|
IL-KNISJA TIĠĠEDDED U TIKBER
bil-ħila tAL-EVANĠELIZZAZZJONI ĠDIDA
Intervista lil
Mons.
Rino Fisichella
Ħajr lis-Sur Tony Aquilina tat-traduzzjoni
RUMA,
il-Ħamis 2 ta’ Diċembru, 2010 (www.ZENIT.org):
“Ir-realtà hi li l-Knisja qed tiġġedded u tikber.
Id-deċiżjoni li jingħata bidu għal evanġelizzazzjoni ġdida
ma tteħditx bħala azzjoni ta’ difiża, imma ġejja mill-fatt
li aħna konxji li l-Knisja hi msejħa biex tkun missjunarja”.
Dan stqarru Mons. Rino Fisichella, President tal-Kunsill
Pontifiċju għall-Promozzjoni tal- Evanġelizzazzjoni Ġdida,
f’intervista li għamillu Zenit, li fiha wieġeb fuq
l-inizjattiva tal-Papa li joħloq Dikasteru ġdid fil-Vatikan.
L-Arċisqof titulari ta’ Voghenza fisser li
“l-evanġelizzazzjoni ġdida ma ssirx għax qed ngħixu fi
żminijiet ta’ kriżi. L-evanġelizzazzjoni ġdida tfisser li
nġeddu fina l-ispirtu missjunarju li għandu jkollu kull
nisrani. Qed nitkellmu fuq xi ħaġa li għandha timxi
mal-proċess tal-ewwel evanġelizzazzjoni li permezz tagħha
s-Sinjur Tagħna Ġesù ried iwaqqaf il-Knisja u fdalha
f’idejha din il-biċċa xogħol: li tmur u tiltaqa’ ma’ kull
bniedem u tagħtih il-Vanġelu”.
Imma xi trid tagħmel biex jerġa’ jingħata
bidu għal din il-missjoni u kif irridu nħossuna biex
inwieġbu għal dmir bħal dan?
Fisichella:
L-evanġelizzazzjoni ġdida teħtieġ missjunarji ġodda. Ma
nistgħux noqogħdu madwar mejda biex nippjanaw kif se nagħmlu
l-evanġelizzazzjoni ġdida għax jekk nagħmlu hekk ma taħdimx.
Xogħolna jsir billi jkollna u nrabbu missjunarji ġodda.
Ngħid għalija, f’ħajti dejjem tajt sehemi u
għallimt ir-reliġjon nisranija, għalhekk inħossni tajjeb
f’din il-ħidma, u jiena niżżi ħajr lill-Qdusija Tiegħu għal
din il-biċċa xogħol li fdali f’idejja. Naf tajjeb li din
mhijiex faċli, imma li kelli nħossni mtaqqal biha, kont
inkun bniedem tassew miskin. Iżda nista’ ngħid li ninsab
mimli ħeġġa. Din hi xi ħaġa li dejjem xtaqt nagħmel, li
nxerred il-Vanġelu.
X’tista’ tgħidilna xi ħaġa fuq il-Kunsill
Pontifiċju għall-Promozzjoni tal-Evanġelizzazzjoni Ġdida?
Fisichella:
Il-Kunsill Pontifiċju għall-Promozzjoni
tal-Evanġelizzazzjoni Ġdida hi intuwizzjoni profetika
tal-Papa Benedittu XVI u sfida kbira għall-ħajja tal-Knisja
fl-għexieren ta’ snin li ġejjin. Hija intuwizzjoni profetika
għax iġġegħelna naħsbu bis-serjetà fuq iż-żminijiet tallum.
Hija ġġegħelna nifhmu l-mard li welled din il-kundizzjoni li
nistgħu infissruh bħala indifferenza, anjostiċiżmu, atejiżmu
pprofessat, individwaliżmu li qatt ma deher daqshekk qawwi
bħal f’dawn l-aħħar sekli. F’kelma waħda sekolarizzazzjoni
li fuqha l-Papa spiss jitkellem. Din il-kundizzjoni ġġiegħel
lill-Knisja biex tifli minn fejn ġej dan il-mard kollu u
biex tagħraf xi trid tagħmel biex tfejqu.
