SOLENNITÀ TAT-TNISSIL BLA TEBGĦA TAL-VERĠNI MQADDSA MARIJA

ATT TA’ QIMA LILL-IMMAKULATA FI PIAZZA DI SPAGNA

TALBA TAL-QDUSIJA TIEGĦU FRANĠISKU

LIL MARIJA IMMAKULATA

Piazza di Spagna

Il-Ħadd 8 ta’ Diċembru 2024

Verġni Immakulata,

Omm, Omm Immakulata,

illum hija l-festa tiegħek u aħna ninġabru madwarek.

Il-fjuri li qed noffrulek iridu jesprimu

l-imħabba tagħna u l-gratitudni tagħna;

imma int tara u jogħġbuk fuq kollox dawk il-fjuri moħbija

li huma t-talb, it-tpespis, anki d-dmugħ,

speċjalment id-dmugħ taċ-ċkejknin u tal-foqra.

Arahom, Omm tagħna, arahom.

Omm tagħna, Ruma qed tħejji għal Ġublew ġdid,

li se jkun messaġġ ta’ tama għall-umanità

mġarrba mill-kriżijiet u mill-gwerer.

Għalhekk fil-belt tara kullimkien postijiet tal-kostruzzjoni:

dan – inti tafu – jipprovoka ħafna skumditajiet

u safrattant hu sinjal li Ruma hi ħajja,

li Ruma qed tiġġedded, li Ruma qed tfittex kif tadatta ruħha għall-esiġenzi,

biex tkun iżjed akkoljenti u tiffunzjona aħjar.

Imma l-ħarsa tiegħek ta’ Omm tilħaq lil hemm minn hekk.

U jidhirli li qed nisma’ leħnek

li bl-għerf kollu qed jgħidilna: “Uliedi,

sejrin sew dawn ix-xogħlijiet, imma attenti:

tinsewx il-bini tar-ruħ!

Il-veru Ġublew jinsab ġewwa:

ġewwa, ġewwa l-qlub tagħkom – tgħidilna int –,

ġewwa r-relazzjonijiet familjari u soċjali.

Huwa ġewwa li tridu taħdmu biex tħejju

t-triq għall-Mulej li ġej”.

U hija opportunità tajba

biex nagħmlu Qrara tajba

u nitolbu l-maħfra minn dnubietna kollha.

Alla jaħfer kollox, Alla jaħfer dejjem, dejjem.

Omm Immakulata, irroddulek ħajr!

Din ir-rakkomandazzjoni tiegħek tagħmlilna tajjeb,

għandna bżonn wisq tagħha, għax, bla ma rridu,

qed nirriskjaw li ninħakmu għalkollox

mill-organizzazzjoni, minn x’għandna x’nagħmlu,

u allura l-grazzja tas-Sena Mqaddsa,

li hi żmien ta’ twelid spiritwali ġdid,

li hi żmien ta’ maħfra u ta’ ħelsien soċjali,

din il-grazzja ġubilari tista’ ma tiġix sew,

tisfa xi ftit fgata.

Imma hawn is-Sindku qed iħejji kollox biex f’din it-tifkira,

f’din is-Sena Mqaddsa, ikun sew.

Nitolbu għas-Sindku li għandu ħafna xogħol.

Żgur, Marija, int kont preżenti

fis-sinagoga ta’ Nazaret,

dakinhar li Ġesù għall-ewwel darba

pprietka lin-nies tar-raħal tiegħu.

Qara mir-romblu tal-profeta Iżaija:

“L-Ispirtu tal-Mulej fuqi,

għax hu kkonsagrani,

Bagħatni nħabbar il-ħelsien lill-imjassrin,

nwassal il-bxara t-tajba lill-fqajrin,

u d-dawl mill-ġdid lill-għomja,

nrodd il-ħelsien lill-maħqurin

u nxandar sena tal-grazzja tal-Mulej” (Lq 4:18-19).

Imbagħad qagħad bilqiegħda u qal: “Din il-kitba seħħet illum,

intom u tisimgħu” (v. 21).

U int, ja Omm, int kont hemm, qalb in-nies mistagħġba.

Kont imkabbra bih, b’Ibnek,

u fl-istess waqt stajt tobsor id-dramma

tal-għeluq u tal-għira, li ġġib il-vjolenza.

Din id-dramma int ġarrabtha

u dejjem iġġarrabha, fil-qalb bla tebgħa tiegħek

mimlija bl-imħabba tal-Qalb ta’ Ġesù.

Omm tagħna, eħlisna mill-għira:

ħa nkunu lkoll aħwa, li rridu l-ġid ta’ xulxin.

Ebda għira. L-għira, dak il-vizzju ikrah,

li jeqred minn ġewwa.

U llum ukoll, ja Omm, int ittennilna:

“Isimgħu minn Ġesù, isimgħu minnu!

Agħtuh widen, u agħmlu dak li jgħidilkom hu” (ara Ġw 2:5).

Grazzi, Omm Qaddisa! Grazzi għax mill-ġdid,

f’dan iż-żmien xott mit-tama,

tagħtina lil Ġesù, it-Tama tagħna. Grazzi, Omm tagħna.

miġjuba mit-Taljan għall-Malti minn Francesco Pio Attard