|
Talba uffiċjali għall-Kanonizzazzjoni tal-Beatu Carlo Acutis
O Missier,
li tajtna x-xhieda mħeġġa
tal-Beatu żagħżugħ Carlo Acutis,
li għamel mill-Ewkaristija ċ-ċentru ta’ ħajtu
u l-qawwa tat-tħabrik tiegħu ta’ kuljum
biex l-oħrajn ukoll iħobbuk fuq kull ħaġa,
agħmel li ma jdumx
ma jingħadd fost il-Qaddisin tal-Knisja tiegħek.
Wettaq il-fidi tiegħi,
kebbes tamieti,
ġedded imħabbti,
fuq ix-xempju taż-żagħżugħ Carlo,
li kiber f’dawn il-virtujiet
u issa qed jgħix fi ħdanek.
Agħtina l-grazzja li tant neħtieġ…
Jiena fik nafda, Missier,
u fl-Iben maħbub tiegħek Ġesù,
fil-Verġni Marija, l-Omm l-aktar ħelwa tagħna,
u fl-interċessjoni tal-Beatu tiegħek Carlo Acutis.
Missierna, Sliema, u Glorja.
Imprimatur in Curia Archiepiscopali Mediolanensi
6.X.2014
X Angelo Mascheroni
***
Talba biex tingħad fil-Beatifikazzjoni ta’ Carlo Acutis
O Alla, Missierna,
irroddulek ħajr li tajtna lil Carlo,
mudell ta’ ħajja għaż-żgħażagħ,
u messaġġ ta’ mħabba għal kulħadd.
Int għamiltu namrat
ta’ Ibnek Ġesù,
u hu għażel l-Ewkaristija
bħala t-triq ewlenija tiegħu lejn il-Ġenna.
Int tajtu lil Marija
bħala Omm l-aktar maħbuba,
u bir-Rużarju għamilt minnu
għannej tal-ħlewwa tagħha.
Ilqa’ t-talb tiegħu għalina.
Fuq kollox ħu ħsieb tal-foqra,
li hu ħabb u għalihom qabeż.
U lili wkoll agħtini,
għall-interċessjoni tiegħu,
il-grazzja li neħtieġ…
U agħmel li l-ferħ tagħna jkun sħiħ,
billi tqiegħed lil Carlo fost il-qaddisin
tal-Knisja Mqaddsa tiegħek,
biex it-tbissima tiegħu
tilma għalina mill-ġdid,
għall-glorja ta’ ismek.
Amen.
Missierna, Sliema, u Glorja.
***
Talba lill-Beatu Carlo Acutis għall-virtù tas-safa
O Beatu Carlo Acutis, int li fil-ħajja qasira tiegħek fuq din l-art ingħatajt kollok kemm int għall-Mulej u wasalt biex ksibt ġisem safi, minkejja l-oċean ta’ tentazzjonijiet li qed tħabbat wiċċha magħhom l-umanità, fosthom iż-żgħażagħ u l-adulti, li qed jirriskjaw it-tinġis ta’ ruħhom anki permezz tal-mezzi tal-komunikazzjoni, idħol għalija biex ikolli qalb safja u ħarsa ġdida.
Ħa nkun nista’ jien ukoll, bħalek, inħares lejn l-oħrajn u lejn id-dinja b’għajnejn safja biex nista’ naqdi aħjar lill-Mulej u nikseb il-paċi vera ta’ qalbi.
Il-Mulej sejjaħlek fl-aqwa ta’ żgħożitek għal raġunijiet misterjużi li hu biss jaf wisq iktar minna: itlob għalina lill-Ispirtu s-Santu biex idawwal lill-bnedmin kollha ta’ rieda tajba ħalli ma jaqgħux fid-dnubiet kontra s-safa, biex nistgħu ngħixu bħala bnedmin ħielsa li nħarsu b’rispett kbir lejn l-oħrajn u nkunu lesti naqdu dejjem lill-Mulej fil-proxxmu tagħna kif għamilt int.
Miġjubin mit-Taljan għall-Malti minn Francesco PIo Attard