SOLENNITÀ TAL-EPIFANIJA TAL-MULEJ
IL-PAPA FRANĠISKU
ANGELUS
Pjazza San
Pietru
It-Tnejn, 6 ta’ Jannar, 2025
Għeżież ħuti, il-festa tal-Epifanija t-tajba!
Illum il-Knisja tiċċelebra l-manifestazzjoni ta’ Ġesù u l-Evanġelju jikkonċentra fuq il-Maġi, li wara vjaġġ twil jaslu Ġerusalemm biex iqimu lil Ġesù.
Jekk nosservaw sewwa niskopru xi ħaġa ftit jew wisq stramba: filwaqt li dawk l-għorrief jaslu mill-bogħod ifittxu lil Ġesù, dawk li kienu qribu mank imiddu pass lejn il-grotta ta’ Betlehem. Miġbudin u mmexxijin mill-kewkba, il-Maġi jaffrontaw spejjez kbar, jagħtu ħinhom, jaċċettaw ħafna riskji u inċertezzi li dak iż-żmien qatt ma kienu nieqsa. Madankollu, jegħlbu kull diffikultà biex jaslu ħalli jaraw lir-Re Messija, għax jafu li fl-istorja tal-umanità kienet qed isseħħ xi ħaġa unika u ma jridux jitilfu l-appuntament. Ħassew l-ispirazzjoni fihom u ħallewha tmexxihom.
Iżda dawk li jgħixu f’Ġerusalemm, dawk li suppost kellhom ikunu l-aktar hienja u lesti biex jiġru lejn il-grotta, mank jiċċaqalqu. Is-saċerdoti, it-teoloġi, jinterpretawha tajjeb l-Iskrittura Mqaddsa u jagħtu indikazzjonijiet lill-Maġi dwar fejn jistgħu jsibu lill-Messija, imma ma jitħarrkux “mit-tron” tagħhom. Sodisfatti b’dak li għandhom, ma jibdewx ifittxu, ma jidhrilhomx li ta’ min joħroġ u jitbiegħed minn Ġerusalemm.
Dal-fatt, ħuti, iġagħalna nirriflettu u b’xi mod jipprovokana, għax iqanqal mistoqsija: aħna, jiena, illum, f’liema kategorija ninsabu? Aħna aktar nixbħu lir-ragħajja, li f’dak il-lejl stess marru jħaffu lejn il-grotta, lill-Maġi tal-orjent li bil-fiduċja jitilqu jfittxu lil Iben Alla magħmul bniedem; jew aktar nixbħu lil dawk li minkejja kienu ferm qribu fiżikament, ma jiftħu xil-bibien ta’ qlubhom u ta’ ħajjithom, jibqgħu magħluqin u insensibbli għall-preżenza ta’ Ġesù? Nagħmlu dil-mistoqsija. Ma’ liema grupp ta’ nies jiena msieħeb?
Hemm storja li tgħid li kien hemm ir-raba’ Maġu li wasal tard Ġerusalemm, propju waqt it-tislib ta’ Ġesù – storja sabiħa din, mhix storika, imma storja sabiħa -, għax mat-triq kien waqaf jgħin lil min fil-bżonn u beda jqassmilhom ir-rigali prezzjużi li kien se jagħti lil Ġesù. Fl-aħħar wasal raġel xiħ u qallu: “Fis-sewwa ngħidlek li dak kollu li għamilt ma’ tal-aħħar fost dawn ħutna, għamiltu għalija”. Il-Mulej jaf dak kollu li aħna nagħmlu għall-oħrajn.
Nitolbu lill-Verġni Marija tgħinna biex fuq l-eżempju tar-ragħajja u l-Maġi, nagħrfu li Ġesù hu qribna fil-fqir, fl-Ewkaristija, fl-abbandunat, f’ħuna, f’oħtna.
Wara l-Angelus
Għeżież ħuti!
L-Epifanija hi l-Ġurnata Missjunarja Dinjija tat-Tfal, li dis-sena għandha t-tema: “Morru u stiednu lil kulħadd għall-festa”. Insellem lit-tfal kollha u lill-adoloxxenti missjunarji tad-dinja kollha u nħeġġiġhom biex jibqgħu impenjati bit-talb u s-solidarjetà favur dawk tamparhom tal-kontinenti l-oħra.
Hu pjaċir kbir tiegħi nibgħat l-awguri minn qalbi lil-komunitajiet ekkleżjali tal-Orjent li għada jiċċelebraw il-Milied Imqaddes. B’mod partikolari niżgurahom li nitlob għal dawk li qed isofru minħabba l-kunflitti li hemm bħalissa. Jalla Ġesù, il-Prinċep tal-Paċi, jġibilhom il-paċi u s-serenità!
Nilqa’ bil-ferħ lill-parteċipanti tal-korteo storiku-folkloristiku li din is-sena hu dedikat lill-Komun ta’ Amelia u l-pajjiżi tal-madwar, lill-valuri umani u l-valuri reliġjużi wkoll. Grazzi!
U ma ninsewx nitolbu għall-paċi: fl-Ukrajna martri, fil-Palestina, f’Iżrael, fil-pajjiżi li jinsabu fi gwerra, fil-Myanmar.
Insellem lill-fidili minn Massafra, liż-żgħażagħ tal-Moviment “Tra Noi”, “lill-Ħbieb tal-Istorja u t-Tradizzjonijiet” minn Carovilli u lill-kor minn Soriano nel Cimino. U nżid l-awguri tiegħi lill-parteċipanti “tal-Korteo tar-Rejiet Maġi” fil-Polonja, li b’din l-inizjattiva huma xhieda ta’ fidi fil-knejjes u fit-toroq ta’ Varsavja u f’tant bliet pollakki, imma f’oħrajn barra l-pajjiż ukoll, hawn f’Ruma wkoll! Tislima lill-pollakki kollha. U nawgura lil kulħadd il-festa tal-Epifanija t-tajba. Komplu itolbu għalija. L-ikla t-tajba u arrivederci!
Miġjub għall-Malti minn Joe Huber