Għandna naħsbu fuq x’qed iwassal il-bniedem
tallum li ma jimpurtah xejn mill-verità u mbagħad inħarsu
lejn il-ġejjieni biex nerġgħu nqarrbu l-fidi mar-raġuni
f’kundizzjoni ta’ djalogu u kollaborazzjoni. Irrid nisħaq li
l-għażla libera u konsapevoli tal-fidi ma sserraħx fuq
x’kienu jgħidu fl-antik, imma fuq rabta persunali ta’ ġrajja
storika li biddlet wiċċ l-umanità u l-istess storja,
jiġifieri l-laqgħa tagħna ma’ Ġesù ta’ Nażaret.
Għandu jkollna l-ħila nqarrbu din
il-kundizzjoni u nuru li l-laqgħa u l-esperjenza t’Alla hija
kundizzjoni meħtieġa biex il-bnedmin tallum jerġgħu jsibu
tassew is-sens ta’ ħajjithom.
Fi tweġiba fuq l-eklissi t’Alla li fuqha
fuqha kien tkellem Pawlu VI, u li Ġwanni Pawlu II u
Benedittu XVI ħasbu fil-fond fuqha, twieled il-Kunsill
Pontifiċju għall-Promozzjoni tal-Evanġelizzazzjoni Ġdida.
Quddiem il-fatt li llum Alla qed jiġi mwarrab, aħna rridu
niġbru l-forzi u l-konvinzjoni kollha tagħna biex il-bnedmin
jerġgħu jpoġġu lil Alla fl-ewwel post ta’ ħajjithom u juru
li Alla mhuwiex realtà li nistgħu ngħaddu mingħajrha, imma
li rridu ngħixu ħajja tassew umana, ma nistgħux ngħaddu
mingħajrU.
Fi kliem ieħor, aħna fid-dmir inwasslu
mill-ġdid il-Vanġelu lill-irġiel u n-nisa tallum sabiex
ħajjithom jgħixuha b’mod uman, biex huma jkollhom il-ħila
jġeddu l-eżistenza tagħhom.
Kif għidtha int, tidher ħaġa faċli, imma
rridu nsibu tarf ta’ ħafna problemi. Ħafna drabi naraw li
l-Knisja mhijiex mifhuma. Jidher biċ-ċar li teżisti firda
fil-mod kif il-fidi kienet titwassal lill-ġenerazzjonijiet
qodma u kif qed titwassal lil dawk tallum. F’xi partijiet
tal-Knisja jidher li jsiru biss attivitajiet
awtoreferenzjali...
Fisichella:
L-istorja tal-Knisja llum mhijiex differenti minn dik
tal-imgħoddi. Anki fl-imgħoddi kellna mumenti mdawla u
oħrajn le. Anki fl-imgħoddi għaddejna minn żminijiet
diffiċli ħafna. Sa mill-ewwel sekli, imma anki matul
it-tieni gwerra dinjija, saru atti ta’ krudeltà kbira
min-naħa ta’ ideoloġiji totalitarji: naziżmu, faxxiżmu u
komuniżmu, li lkoll kemm huma ħaduha qatta’ bla ħabel kontra
l-Knisja.
Fil-kamp ta’ konċentrament ta’ Dachau kien
hemm settur minnu li fih kien hemm 2,500 qassis internati
minn naħat differenti tal-Ewropa. Ħafna minnhom inqatlu.
Wieħed minn dawn is-saċerdoti li reġgħu lura mil-lager kien
wieħed mid-diretturi tas-seminarju li kien jattendi Joseph
Ratzinger. Dan kien jismu Alfred Läpple, rettur
fil-formazzjoni u tħejjija għas-saċerdozju taż-żagħżugħ
Ratzinger.
L-istorja tgħallimna li l-Knisja qatt ma
kellha mixja faċli fil-ħajja tal-evanġelizzazzjoni, imma
dejjem kellha xhieda kbar, nies kredibbli li ħabbru
l-Vanġelu bla waqfien. Dak li jidher li nbidel hu li filwaqt
li qabel kien hemm ċertu sens reliġjuż, kien hemm bħal
kultura nisranija li qatt ma ġiet nieqsa, illum il-ġurnata
nindunaw li dan is-sens reliġjuż f’ħafna naħat tad-dinja qed
jintilef. Għalhekk ninsabu f’diffikultà serja meta niġu biex
nitkellmu fuq Ġesù Kristu, fuq il-fidi u l-Knisja f’kuntest
kulturali li jeħodha jew iwaqqa’ għaċ-ċajt dan kollu, u
b’hekk joħroġ ċar li din il-kuxjenza issa ntilfet.
