewlenija
tal-bnedmin kollha, li jkunu l-ulied maħbubin tal- Missier. Nitolbu.
2.Għall-Papa, l-isqfijiet u
s-saċerdoti: biex ikunu rgħajja ġenerużi, kapaċi
jagħtu ħajjithom għall-aħbar it-tajba ta’ Kristu, u jsiru
mudell ta’ min jimitahom. Nitolbu.
3.Għall-persuni konsagrati kollha,
irġiel u nisa: sabiex il-grazzja tiegħek tgħinhom jgħixu
bis-sħiħ il-vokazzjoni tagħhom u jkunu jafu jiġbdu
oħrajn biex jgħixu l-istess sigriet tal-ferħ tagħhom.
Nitolbu.
4.Għall-missjunarji: sabiex,
mgħejjunin mit-talb tagħna, dejjem isibu s-saħħa u
l-kuraġġ biex iwasslu l-Bxara t-Tajba f’kull parti tad-dinja,
speċjalment fil-periferiji tal-eżistenza umana. Nitolbu.
5.Għall-koppji
miżżewġin: sabiex, fil-ħajja tal-familja, isibu twettiq
fil-vokazzjoni tagħhom għall-hena, u joħolqu art fertili li fiha
jitwieldu u jikbru l-vokazzjonijiet. Nitolbu.
6.Għaż-żgħażagħ:
sabiex jitgħallmu dwar il-vokazzjoni tagħhom permezz ta’ dawk li
jmexxuhom u jedukawhom, jiskopru r-riżorsi u l-valuri li
jeħtieġu biex jagħtu ħajjithom b’ferħ u fiduċja.
Nitolbu.
7. Għalina lkoll li qed inħejju
biex ngħixu l-Ġublew: sabiex inkunu pellegrini ta’ tama fit-toroq
tad-dinja, imħaddnin mas-salib ta’ Kristu u magħqudin fl-imħabba
ta’ aħwa. Nitolbu.
Ċelebrant:
Mulej Ġesù Kristu, inti d-dawl
tagħna, żomm il-fidi tagħna soda u għinna fil-mixja
tagħna ta’ kuljum. Isma’ t-talb umli li joħroġ mill-qalb
tal-Knisja tiegħek, u ilqa’ r-radd ta’ ħajr tagħna u kun int li
twettaq it-tama tagħna. Int, li int Alla, u li tgħix u ssaltan
għal dejjem ta’ dejjem.
Ammen
Barka
Alla, li minnu tieħu isimha kull
familja,
isaħħaħkom fil-bniedem ta’
ġewwa skont il-għana tal-glorja tiegħu.
Ammen.
Jagħtikom li timxu b’qalb
ġeneruża
fit-triq tal-kmandamenti tiegħu u
fil-ferħ ta’ Kristu Sidna,
flimkien ma’ dawk li afdalkom f’idejkom
bħala nagħaġ tal-merħla tiegħu.
Ammen.
Bil-qawwa tal-Ispirtu s-Santu,
jalla dejjem u kullimkien
tkunu tistgħu tagħtu
r-raġuni għat-tama li hemm fikom.
Ammen.
U lilkom ilkoll li tinsabu hawn
miġbura, iberikkom Alla li jista’ kollox:
il-Missier, u l-Iben, u l-Spirtu s-Santu.
Ammen.
Bierku lill-Mulej b’ħajjitkom. Morru
fis-sliem.
Irroddu ħajr lil Alla.
Innu
tal-għeluq
3.
Il-prova
Kant
Daħla
Fl-isem tal-Missier u tal-Iben u tal-Ispirtu s-Santu.
Ammen
Il-Mulej, li
jmexxi lil qalbna għall-imħabba u s-sabar ta’ Kristu, ikun
magħkom ilkoll.
U
miegħek ukoll
Ejjew niftħu qalbna għat-tama li ma tqarraqx bina.
Missier li inti fis-smewwiet,
il-fidi li inti tajtna
f’Ibnek Ġesù Kristu, ħuna,
u l-fjamma tal-imħabba
imkebbsa fi qlubna mill-Ispirtu s-Santu,
jerġgħu jqajmu fina t-tama ħienja
tal-miġja tas-Saltna tiegħek.
Jalla l-grazzja tiegħek tibdilna
f’ħaddiema bieżlin li jiżirgħu ż-żerriegħa tal-Evanġelju.
Jalla din iż-żerriegħa tkun il-ħmira li tibdel minn ġewwa lill-umanità u lill-univers,
fl-istennija ħienja ta’ smewwiet ġodda u art ġdida,
meta tidher il-glorja tiegħek għal dejjem,
wara li jkunu megħluba s-setgħat tal-Ħażen.
Jalla l-grazzja ta’ dan il-Ġublew
tagħmel minna Pellegrini tat-Tama,
imxennqin għall-ġid tas-sema.
Jalla din il-grazzja xxerred fuq id-dinja kollha
il-ferħ u s-sliem tal-Feddej tagħna.
Lilek O Alla, int l-Imbierek għal dejjem,
tifħir u glorja għal dejjem.
Ammen.
Għeżież ħuti,
Filwaqt li aħna wkoll nimxu
bħala pellegrini tat-tama lejn il-Ġublew li jmiss, ejjew nimxu fuq il-passi tal-qaddisin appostli
Pietru u Pawlu. Bħalhom, filwaqt li, permezz tal-fidi tagħna, inwieġbu
b’mod ġeneruż għas-sejħa tal-Mulej, aħna nafu li qed
inġorru id-don f’ġarar foqra tal-fuħħar (ara 2 Kor 4.7) u
nġorru t-toqol tad-dgħufija
tagħna speċjalment fis-siegħa tat-tentazzjoni u l-prova.
Għaldaqstant, b’qalb niedma u sobgħiena ejjew nitolbu maħfra
għal dnubietna.
Ħin qasir ta’ skiet
Kant
meħud minn Taizè (jew ritornell ieħor):
Misericordias Domini, in
aeternum cantabo
1: Nitolbuk
maħfra għal dawk id-drabi meta ma konniex sodi fir-rieda tagħna
u għal meta ttraskurajna r-responsabbiltajiet tagħna. R/.
2: Nitolbuk
maħfra għal dawk id-drabi meta ma mxejniex b’umiltà vera u għal
meta ma qdejniex lill-oħrajn b’imħabba. R/.
1: Nitolbuk
maħfra għall-indifferenza li biha ħarisna lejn dawk
fil-bżonn, u nkwetajna biss fuq il-bżonnijiet tagħna. R/.
2: Nitolbuk
maħfra talli ma ħarisniex l-ambjent li ngħixu fih u lanqas ma
ħeġġiġna lill-oħrajn. R/.
1: Nitolbuk
maħfra ta’ meta konna arroganti, frott tas-suppervja tagħna, u hekk
bdilna l-awtorità ta’ qadi f’awtorità ta’ poter. R/.
2: Nitolbuk
maħfra għal dawk id-drabi meta ma kellniex il-kuraġġ
nagħtu xhieda għalik, għax bżajna li nitilfu l-popolarità.
R/.
1: Nitolbuk
maħfra għat-tfixkil li għamilna fid-djalogu u fil-laqgħat
ma’ aħwa ġodda, u talli ma fittixniex l-għaqda akkost ta’
kollox. R/.
2: Nitolbuk
maħfra għal kull darba li ma batejniex għall-verità u tkellimna
b’attitudni ta’ ġudizzju jew kritika. R/.
1: Nitolbuk
maħfra ta’ meta ma fdajniex f’dawk li jmexxuna, u ma wrejniex imħabba
ta’ wlied u ubbidjenza koresponsabbli. R/.
2: Nitolbuk
maħfra għal dawk id-drabi meta, minħabba n-nuqqas ta’ fidi
tagħna, stennejna l-grazzi jew xi tip ta’ rikonoxximent għall-isforzi
tagħna. R/.
1: Nitolbuk
maħfra għax it-tama tagħna hija dgħajfa, u ta’ kemm hi
faċli li naqtgħu qalbna quddiem id-diffikultajiet. R/.
2: Nitolbuk
maħfra għal meta ma għexniex l-ispirtu ta’ faqar
evanġeliku, u meta ma fittixniex l-ewwel is-Saltna u l-ġustizzja
tagħha. R/.
1: Nitolbuk
maħfra għal dawk il-mumenti fejn il-ħajja taċ-ċelibat
tagħna ma kienetx sinjal ta’ paternità. R/.
2: Nitolbuk
maħfra ta’ meta ma konniex grati għad-don tal-ħajja u
tal-ministeru, u ta’ meta ma lqajniex kull ħaġa bħala
opportunità ta’ grazzja. R/.
Kolletta
Nitolbu.
O Alla, li għallimt lill-ministri
tal-Knisja tiegħek
biex ifittxu mhux li jkunu moqdija,
iżda li jaqdu lill-aħwa kollha;
imliehom bil-ħeġġa
fil-ħidma tagħhom,
għinnhom jagħtu s-servizz
tagħhom b’qalb ħelwa,
u żommhom sħaħ
sal-aħħar fit-talb.
B’Ibnek Ġesù Kristu Sidna li hu Alla
U miegħek jgħix u jsaltan
flimkien mal-Ispirtu s-Santu,
għal dejjem ta’ dejjem.
Ammen.
Qari
mill-Ittra ta’ San Pawl Appostlu lill-Efesin (2,
1-10)
Ħuti, Intom li kontu mejtin bi
dnubietkom u ħtijietkom, li fihom darba mxejtu skont ix-xejra ta’ din
id-dinja, skont il-kap tas-saltna tal-ajru, tal-ispirtu li bħalissa
qiegħed jaħdem fost dawk li ma jisimgħux… Aħna wkoll
għexna darba mgħarrqa fil-passjonijiet ta’ ġisimna; konna
nagħmlu l-opri tar-rieda tal-ġisem u fehmietna; konna minna nfusna
wlied il-korla, bħall-bqija tal-bnedmin. Imma Alla, għani
fil-ħniena tiegħu, bis-saħħa tal-imħabba kbira li biha
ħabbna, meta aħna konna mejta minħabba fi dnubietna, tana
ħajja ġdida flimkien ma’ Kristu - bi grazzja intom salvi. Qajjimna
miegħu u qegħedna fis-smewwiet ma’ Kristu Ġesù, biex juri
fiż-żminijiet li ġejjin l-għana bla qjies tal-grazzja
tiegħu bit-tjieba li wera magħna fi Kristu Ġesù. Intom salvi
bil-grazzja, permezz tal-fidi; u dan mhux bis-saħħa tagħkom,
imma b’don ta’ Alla; mhux bl-opri, biex ħadd ma jiftaħar. Aħna
ħolqien tiegħu, maħluqa fi Kristu Ġesù biex nagħmlu
l-opri tajba li Alla ħejjielna minn qabel li għandna nagħmlu.
Il-Kelma tal-Mulej
Irroddu
ħajr lil Alla
Salm
Responsorjali Salm 90
Inwieġbu flimkien: Il-fedeltà tal-Mulej tibqa’ għal dejjem.
Mulej, int kont għalina
kenn minn nisel għal nisel.
Int traġġa’ l-bnedmin lejn
it-trab,
u tgħidilhom: “Erġgħu
lura, intom bnedmin!” R/.
Elf sena huma għalik
bħal jum ta’ lbieraħ li
għadda,
jew bħal sahra tal-lejl. R/.
Int taħsadhom, u jsiru bħal
ħolma.
Huma bħall-ħaxix li jinbet
filgħodu;
filgħodu jwarrad u jħaddar,
filgħaxija jidbiel u jinxef.
Għalhekk għallimna ngħoddu
jiem ħajjitna,
sabiex aħna nimxu bil-għaqal.
R/.
Dur lejna, Mulej! Kemm se ddum?
Ħenn għall-qaddejja
tiegħek.
Imliena kmieni bit-tjieba tiegħek,
biex nifirħu u nithennew
ħajjitna kollha. R/.
Ħa tkun fuqna l-grazzja ta’ Alla
Sidna!
Wettqilna inti x-xogħol ta’ jdejna,
wettaq, iva, xogħol idejna. R/.
Kant
għall-Evanġelju
Hallelujah. Hallelujah.
Kunu lesti intom ukoll, għax qatt ma
tistgħu tobsru s-siegħa li fiha jiġi Bin il-bniedem.
Hallelujah.
Qari
mill-Evanġelju skont San Luqa (12, 32-48)
F’dak iż-żmien Ġesù qal
lid-dixxipli: “Le, merħla
ċkejkna, tibżgħu xejn, għax Missierkom għoġbu
jagħtikom is-Saltna! Bigħu ġidkom u agħtuh karità u fittxu
għalikom infuskom boroż li ma jitmermrux, teżor li ma jiġix
nieqes fis-sema, fejn la l-ħalliel ma jersaq u lanqas il-kamla ma
tħassar. Għax fejn hemm it-teżor tagħkom, hemm tinsab
qalbkom ukoll.”
“Żommu ġenbejkom
imħażżma u l-imsiebaħ tagħkom mixgħula; kunu
bħal nies jistennew lil sidhom lura mill-festa tat-tieġ, biex malli
jiġi u jħabbat jiftħulu minnufih. Henjin dawk il-qaddejja li
meta jiġi sidhom isibhom jishru! Tassew ngħidilkom, li hu
jitħażżem, iqegħedhom madwar il-mejda, u jgħaddi
quddiemhom iservihom. U kieku kellu jiġi fil-ħin tat-tieni sahra, jew
tat-tielet, u jsibhom xorta waħda fuq dmirhom, henjin huma! Kunu afu dan,
li kieku sid id-dar kellu jkun jaf xħin ikun ġej il-ħalliel ma
kienx se jħalli min jinfidlu l-ħajt ta’ daru. Mela kunu lesti intom ukoll, għax qatt
ma tistgħu tobsru s-siegħa li fiha jiġi Bin il-bniedem.”
“Mulej,” qallu Pietru, “din il-parabbola
qiegħed tgħidha għalina, jew għal kulħadd?”
Wieġbu l-Mulej: “Int min tgħid li hu l-qaddej fidil u għaqli?
Min hu dak li s-sid iqiegħdu fuq in-nies tad-dar biex jagħtihom
sehemhom f’ħin l-ikel? Hieni dak il-qaddej li sidu jiġi u jsibu
jagħmel dan. Ngħidilkom is-sewwa, li jafdalu ġidu kollu f’idejh.
Imma nagħmlu mod li dak il-qaddej jibda jgħid f’qalbu, ‘Sidi
jiddawwar ma jiġi,’ u jaqbad isawwat lill-qaddejja kollha, irġiel u
nisa, u jiekol u jagħtiha għax-xorb u s-sokor; sid dak il-qaddej
jasal f’jum meta ma jkunx jistennieh, f’siegħa li fiha jieħdu
għal għarrieda, u jagħmlu bċejjeċ u jagħtih dak
li ħaqqhom in-nies li mhumiex fidili. U dak il-qaddej li jkun jaf xi jrid
sidu, u madankollu ma jħejjix jew ma jagħmilx li jrid sidu, swat kbir
jaqla’. Min imbagħad, bla ma jkun jaf xi jrid sidu, jagħmel xi
ħaġa li jkun ħaqqha s-swat, dan ftit jissawwat. Għax lil
min tawh ħafna, ifittxu li jieħdu ħafna mingħandu; u min
ħallewlu ħafna f’idejh, iżjed jippretendu mingħandu.
Il-Kelma tal-Mulej
It-tifħir
lilek, Kristu!
Ħin ta’ skiet
Talba
korali
Qarrej: O Alla ta’ dejjem u li tista’
kollox,
Bil-merti ta’ ibnek u permezz
tal-imħabba Tiegħek għalih,
Ikollok ħniena
mis-saċerdoti tal-Knisja Mqaddsa.
Minkejja d-dinjità
tal-uffiċċju tagħhom, huma dgħajfa bħal kulħadd.
Permezz tal-ħniena
tiegħek bla tarf,
kebbes f’qalbhom in-nar ta’
imħabbtek.
Għinnhom u tħallix li
s-saċerdoti tiegħek jiddgħajfu,
jew jitilfu l-vokazzjoni
tagħhom.