Li hu żgur hu li rridu nibdlu l-mod kif
nitkellmu, irid ikollna aktar ħila li nikkomunikaw, irid
ikollna aktar ħila li naċċettaw l-isfida tal-komunikazzjoni
moderna, madankollu jibqa’ l-fatt li l-kontenut jibqa’
dejjem dak li hu. Għax kif kien jgħid l-appostlu San Pawl
fl-ittra lil-Lhud, il-kristjaneżmu jibqa’ l-istess ilbieraħ,
illum u dejjem’. Mela dak li kulħadd kien jemmen fih, f’kull
naħa tad-dinja u dejjem, irid jiġi mħares, imma rridu niksuh
b’lingwaġġ li jkun jista’ jiftiehem. Irridu nagħmlu ħilitna
biex il-bniedem tallum ikun jista’ jara l-Mulej, jagħmel
l-esperjenza li jdur lejh persunalment, iqanqal fih ix-xewqa
li jagħmel l-esperjenza t’Alla, ta’ Ġesù Kristu u li jkun
jifforma parti mill-Knisja.
Il-movimenti qed jiżdiedu, il-gruppi u
l-għaqdiet qed iniedu inizzjattivi bil-għan li jqanqlu
r-riflessjoni fuq l-importanza t’Alla f’ħajjitna. X’taħseb
dwar dan?
Fisichella:
Dak li rridu nagħmlu, inwasslu u nanimaw huwa proġett li
għandu jkun sħiħ. Sfortunatament jiġri li aħna wkoll naqgħu
vittmi tal-kundizzjoni kulturali li fiha qed ngħixu u
għalhekk ma nistgħux nevitaw milli nkunu frammentarji. Isiru
ħafna inizzjattivi, imma kull waħda tkun indipendenti
mill-oħra, kulħadd jimxi wara l-kariżma tiegħu, li hi sabiħa
ħafna imma nirriskjaw li nimxu f’settur limitat. Għal dan
il-għan irridu nirkupraw dak li l-Knisja għandha li hu
tagħha, jiġifieri l-għaqda, li niltaqgħu lkoll flimkien
f’sens profond li lkoll kemm aħna nagħmlu parti mill-Knisja
għax nafu li lkoll qed naħdmu għal għan wieħed li hu li
nħabbru s-Saltna t’Alla fid-dinja tallum.
Għandna f’moħħna nqanqlu l-preżenza
tar-realtajiet differenti li jaħdmu u jaħdmu sewwa ħafna fi
ħdan il-qasam pastorali, lil dawk li jinsabu qrib u ’l
bogħod, imma nagħmlu dan b’tali mod li wieħed ma jkunx
maqtugħ mill-ieħor imma li kulħadd ikun jista’ jifhem li
jagħmel parti sħiħa flimkien mal-oħrajn. Jekk ma jkunx hemm
din il-preżenza li tgħaqqad aħna ma nkunux qed nagħtu sinjal
effikaċi. Nixtieq infakkar li l-Kunċilju Vatikan II sejjaħ
il-Knisja bħala sinjal u strument ta’ għaqda tal-bnedmin
kollha. Jekk meta nħabbru l-Vanġelu ma nagħtux sinjal ta’
għaqda, allura nkunu qed nirriskjaw li dak li aħna nħabbru
jkun jidher anqas effikaċi.
X’passi għandek f’moħħok li tieħu biex
l-evanġelizzazzjoni ġdida timxi
’l
quddiem?
Fisichella:
Il-ħajja tal-ministeru tiegħi għadha fil-bidu tagħha. Bħala
l-ewwel ħaġa għandna f’moħħna li nifhmu u nsiru nafu b’dak
li diġà qed isir biex hekk il-gruppi kollha jsiru jafu lil
xulxin biex jaħdmu flimkien b’mod sħiħ.
Għandna f’moħħna li nkunu ta’ servizz
għall-Knisja b’mod speċifiku. Nittamaw li norganizzaw
fl-aktar żmien qasir possibbli l-membri Kardinali u
Isqfijiet, li magħhom se nieħdu sehem u nwettqu flimkien dan
il-proġett. Ma ninsewx li l-Papa ddeċieda li l-Assemblea
ordinarja tas-Sinodu tal-Isqfijiet tal-2012 se tkun
iddedikata appuntu għal “l-evanġelizzazzjoni ġdida bil-għan
li tixtered il-fidi nisranija”.