Flimkien:
O Ġesù, nitolbuk:
Ikollok ħniena mis-saċerdoti tal-Knisja tiegħek
li jaqduk bil-fedeltà,
li jmexxu l-merħla tiegħek u jagħtuk glorja.
Ikollok ħniena minn dawk li huma ppersegwitati,
fil-ħabs, abbandunati,
jew imkissrin bit-tbatija.
Ikollok ħniena mis-saċerdoti berdin
jew dawk li l-fidi tagħhom dgħajfa.
Ikollok ħniena mis-saċerdoti li ħallew
is-saċerdozju,
u minn dawk morda jew moribondi,
ikollok ħniena minn dawk li jinsabu fil-purgatorju.
Qarrej: Mulej Ġesù, nitolbuk
Isma’ t-talb tagħna,
Ikollok ħniena
mis-saċerdoti, għax huma tiegħek!
Dawwalhom,
saħħaħhom, u sabbarhom.
O Ġesù, nafdaw f’idejk
lis-saċerdoti tad-dinja kollha,
imma l-iżjed
speċjalment lil dawk li għammduna
u tawna s-Sagrament
tal-maħfra,
lil dawk li offrew għalina
s-Sagrifiċċju Qaddis tal-Quddiesa
u dawk kkonsagraw l-Ostja
Mqaddsa biex imantnu lil ruħna.
Flimkien:
Nafdaw f’idejk lis-saċerdoti:
dawk li għenuna meta konna fid-dubju,
dawk li ddittaw il-mogħdijiet tagħna,
dawk li mexxewna fl-isforzi tagħna,
dawk li sabbruna fit-tbatijiet tagħna.
Għalihom ilkoll, bi gratitudni,
nitolbu l-għajnuna tiegħek u l-ħniena
tiegħek.
Ammen.
(Talba miktuba minn Monsinjur Kiung, Isqof ta’ Shanghai, meta
kien fil-ħabs)
Minn
diskors ta’ San Ġwann XXIII lill-Prelati u s-Saċerdoti, 12 ta’ Marzu
1959
Is-saċerdot huwa l-ewwel u qabel
kollox bniedem ta’ Alla, “vir Dei”.
Hekk jarak il-poplu Nisrani u hekk jixtieqek il-Mulej. Għalhekk ipprova
fassal ħajtek fuq dawk il-ħsibijiet puri li din id-definizzjoni
tqanqal f’qalbek. Meta tgħid ‘bniedem ta’ Alla’, kull ħaġa li
mhix ta’ Alla hija eskluża mis-saċerdot. Is-Saċerdot veru hu dak
li bħal Abraham, jagħżel li jkun “parer bagnarum gentium”, jitlaq kollox u għal dejjem biex
isegwi l-leħen divin. Fil-fatt, intqal lilu: “Egredere de terra tua, de cognatione tua, et de domo patris tui et veni
in terram, quam monstrabo tibi” Fuq din l-art imwiegħda,
għas-saċerdot veru, jitgħolla s-salib. Hu ma jfittex xejn
ħlief lil Kristu, “et hunc
crucifixum”.
Alla li hu etern u li ma jidhirx, wera
lilu nnifsu f’Ġesù; u s-saċerdot irid ikollu għajnejh
imħarrġin biex jista’ jiskopri lill-“Mediator Dei et hominem” li juri t-triq lejn il-Missier. “Tanto tempore vobiscum sum et non
cognovistis me?... Qui videt me, videt et Patrem.” Jalla l-ħajja
tagħkom, permezz tal-ħeġġa ta’ mħabbitkom lejh, tkun
għalhekk mimlija bir-riħa tfuħ ta’ Kristu, li jmexxina lejn
il-Missier. Din hija l-bażi vera ta’ ħajja saċerdotali mimlija paċi
intima u xewqa għall-erwieħ. Għalhekk ngħidilkom: “Amor Christi et amor silentii”. Jalla
Ġesù Kristu jkun l-uniku ħabib u konsolatur tagħkom, fis-sahriet
quddiem it-Tabernaklu, jew fuq il-mejda tal-istudju, fil-ħsieb tal-fqar u
l-morda, fil-ministeru tal-predikazzjoni qaddisa. Fittxu lilu biss, billi
tħarsu lejn dak li hu uman fid-dawl Tiegħu, u biex tirbħu
ħafna erwieħ għalih. Ħudu fuqkom il-madmad ħelu u
t-toqol ħafif tiegħu, billi tipprattikaw il-virtujiet li għandha
tħaddan kull persuna fil-ħajja kkonsagrata: billi tiddedikaw
ruħkom għalih u għall-erwieħ, ħidma bla heda
għall-Knisja, billi tħaddmu l-14-il opra ta’ ħniena, permezz
tal-ubbidjenza fil-pront u sinċiera lejn l-Isqof, u b’rispett mimli
ħlewwa fil-ħwejjeġ qaddisa.
Lil Ġesù ma nsibuhx f’ħajja
mxerrda, anke jekk ikollna l-aktar raġunijiet qaddisa fil-ministeru
tagħna biex niġġustifikaw din it-tip ta’ ħajja. Huwa
għalhekk li rrakkomandajtilkom: “Amor
silentii”. Is-skiet iħares il-virtujiet kollha, speċjalment
il-kastità u l-karità; u huwa l-garanzija ta’ ħidma pastorali effettiva.
(...)
Nirrakkomandalkom imħabba kbira
oħra, li trid tibdel ħajjitkom: l-imħabba lejn l-erwieħ.
Naf sew li dan huwa l-ideal tagħkom, imma taħsbux li din it-twissija
hija żejda. Tajjeb wieħed jagħmel din il-konsiderazzjoni li
tnikket lir-rgħajja tal-erwieħ: għaliex, wara tant sforzi u
sagrifiċċji, wara li nkunu żrajna qatigħ, il-frott li
naħsdu ħafna drabi jkun daqshekk skars? Għaliex, minkejja li
nużaw il-mezzi kollha tal-appostolat, l-ulied “mejta” tal-Knisja ma
nqajmjuhomx, bħalma ġralu dak it-tifel li baqa’ mejjet u ma
ċċaqlaqx, anke wara l-azzjoni tal-qaddej tal-profeta Eliżew, li
dwaru titkellem il-liturġija tar-Randan tal-lum? (…) Xi drabi l-mirakli
spiritwali ma jseħħux għax l-intenzjoni ma tkunx dejjem safja;
forsi għax mhux dejjem infittxu biss il-ġid tal-erwieħ billi
nissagrifikaw ruħna għalihom; forsi għax niddependu wisq fuq
il-mezzi umani tagħna stess u għalhekk faċilment inkunu
distratti, mingħajr ma nkunu qed inserrħu fuq it-talb u
s-sagrifiċċju. Għaldaqstant l-imħabba vera
għall-erwieħ tfisser li naħdmu kontinwament fuq il-qdusija
tagħna. (…) Xi prova ikbar għandna bżonn li mhumiex
ir-riżorsi umani li jirbħu l-erwieħ, imma biss il-virtù ta’
Alla, li taħdem permezz ta’ mezzi mimlija ħlewwa tiegħu?
Skiet għal meditazzjoni
Talba
korali
MISSIER ta’ kull ħlejqa,
inti tajtna don tal-għaġeb
li hija l-ħajja
tagħna:
għamilna ġenerużi
biex inwieġbu għas-sejħa tiegħek
biex naqsmu ma’ ħutna
l-“ħobż” li rċevejna.
KRISTU ĠESÙ, ħuna,
Int għamilt lilek innifsek
il-ħobż tal-ħajja għalina,
ġedded il-miraklu
tat-tkattir tal-ħobż,
u agħmel li l-ħajja
tagħna tkun rigal
u ngħixuha b’radd ta’
ħajr għal dejjem.
SPIRTU QADDIS,
ħabib fidil
fil-vjaġġ tagħna,
għinna bil-qawwa ta’
mħabbtek
biex inħabbru u nagħtu
xhieda tas-sbuħija tal-ħajja bħala vokazzjoni.
TRINITÀ QADDISA,
Imħabba eterna u infinita,
għin lill-komunitajiet tagħna
biex jilqgħu
l-Evanġelju tal-Vokazzjoni,
biex jitolbu u jifirħu
bil-preżenza taż-żgħażagħ
li huma mexjin lejn
is-saċerdozju u l-ħajja kkonsagrata.
Ammen.
(Talba
għall-Vokazzjonijiet, Jum Dinji tal-Vokazzjonijiet, 2011)
Kant
Mill-ħajja
tal-Papa San Ġwanni XXIII
Ftit jiem qabel, kien diġà riesaq
lejn tmiem ħajtu, bi tweġiba għal ħafna li kienu talbuh
is-sigriet tas-saċerdozju tiegħu, il-Papa Ġwanni, XXIII qal:
“Is-sigriet tas-saċerdozju tiegħi jinsab fil-kurċifiss li taraw
quddiemi, faċċata tas-sodda tiegħi. Iħares lejja u jien
nitkellem miegħu.” Imbagħad żied: “Kelli l-grazzja kbira li
nitwieled f’familja nisranija modesta u fqira imma li tibża’ minn Alla, u
li rċevejt is-sejħa għas-saċerdozju. Minn mindu kont
żgħir ma kont naħseb f’xejn iżjed, ma kont nixtieq xejn
iżjed. Il-jiem tiegħi fuq din l-art jinsabu fi tmiemhom, imma Kristu
jibqa’ jgħix, il-Knisja tkompli. U x’kelma nista’ ngħidilkom u li
hija aktar xierqa, milli nħeġġiġkom biex qatt ma twarrbu
għajnejkom minn fuq is-Salib ta’ Ġesù...? Ħarsu lejn is-salib,
uliedi għeżież, fit-tbatijiet tagħkom!”
Kien hemm numru bla għadd ta’ nies
iħarsu ’l fuq lejn il-kamra fit-tielet sular tal-Palazz Appostoliku, fejn
kien qed imut Ġwanni XXIII, filwaqt li għajnejn il-Papa, iħarsu
fiss lejn il-Kurċifiss: “Din is-sodda hija artal, u l-artal
jeħtieġ sagrifiċċju: hawn jien. Jien lest. Noffri
ħajti għall-Knisja, għat-tkomplija al-Konċilju Ekumeniku,
għall-paċi fid-dinja, għall-għaqda ta’ bejn l-insara.
Is-sigriet tas-saċerdozju tiegħi jinsab fil-kurċifiss li xtaqt
inpoġġi quddiem sodda tiegħi, hu jħares lejja u jien nitkellem
miegħu... Dawk id-dirgħajn miftuħin beraħ qed jgħidu
li hu miet għal kulħadd;
ħadd ma hu mċaħħad mill-imħabba tiegħu,
mill-maħfra tiegħu...”
Dawn huma l-kliem ta’ bniedem li, anke
fl-aħħar ħin ta’ ħajtu, żamm id-drawwa li jitkellem
ma’ Ġesù, novissima verba ta’
saċerdot, Isqof, u Papa, li dejjem għex fil-preżenza ta’ Alla li
jiġbidna lejh, li ħabb lill-familja tiegħu secundum sanguinem, iżda li kien jaf sew li hu jappartjeni
għal familja waħda u kbira daqs id-dinja.
Skiet għal meditazzjoni
Adorazzjoni tas-salib bħala att penitenzjali
(jixbaħ lil dak li jsir fil-Ġimgħa l-Kbira)
Qassis
jew djaknu, akkumpanjat minn żewġ -xemgħat mixgħula,
iġorr is-Salib sal-artal. Imbagħad hu, jew oħrajn iżommu
s-Salib. Imbagħad il-miġemgħa tersaq f’purċissjoni, isir
sinjal ta' qima b’inkin jew b’bewsa. Sadanittant jistgħu jitkantaw
innijiet penitenzjali xierqa.
Omelija
Wara ħin ta’ skiet kulħadd iqum bilwieqfa
Talba
korali:
Alla tiegħi, tinsinix meta
jien ninsa lilek.
Titlaqnix, Mulej, meta jien
nitilqek.
Titbiegħedx minni, meta
jien nitbiegħed minnek.
Sejjaħli meta
nitbiegħed minnek,
Iġbidni lejk jekk jekk jien
niqaflek, qajjimni jekk naqa’.
Agħtini, Mulej, Alla
tiegħi,
qalb li toqgħod għassa
u li ma tħalli ebda
ħsieb fieragħ ibiegħdni minnek.
Għatini , Mulej, qalb
sinċiera
ħalli l-ebda intenzjoni
ħażina ma tqarraq bija.
Qawwili qalbi Mulej, ħalli
negħleb kull diffikultà.
Għatini, Mulej, qalb
ħielsa
li l-ebda passjoni tad-dinja ma
tista’ tegħlibha!
Għatini, nitolbok,
rieda biex infittxek,
għerf biex insibek,
ħajja biex
nogħġbok,
perseveranza biex nistenniek
b’fiduċja
u kunfidenza biex nasal biex
nippossedik.
Ammen
(San Tumas ta’ Akwinu)
Barka
Ħa tkun, Missier, il-barka
tiegħek, fuq dawn uliedek, pellegrini tat-tama,
u jalla l-grazzja ta’ l-Ispirtu s-Santu
tkebbes lil qalbhom
imsoffija bl-għemejjel ta’ indiema,
ħalli jinbidlu f’offerta li
togħġbok,
u fil-ferħ ta’ ħajja
ġdida, jalla jkunu xbieha ta’ Kristu Ibnek.
għat-tifħir tal-glorja
tiegħek.
Ammen.
U fuqkom ilkoll li tinsabu hawn
preżenti, tinżel il-barka ta’ Alla li jista’ kollox,
Il-Missier, u Iben, u Spirtu s-Santu.
Ammen.
Kunu ħabbâra
tal-ħniena,
ħaddiema tal-ġustizzja,
ħmira tal-fraternità.
Morru fil-paċi ta’ Kristu.
Irroddu
ħajr lil Alla.
Innu tal-għeluq
4. INKUNU XHIEDA
Kant
Daħla
Fl-isem tal-Missier u tal-Iben u tal-Ispirtu s-Santu.
Ammen
Ejjew niftħu qalbna għat-tama li ma tqarraqx bina.
Missier li inti fis-smewwiet,
il-fidi li inti tajtna
f’Ibnek Ġesù Kristu, ħuna,
u l-fjamma tal-imħabba
imkebbsa fi qlubna mill-Ispirtu s-Santu,
jerġgħu jqajmu fina t-tama ħienja
tal-miġja tas-Saltna tiegħek.
Jalla l-grazzja tiegħek tibdilna
f’ħaddiema bieżlin li jiżirgħu ż-żerriegħa tal-Evanġelju.
Jalla din iż-żerriegħa tkun il-ħmira li tibdel minn ġewwa lill-umanità u lill-univers,
fl-istennija ħienja ta’ smewwiet ġodda u art ġdida,
meta tidher il-glorja tiegħek għal dejjem,
wara li jkunu megħluba s-setgħat tal-Ħażen.
Jalla l-grazzja ta’ dan il-Ġublew
tagħmel minna Pellegrini tat-Tama,
imxennqin għall-ġid tas-sema.
Jalla din il-grazzja xxerred fuq id-dinja kollha
il-ferħ u s-sliem tal-Feddej tagħna.
Lilek O Alla, int l-Imbierek għal dejjem,
tifħir u glorja għal dejjem.
Ammen.
Għeżież ħuti,
Filwaqt li nimxu lejn il-ġublew li
jmiss bħala pellegrini tat-tama, ejjew nimxu fuq il-passi tal-qaddisin
appostli Pietru u Pawlu.
Fil-fraternità saċerdotali, nitolbu
maħfra lill-Mulej flimkien, sabiex ikollu ħniena minna u
jagħtina saħħa ġdida biex inkunu “dejjem lesti li
nagħtu raġuni tat-tama li hemm fina” (ara 1 Pt 3, 8-17)
Ħin
qasir ta’ skiet
Mulej, li fl-ilma u fl-Ispirtu inti
ġeddidt fina x-xbieha tiegħek. Kýrie, eléison.
Kýrie, eléison.
Kristu, li permezz tal-Ispirtu
tiegħek, inti tajtna qalb ġdida, Christe, eléison.
Christe, eléison.
Mulej, li fl-Ispirtu s-Santu
tgħaqqadna f’ġisem wieħed, Kýrie, eléison.