Se nfittxu li nimxu flimkien mal-isqfijiet
kollha għax l-ewwel evanġelizzaturi huma l-Isqfijiet u
wieħed mill-ħidmiet li l-Papa fdalna f’idejna hu eżattament
dak li nagħmlu kuntatt partikulari mal-konferenzi
tal-isqfijiet u li, fejn dan jista’ jseħħ, infittxu li
nqanqlu l-preżenza ta’ organiżmu li jkun jista’ jaħdem
għall-evanġelizzazzjoni ġdida. Kif jeżisti wieħed
għall-katekeżi, ieħor għall-karità, l-istess għandu jsir
wieħed għall-evanġelizzazzjoni ġdida.
 L-evanġelizzazzjoni ġdida għandha x’taqsam
biss mal-Ewropa?
Fisichella:
Le. L-evanġelizzazzjoni ġdida m’għandhiex x’taqsam biss ma’
pajjiżi fejn il-Knisja ilha teżisti għal ħafna sekli.
M’hemmx biss l-Ewropa. Kelli l-okkażjoni li niltaqa’ ma’
diversi Isqfijiet mill-Indja u minn pajjiżi oħra tal-lvant
li qaluli li huma wkoll jeħtieġu l-evanġelizzazzjoni ġdida.
Għall-ewwel bqajt skantat, imma fhimt li l-bliet il-kbar
tad-dinja fil-kuntest ta’ globalizzazzjoni li qed ngħixu fih
illum, mhumiex neqsin mill-fenomenu tas-sekolarizzazzjoni.
Fil-ktieb intervista “Luce del mondo”
(Dawl tad-dinja), li għadu kemm ħareġ mill-Librerija
Editrice Vaticana, il-Papa Benedittu XVI kiteb li anki jekk
“il-kristjaneżmu mhux qed ifassal l-opinjoni pubblika
dinjija, hemm oħrajn li qed jagħmlu hekk”, madankollu “fuq
dak li nara u fuq dak li jirnexxili nagħmel esperjenza
persunali, ninsab ħafna ottimist għall-fatt li
l-kristjaneżmu jinsab fuq quddiem nett ta’ din id-dinamika
ġdida”. X’raġunijiet hemm għal dan l-ottimiżmu?
Fisichella:
Il-Papa għandu idea preċiża ħafna tar-realtà tal-Knisja.
Fiż-żjajjar ad limina ma’ Isqfijiet mid-dinja kollha,
hu jirċievi informazzjoni preċiża fuq il-kontinenti kollha,
filwaqt li aħna xi drabi jkollna dehra xi ftit
ġeografikament limitata u ħafna drabi nħarsu biss lejn
l-Ewropa. Imma l-Papa għandu dehra globali. Il-Knisja tinsab
fl-Afrika, fl-Amerika t’isfel, fl-Indja, fil-Korea
t’isfel... U mit-tagħrif li għandna naraw li l-Knisja qed
tikber.
Dalgħodu ltqajt ma’ Chiara Amirante
bl-organizzazzjoni tagħha “Komunitajiet Orizzonti Ġodda”.
Din tieħu ħsieb djar li huma mibnija fuq il-ħsieb tal-ewwel
komunitajiet insara fejn kull ma hu mitlub minn dawk li
jgħixu fihom hu li jagħmlu ħitilthom li jgħixu l-Vanġelu u
li “jaħsbu b’mod pożittiv”. Għalkemm neqsin mill-mezzi li
qatt ma huma biżżejjed biex jieħdu ħsieb tant nies li
jinsabu fil-bżonn, illum il-Komunitajiet Orizzonti Ġodda
jiltaqgħu ma’ miljuni ta’ nies, fis-skiet, imma ssir ħidma
vera ta’ konverżjoni u bidla fil-qlub. Kif jista’ jkun ma
tarax il-preżenza tal-Ispirtu, il-ħeġġa tal-Knisja, f’dawn
l-inizzjattivi? Żgur li jekk naħsbu jew nimmaġinaw li
l-Knisja hi biss dik li tiġi ppreżentata lilna minn xi mezzi
ta’ komunikazzjoni tal-massa, joħroġ ċar li se jkollna
dejjem dehra parzjali u mgħawġa. Imma l-Knisja mhijiex hekk.
Il-Knisja hi ta’ kobor kbir li tibdel in-nies billi
twasslilhom u tkunilhom xiehda tal-Vanġelu.
|