Kýrie, eléison.
Iħenn għalina Alla li jista’
kollox, jaħfrilna dnubietna u jwassalna fil-ħajja ta’ dejjem.
Ammen.
Kolletta
Nitolbu.
Missier l-aktar ħanin,
fil-ħniena tiegħek isma’ t-talb tagħna u ddawwal qlubna
bil-grazzja tal-Ispirtu s-Santu, biex b’mod denju niċċelebraw
il-misteri tiegħek, naqdu fedelment lill-Knisja tiegħek u
jistħoqqilna li nħobbuk għal dejjem. B’Ibnek Ġesù Kristu
Sidna, li hu Alla, u li miegħek igħix u jsaltan flimkien mal-Ispirtu
s-Santu, għal dejjem ta’ dejjem.
Ammen.
Qari mill-Ittra ta’ San Pawl Appostlu
lill-Galatin (1,11-20)
Dan ngħarrafkom, l-aħwa:
l-Evanġelju li ħabbartilkom jien mhuwiex Evanġelju tal-bnedmin.
Għaliex jiena mhux mingħand bniedem irċevejtu jew
tgħallimtu, imma kien irrivelat lili minn Ġesù Kristu.
Intom smajtu bl-imġiba tiegħi
meta kont għadni fir-reliġjon Lhudija, kif kont nippersegwita
bis-sħiħ il-Knisja ta’ Alla u nfittex li nħarbatha; u kemm kont
’il quddiem fir-reliġjon Lhudija fost il-poplu tiegħi aktar minn
sħabi kollha ta’ mpari, imġennen kif kont għat-tradizzjonijiet
ta’ missirijieti. Imma meta Dak li għażilni sa minn ġuf ommi, u
li sejjaħli permezz tal-grazzja tiegħu, għoġbu jirrivelali
lil Ibnu biex inħabbru fost il-ġnus, minnufih, bla ma qgħadt
infittex li nieħu parir mingħand bnedmin tad-demm u l-laħam, bla
ma tlajt Ġerusalemm għand dawk li kienu appostli qabli, jiena mort
fl-Għarabja, u mbagħad erġajt lura lejn Damasku.
Imbagħad, tliet snin wara, tlajt
Ġerusalemm inżur lil Kefa, u bqajt miegħu ħmistax-il
ġurnata; mill-appostli l-oħra ma rajt lil ħadd; iżda rajt
lil Ġakbu, ħu l-Mulej. (F’dan li qiegħed niktbilkom, nixhed
quddiem Alla, m’iniex nigdeb).
Il-Kelma tal-Mulej
Irroddu ħajr lil Alla
Salm Responsorjali (Salm 37)
Inwieġbu flimkien: Minn fomm
il-ġust joħroġ kliem il-għerf
Afda fil-Mulej, u agħmel it-tajjeb;
għammar fl-art, u tgħix
b’moħħok mistrieħ;
qiegħed fil-Mulej l-għaxqa
tiegħek,
u jagħtik dak li tixtieq
qalbek. R/.
Erħi fil-Mulej it-triq tiegħek,
afda fih, u jagħmel hu.
Hu juri bħad-dawl is-sewwa
tiegħek,
u d-dritt tiegħek bħal
nofsinhar. R/.
Minn fomm il-ġust joħroġ
kliem l-għerf,
u lsienu jgħid is-sewwa.
Il-liġi ta’ Alla tiegħu
għal qalbu,
ma jitfixkilx fil-mixi tiegħu. R/.
Qari mit-Tieni Ittra ta’ San Pietru
Appostlu (1,16-19)
Aħna ma konniex qegħdin nibnu
fuq ħrejjef maħluqa minn moħħna meta għarrafniekom
dwar il-qawwa ta’ Sidna Ġesù Kristu u dwar il-miġja tiegħu.
Rajna b’għajnejna aħna stess il-kobor tiegħu meta hu ħa
mingħand Alla l-Missier ġieħ u sebħ, u leħen mit-Tron
Glorjuż instama’ jgħid għalih: “Dan hu Ibni,
l-għażiż tiegħi, li bih jiena nitgħaxxaq.” Aħna
smajnieh dan il-leħen ġej mis-sema meta konna miegħu fuq
il-muntanja mqaddsa. U hekk għandna mwettqa aħjar il-kelma
tal-profeti. Tagħmlu sewwa jekk toqogħdu attenti għaliha; hi
bħal fanal li jagħti d-dawl f’post mudlam, sa ma jibda jbexbex il-jum
u f’qalbkom titla’ l-kewkba ta’ filgħodu.
Il-Kelma tal-Mulej
Irroddu ħajr lil Alla
Kant għall-Evanġelju
Hallelujah, hallelujah
Ibqgħu fl-imħabba tiegħi,
jgħid il-Mulej.
Min jibqa’ fija u jiena fih, dan
jagħmel ħafna frott.
Hallelujah
Qari mill-Evanġelju skont San
Ġwann (21,15-19)
Wara li kielu xi ħaġa,
Ġesù qal lil Xmun Pietru: “Xmun bin Ġwanni, tħobbni int aktar
minn dawn?” “Iva, Mulej,” wieġbu, “int taf li nħobbok.” Qallu:
“Irgħa l-ħrief tiegħi.” Staqsieh għat-tieni darba: “Xmun
bin Ġwanni, tħobbni int?” “Iva, Mulej,” wieġbu, “int taf li
nħobbok.” Qallu: “Irgħa n-nagħaġ tiegħi.”
Għat-tielet darba staqsieh: “Xmun bin Ġwanni, tħobbni?” Pietru
ħass għafsa ta’ qalb għax staqsieh għat-tielet darba,
‘Tħobbni?’ u qallu: “Mulej, int taf kollox, inti taf li nħobbok.”
Qallu Ġesù: “Irgħa n-nagħaġ tiegħi. Tassew tassew
ngħidlek, meta kont żagħżugħ, kont
titħażżem waħdek u tmur fejn trid; imma meta tixjieħ,
int tiftaħ idejk u ħaddieħor iħażżmek u jieħdok
fejn ma tkunx trid!” Dan qalu biex ifisser b’liema mewta kien sejjer
jagħti glorja lil Alla. Imbagħad Ġesù ssokta jgħidlu: “Ejja
warajja.”
Il-Kelma tal-Mulej
Tifħir lilek, Kristu!
Ftit
ħin ta’ skiet
Talba korali
Spirtu
tal-Mulej,
Inti
d-don ta’ dak li qam mill-mewt lill-appostli fil-kamra ta’ fuq,
imla
bil-ħeġġa lis-saċerdoti tiegħek.
Imla
s-solitudni tagħhom bi ħbiberiji meqjusa.
Għamel
li jħobbu d-dinja,
u
li jkollhom ħila juru ħniena għad-dgħufijiet kollha
tal-ħajja.
Farraġhom
bil-gratitudni tan-nies u biż-żejt tal-komunjoni fraterna.
Saħħaħhom
fil-għeja,
sabiex
ma jsibu ebda rifuġju fl-għeja tagħhom
ħlief
fuq spallet l-Imgħallem tagħhom.
Eħlishom
mill-biża’ tal-falliment.
Jalla
minn għejnejhom tleħħ is-sinċerità.
Jalla
minn qalbom joħroġ il-kuraġġ imħallat mat-tjubija.
Jalla
minn idejhom toħroġ id-dilka fuq kull ħaġa li jmissu.
Jalla
ġisimhom jiddi bil-ferħ.
Libbishom
bi lbies ta’ festa. U
ħażżimhom bi ħżiem ta’ dawl.
Sabiex
l-għarus ma jiddawwarx ma jiġi - għalihom u għal
kulħadd.
Ammen
(L-Isqof
Tonino Bello)
Innu
Minn Udjenza Ġenerali tal-Papa
Franġisku (5
April 2017)
Nifhmu li din it-tama ma nistgħux
tant nagħtu raġuni tagħha fuq livell teoriku, bil-kliem, imma
fuq kollox bix-xhieda ta’ ħajjitna, u dan kemm fi ħdan il-komunità
Nisranija, u kemm barra minnha. Jekk Kristu hu ħaj u jgħammar fina,
fil-qalb tagħna, allura jeħtieġ anki nħalluh jidher, ma naħbuhx,
u jaħdem fina. Dan ifisser li l-Mulej Ġesù għandu jsir dejjem
iżjed il-mudell tagħna: mudell ta’ ħajja u li aħna
għandna nitgħallmu nġibu ruħna kif ġab ruħu hu.
Nagħmlu dak li kien jagħmel Ġesù. It-tama li tgħammar fina,
għalhekk, ma tistax tibqa’ moħbija fina, fil-qalb tagħna: tkun
tama dgħajfa, li m’għandhiex il-kuraġġ toħroġ
barra u turi ruħha; imma t-tama tagħna, kif joħroġ mis-Salm
33 ikkwotat minn Pietru, bil-fors trid toħroġ barra, tieħu
l-għamla bnina u li ma tistax tifxilha tal-ħlewwa, tar-rispett,
tat-tjieba mal-proxxmu, u tasal saħansitra biex taħfer lil min
jagħmlilna d-deni. Persuna bla tama ma jirnexxilhiex taħfer, ma
jirnexxilhiex tagħti l-faraġ tal-maħfra u ssib il-faraġ li
taħfer. Iva, għax hekk għamel Ġesù, u hekk jibqa’
jagħmel permezz ta’ dawk li jagħmlulu wisa’ fil-qalb tagħhom u
fil-ħajja tagħhom, għax jafu li l-ħażen ma tistax
tirbħu bil-ħażen, imma bl-umiltà, il-ħniena u t-tjieba.
Meta nbatu għal xi ħaġa
tajba, inkunu f’komunjoni mal-Mulej, li aċċetta li jbati u li
jiġi msammar ma’ salib għas-salvazzjoni tagħna. Allura meta
aħna wkoll, fl-iktar sitwazzjonijiet ċkejknin jew kbar tal-ħajja
tagħna, naċċettaw li nbatu għat-tajjeb, inkunu qisna qed
inqassmu madwarna żerriegħa tal-qawmien, żerriegħa
tal-ħajja, u fid-dalma nagħmlu jiddi d-dawl tal-Għid. Hija t-tħabbira tal-imħabba ta’
Alla, imħabba bla qies, li ma tispiċċax, li qatt ma tonqos u li
hi l-bażi vera tat-tama tagħna.
Talba korali
Spirtu
s-Santu,
nar
jaqbad bid-dawl u bis-sħana,
Għatina
l-ħeġġa li neħtieġu
biex ikollna intimità profonda mal-Mulej,
biex
nibqgħu fl-imħabba tiegħu.
Bħad-dixxipli
ta’ Ġesù
li
qasmu bejniethom l-aħbar ferrieħa tal-laqgħa tagħhom
miegħu,
għati
lil kull wieħed minna dik it-trasparenza tal-qalb
biex
inkunu nistgħu nirrakkuntaw, bi gratitudni u bi stagħġib,
dak
kollu li nafu dwaru, u dak kollu li għexna.
Jalla
x-xhieda umli tagħna,
immarkata
bl-għażla tas-salib
u
mdawla mill-ferħ tal-Għid,
tkun
sinjal ta’ frott u opportunità prezzjuża,
biex
kulħadd jirrifletti fuq il-vokazzjoni tiegħu
b'sempliċità,
fiduċja u disponibbiltà sħiħa.
Verġni
Marija, Omm il-Knisja, ħares bil-ħlewwa tiegħek
kull
xitla żgħira ta’ vokazzjoni;
jalla
tikber u ssir siġra kbira,
mimlija
frott għall-ġid tal-Knisja u tal-umanità kollha.
Ammen.
(Talba
għall-vokazzjonijiet, Jum Dinji tal-Vokazzjonijiet 2010)
Kant
Il-Kurat ta’ Ars bħala mudell
għas-saċerdoti. Minn diskors tal-Arċisqof ta’ Milan, Mons
Giovanni Battista Montini (San Pawlu VI)
Meta tiġi biex titkellem dwar xi
Qaddis dejjem hi xi ħaġa diffiċli, jekk ma tridx
sempliċiment tagħmel rakkont storiku, li huwa relattivament
faċli u, fil-każ tagħna, ikun pjuttost sempliċi wkoll.
Il-ħajja ta’ Giovanni Maria Vianney ma fihiex la kwadri kbar u lanqas
drammi kbar... Imma l-akbar diffikultà, jidhirli, hija fil-fatt li dan
il-Qaddis qed jiġi propost lilna f’aspett doppju: kemm bħala
protettur tagħna, tagħna s-saċerdoti u kif ukoll bħala
mudell, jiġifieri li għandna nkunu kapaċi nimitawh. U jekk
naċċettawh daqshekk bil-qalb bħala protettur u nħossuna
mfarrġa minn figura daqshekk ħelwa, daqshekk ġentili, daqshekk
umli, daqshekk attent, daqshekk jifhimna kif kien hu fl-aħħar seklu,
li jkollna lilu bħala protettur tagħna, li jkollna lilu biex
jidħol għalina quddiem il-Mulej, tidher xi ħaġa
faċli. Imma meta niġi biex
ngħid: irrid infassal ħajti fuqu, irrid li ħajti tkun tixbaħ
lil tiegħu, allura l-affarijiet hawnhekk isiru iżjed diffiċli,
għallinqas għalija.
L-isforz,
l-attentat li nersqu eqreb lejn dan il-qaddis, joħloq problema
għalina: dik li nagħrblu lilna nfusna jekk il-kuxjenza
saċerdotali tagħna tixbaħx lil dik li kellu l-Kurat ta’ Ars
f’ħajtu u fid-dinjità saċerdotali tiegħu. Għandna l-istess
ħsibijiet? Naħsbu bl-istess mod? Kif naraw lilna nfusna? U kif kien
jara lilu nnifsu l-Kurat d’Ars? Hemm differenza?
Ikolli ngħid li fortunatament il-mod
kif naraw lilna nfusna u kif kien jara lilu nnifsu l-Kurat t’Ars parzjalment
jaqblu. U dik hija waħda mill-isbaħ affarijiet li nistgħu
ngħidu dwar il-ħajja ekkleżjastika fi żmienna; dan
il-mudell ta’ saċerdozju diġà ħadem fil-Knisja ta’ Alla, kien
propost bħala mudell u dan ifisser li għandna nagħmluh
tagħna u naċċettawh b’konsolazzjoni u kuraġġ. Imma
l-fatt hu li rridu nnaqqsu d-distanza bejn il-mudell u r-realtà tagħna
stess u nippruvaw nagħmlu tagħna, kemm jista’ jkun,
il-konsiderazzjoni li l-Kurat ta’ Ars kellu tiegħu nnifsu. Jekk nibdew
minn hemm, niksbu xi ħaġa.
Nistgħu naraw, mill-ewwel,
żewġ punti ovvji ħafna: l-ewwel punt mhux xi ħaġa li
hi ta’ San Ġwann Marija Vianney biss, imma ngħid li hi tal-Qaddisin
kollha... U din hija l-umiltà straordinarja. Il-Qaddisin jintagħrfu minn
dan is-sens tax-xejn tagħhom stess, dan is-sens ta’ sproporzjon bejn Alla
u Kristu li huma jaduraw u jaqdu, u dak li huma huma. Dan is-sens ta’
sproporzjon tidher ċara fl-iktar ħlejqa qaddisa, il-Madonna.
Fil-għanja tal-Magnificat, bħalma hi tiċċelebra l-kobor ta’
Alla, fih innifsu u f’ħajjitha, tgħid ukoll: ‘fecit mihi magna qui
potens est’ – il-Mulej għamel miegħi ħwejjeġ kbar
għax ħares lejn iċ-ċokon tal-qaddejja tiegħu,
l-umiltà.
U allura, nistgħu ngħidu li San
Ġwann Marija Vianney għandu umiltà ma taqta’ xejn madwaru. Xi kultant
dawn l-istqarrijiet ta’ umiltà ifixkluna, għax għalina jidhru
esaġerati. Imma rridu nifhmuhom. Mhumiex artifiċjali, jew biex
jiġbdu l-attenzjoni fuqhom, lanqas huma biex jiddefendu ruħhom kontra
t-tifħir li n-nies jagħtu lil dawk li juru li huma virtużi.
Il-Qaddisin veri għandhom dan is-sens tal-vojt tagħhom stess, u
jgħixuh, iħabbruh, jistqarruh, u b’hekk, loġikament,
jaċċettaw il-konsegwenzi jekk xi ħadd jiddisprezzahom. Jekk xi
ħadd jeħodhom bis-serjetà, iħossu bħallikieku li
għandhom jirringrazzjaw lil dik il-persuna. Hekk huma magħmulin!
Ħa naqralkom sentenza jew tnejn li
jistgħu jenfasizzaw dan il-mod ta’ kif kien jara l-affarijiet u dan
is-sens li kellu tiegħu nnifsu dan il-Qaddis. Meta lejn l-aħħar
ta’ ħajtu tawh saċerdot biex jgħinu, bħala assistent, kien
jgħid lil dak l-assistent: “O! meta inti tkun hawn, l-affarijiet isiru,
imma meta nkun waħdi, jien ma niswa xejn. Jien bħal ħafna
żerijiet li m’għandhom l-ebda valur ħlief meta magħhom ikun
hemm numri oħra.” U mbagħad, bi frażi li tidher mill-isbaħ
għalija – anke mil-lat letterarju
- esklama f’okkażjoni waħda:
“Oh! Jien għadni ma għextx ġurnata sħiħa.” Tant kien iħoss ix-xejn tiegħu li
qal li l-ebda ġurnata f’ħajtu ma kienet kif kellha tkun! U meta
n-nies kienu jinnutawh jew jonorawh, kien jiddieħaq bis-sinjali ta’ unur
li kienu juruh, u kien jgħid bejnu u bejn ruħu: “Tassew li jien nuri
wiċċ b’ieħor, għax jien inqarraq bin-nies u nurihom dak li
minix.”
Hemm qisu
sens ta’ konflitt ġenwin fil-kuxjenza ta’ dan il-qassis, sens
tal-inadegwatezza tiegħu, tax-xejn profond tiegħu. U madankollu,
fl-istess ħin, flimkien ma’ din l-umiltà profonda, huwa joħroġ
minn ġol-fond ta’ dan l-abbiss, li rnexxielu jħaffer għalih
innifsu, u minn hemm joħroġ sens qawwi tad-dinjità tiegħu
nnifsu. Irridu nisimgħu l-kliem ta’ dan il-Qaddis, bħal ta’
ħafna oħrajn, imma hawnhekk insibu fis-sempliċità tal-mod kif
jesprimi ruħu, onestà li fl-istess ħin tikkonvinċik u
tħawdek – dak is-sens tad-dinjità kbira tas-saċerdozju. Kif tafu,
il-letteratura kontemporanja titkellem fuq dawn iż-żewġ
elementi, l-umiltà tas-saċerdot u s-sens tad-dinjità tiegħu u
l-awtorità tiegħu, u b’hekk tagħmel lill-bniedem fqir li qed
iġorr ġo fih xi ħaġa kbira immens, ta’ dinjità kbira. (...)
Nitgħallmu l-lezzjoni li jgħallimna l-Kurat d’Ars b’din
il-psikoloġija doppja tiegħu, irridu nikkoreġu l-mentalità
tagħna u nippruvaw nagħmluha kif irid Kristu, għax
il-predikazzjoni ta’ dan il-Qaddis mhix differenti minn dak li ppriedka
Kristu; li qal li d-dinjità tagħna
hija kbira, li d-dritt tagħna qiegħed hemm, bla dubju. Imma x’inhu
dan kollu? Għaliex aħna Saċerdoti?
Aħna Saċerdoti biex naqdu;
id-dedikazzjoni tagħna hija funzjonali: qui praecessor est, sit sicut
ministrator; min hu l-ewwel għandu jkun l-aħħar, min hu
l-ewwel għandu jaqdi lill-oħrajn. Aħna neżistu
għall-oħrajn, u mhux għalina nfusna u jekk verament irridu li
fina jkun hemm l-idea li Kristu tana tas-saċerdot u li l-Kurat t’Ars
jurina, irridu ninsistu ħafna fuq
dan il-punt . U naraw, għeżież ħuti, kif aħna
kandidati għal ħwejjeġ tal-għaġeb, proprju għax għandna
din id-dinjità sublimi.
Għandna d-dinjità li nifdu d-dinja,
imma l-fidwa trid issir permzz tas-salib. Irridu nifdu lill-oħrajn
bit-tbatija tagħna, bħal Kristu, li għalkemm ma kellu ebda dnub,
kif jgħid San Pawl, sar dnub għalina. Jiġifieri ħa fuqu
l-ħażen kollu tal-bniedem biex ipatti għal dan
il-ħażin u jħassru, u dan swielu l-mewt tas-salib. Jekk irridu
nkunu Qassisin, jiġifieri jekk irridu nkunu l-mexxejja, u ta’ eżempju
għall-oħrajn, irridu nirċievu fuq spallejna dan il-pondus
kbir ta’ tpattija għall-oħrajn. “O! Li kieku kont naf” – darba qal
il-qaddis – “xi jfisser li tkun saċerdot, forsi kont nibża’
nirċievi din il-grazzja mingħand il-Mulej”. Huwa jħoss
ir-responsabbiltà bħalma jħossu ftit oħrajn. Iħossu
responsabbli li jpatti għad-dnubiet ta’ ħaddieħor. Jagħmel
penitenza minflok il-penitenti tiegħu. Iħossu mgħaffeġ
mid-dnubiet tad-dinja ta’ madwaru u jħoss li jrid isir vittma f’din
is-sitwazzjoni.
Is-Saċerdot huwa
fiċ-ċentru ta’ dan il-konfront bejn it-tajjeb u l-ħażin,
bejn il-grazzja u d-dnub, bejn ix-xitan u Alla. U dan il-konfront, nafu sew,
huwa s-sagrifiċċju, huwa s-salib. Din hija l-kuxjenza saċerdotali
tal-Qaddis Kurat ta’ Ars li rridu nippruvaw nagħmlu tagħna.
Fit-18
ta’ Novembru 1959, fis-sena ċentinarja
mill-mewt
ta’ San Ġwann Marie Vianney,
l-Arċisqof
ta’ Milan għamel dan id-diskors dwar il-ħajja u l-ħidma
tal-Kurat ta’ Ars.
Ħin
qasir fis-skiet
Ċelebrant:
Jekk hu minnu li “lil kull wieħed
tingħata r-rivelazzjoni tal-Ispirtu għall-ġid ta’ kulħadd”
(ara 1 Kor 12,7), dan huwa minnu b’mod speċjali għas-saċerdot.
San Pawl fakkar lill-insara ta’ Korintu f’dawn it-termini: “Aħna
ambaxxaturi ta’ Kristu, bħallikieku Alla stess qed isejħilkom permezz
tagħna” (2 Kor 5, 20). Imma sfortunatament aħna wkoll inżommu
dan it-teżor kbir “f’ġarar tal-fuħħar” (2Kor 4,7).
Għalhekk inħossu ħtieġa qawwija li nkunu mgħejjunin
mill-fidili li aħna msejħin immexxu fit-triq tas-salvazzjoni. Ejjew
nitolbu għalina u għall-ministri kollha fil-Knisja:
Kulħadd:
Mulej,
nirringrazzjawk
talli
tajtna bniedem u mhux anġlu,
Biex
ikun ragħaj ta’ rwieħna.
Dawlu
bid-dawl tiegħek, għinu bil-grazzja tiegħek,
Wieżnu
bil-qawwa tiegħek.
Tħallix
li l-iżbalji jaqtgħulu qalbu jew li bis-suċċess tikbirlu
rasu.
Għamilna
doċli għall-kelma tiegħu:
Jalla
jkun ħabib, għalliem, u tabib għalina.
Għatih
ideat ċari, konkreti u prattiċi:
Għatih
is-saħħa biex jagħmilhom,
Għamel
li nkunu ġenerużi miegħu biex ngħinuh
Biex
hu jkun jista’ jmexxina bl-eżempju, bl-imħabba, bil-kelma u
bl-għemil
Jalla
naraw lilek fih, nirrispettawk u nħobbuk fih,
biex
ħadd ma jintilef minn dawk li fdajtlu f’idejh.
U
lilna salvana flimkien miegħu!
Ammen
(San
Pawl VI)
Omelija qasira
Adorazzjoni
Ewkaristika
Adoro
Te devote, latens Deitas,
Quae
sub his figuris vere latitas:
Tibi
se cor meum totum subiicit,
Quia
te contemplans totum deficit.
Visus,
tactus, gustus in te fallitur,
Sed
auditu solo tuto creditur.
Credo
quidquid dixit Dei Filius:
Nil
hoc verbo Veritatis verius.
In
cruce latebat sola Deitas,
At
hic latet simul et humanitas;
Ambo
tamen credens atque confitens,
Peto
quod petivit latro paenitens.
Plagas,
sicut Thomas, non intueor;
Deum
tamen meum te confiteor.
Fac
me tibi semper magis credere,
In
te spem habere, te diligere.
O
memoriale mortis Domini!
Panis
vivus, vitam praestans homini!
Praesta
meae menti de te vivere
Et
te illi semper dulce sapere.
Pie
pellicane, Iesu Domine,
Me
immundum munda tuo sanguine.
Cuius
una stilla salvum facere
Totum
mundum quit ab omni scelere.
Iesu,
quem velatum nunc aspicio,
Oro
fiat illud quod tam sitio;
Ut
te revelata cernens facie,
Visu
sim beatus tuae gloriae.
Amen.
Wara
ħin xieraq ta’ silenzju għat-talb personali
l-liturġija tkompli bl-offerta
tal-inċens:
Ċelebrant:
Quddiem il-Mulej, preżenti
fis-sagrament tal-Ewkaristija, għajn u quċċata tal-ħajja
tal-Knisja u ta’ kull ministeru mwettaq fi ħdanha, ejjew inroddu ħajr
lil Alla l-Missier talli għażilna u sejħilna biex nimxu wara
l-Imgħallem Divin. Ejjew nitolbu l-grazzja ta’ l-Ispirtu s-Santu sabiex
ħajjitna tkun xhieda vera, u li tidher quddiem kulħadd, li
togħla ‘l fuq lejn Alla bħala sagrifiċċju ħelu.
Kull
qassis jersaq lejn iċt-turibbli -ċensier li jkun jinsab quddiem
l-artal
u
jpoġġi fih ftit inċens waqt li l-assemblea tkanta innu adattat.
Talb tal-komunità
Ċelebrant:
Għeżież ħuti, quddiem
Kristu li kien l-ewwel li offra lilu nnifsu lill-Missier
f’sagrifiċċju jfuħ, ejjew noffru lill-Mulej it-talb u
l-intenzjonijiet tagħna, biex jagħmel minna xhieda kredibbli u
awtorevoli tal-Vanġelu.
Qarrej: Inwieġbu flimkien:
Għamel li qalbna tixbaħ lil tiegħek.
1. Mulej
Ġesù, Ragħaj it-Tajjeb, għati lill-Papa qalb attenta u
ġeneruża fid-dixxerniment tal-leħen tal-Ispirtu, biex
b’għerf u kuraġġ imexxi l-merħla tiegħek lejn
il-premju etern. Nitolbu.
2. Mulej
Ġesu’, Inti l-bieb tan-nagħaġ tal-merħla tiegħek,
għamel mill-Knisja tiegħek merħla vera li fiha kulħadd
iħossu milqugħ u maħbub, akkumpanjat u
mħeġġeġ, biex jimxi fit-toroq tal-Evanġelju. Nitolbu.
3 Mulej Ġesù, Inti l-Ħniena
tal-Missier, kabbar is-sens ta’ paternità fl-Isqfijiet tagħna biex ikunu
ħmira u strumenti ta’ fraternità fost il-ministri kollha tal-Knisja.
Nitolbu.
4.
Mulej
Ġesù, Qassis ta’ dejjem, għati l-ħeġġa fl-appostolat
lis-saċerdoti kollha sabiex dawn joffru, b’fedeltà u mħabba,
ħajjithom fuq l-artal, flimkien mas-sagrifiċċju tiegħek.
Nitolbu.
5.
Mulej
Ġesù, dawwal lill-familji bil-grazzja tal-Ispirtu biex, mimlijin bil-kelma
tiegħek, ikunu jafu jgħixu l-fidi li jistqarru, isiru art fertili
għat-tkabbir ta’ vokazzjonijiet ġodda u qaddisa
għas-saċerdozju u l-ħajja kkonsagrata. Nitolbu.
6.
Mulej
Ġesù, Ħobż maqsum għall-ħajja tad-dinja, sawwarna fuq
ix-xbieha tiegħek biex aħna, nkunu nistgħu ngħinu lil
ħafna persuni oħrajn fit-toroq tal-istorja: sabiex flimkien insiru
pellegrini ta’ tama lejn is-Saltna. Nitolbu.
7.
Mulej
Ġesù, Sultan tal-Ħolqien Kollu, ilqa’ f’Ġerusalemm tas-Sema lil
ħutna s-saċerdoti kollha li ddedikaw ħajjithom għax-xhieda
tal-Vanġelu u għatihom il-premju mwiegħed lill-qaddejja fidili.
Nitolbu.
Ċelebrant:
Isma’, Mulej, it-talb umli tagħna,
kollna tama fik. M’aħniex qed nitolbu għall-merti tagħna, imma
permezz tal-għana tal-imħabba tiegħek. Int li int Alla, u
tgħix u ssaltan ma’ Alla l-Missier, flimkien mal-Ispirtu s-Santu,
għal dejjem ta’ dejjem.
Ammen
Kulħadd
jinżel għarkobbtejh waqt li jitkanta:
Tantum
èrgo Sacramentum venerèmur cernui:
et
antìquum documentum novo cedat rìtui:
praèstet
fìdes supplemèntum
sènsuum
defectui.
Genitori,
Genitoque làus et jubilàtio,
salus,
honor, vìrtus quòque
sit
et benedictio: procedenti ab utroque
compar
sit laudatio.
Ċelebrant:
Nitolbu. O Missier, li f’dan is-Sagrament
tal-għaġeb ħallejtilna t-tifkira tal-passjoni tiegħek,
għatina nitolbuk li nqimu l-misteru tal-Ġisem u d-Demm tiegħek,
hekk li nħossu fina bla heda dak li rebbħitilna l-fidwa tiegħek.
Int li tgħix u ssaltan għal dejjem ta’ dejjem.
Ammen
Tingħata
l-Barka Sagramentali
Talb ta’ tifħir lil Alla
Ikun imbierek Alla.
Imbierek l-Isem Imqaddes tiegħu.
Imbierek Ġesú Kristu, veru Alla u veru
bniedem.
Imbierek l-Isem ta’ Ġesú .
Imbierka l-Qalb Imqaddsa tiegħu.
Imbierek id-Demm għażiż
tiegħu.
Imbierek Ġesú fis-Santissmu
Sagrament ta’ l-artal.
Imbierek l-Ispirtu s-Santu Paraklitu.
Imbierka l-kbira Omm Alla, Marija
Santissma.
Imbierka l-Imqaddsa u Immakulta
Kunċizzjoni tagħha.
Imbierek it-Tlugħ glorjuż
tagħha fis-sema.
Imbierek l-Isem ta’ Marija, Verġni u
Omm.
Imbierek San Ġużepp,
għarus kastissmu tagħha.
Imbierek Alla fl-anġli u l-qaddisin
kollha tiegħu.
Wara li l-Ewkaristija titpoġġa
lura fit-tabernaklu, ċ-ċelebrant igħid:
Hekk kif qed joqrob il-Ġublew
tas-Saċerdoti, ejjew nafdaw il-mixja ta’ ħajjitna f’idejn il-Madonna,
Omm il-Knisja u mudell ta’ kull vokazzjoni.
Taħt il-ħarsien tiegħek
nistkennu,
Omm qaddisa ta’ Alla:
la twarrabx minn quddiemek
it-talb li nagħmlulek fi
ħtiġijietna,
u eħlisna dejjem minn kull
tiġrib,
o Verġni glorjuża u mbierka.
Kunu xhieda tal-imħabba ta’ Kristu
fid-dinja.
Morru fil-paċi ta’ Kristu.
Irroddu ħajr lil Alla.
Kant
tal-għeluq