|
Talba “Tkellem, Mulej, il-qaddej tiegħek qiegħed jisma.”
Ejja Spirtu
Qaddis,
imla l-qlub tal-fidili tiegħek
Bidu tad-diskors tal-muntanja. QARI ... [Mt:5:1] Kif ra l-folol, Ġesù tala' fuq il-muntanja, qagħad bilqiegħda, u resqu lejh id-dixxipli tiegħu. [Mt:5:2] Fetaħ fommu u qabad jgħallimhom.
MEDITAZZJONI ... Silta qasira, imma lit ant tista’ tgħinna f’din l-esperjenza tagħna. Għandna l-ewwel passi ta’ xena li tisvolġi f’kapitli ħamsa, sitta u sebgħa. Mhux neċessarju li dak kollu li jagħtina Mattew f’dawn it-tliet kapitli, jseħħ kollu f’okkażżjoni waħda. Anżi aktarx li l-Evanġelista hawn jiġbor fi priedka waħda, it-tagħlim prinċipali ta’ Ġesù. Lanqas neċessarjament seħh lid an kollu Ġesù qalu fuq din il-muntanja, imma hawnhekk l-awtur qed jipprova jwassal messaġġ importanti, mhux biss lin-nies ta’ żmienu, imma wkoll lilna li ġejna kważi elfejn sena wara. Nersaq jien wkoll lejn il-Muntanja … Fit-Testment il-Qadim, il-muntwanja kienet spiss il-post fejn il-bniedem jtaqa’ ma’ Alla. Fuq il-muntanja Ħoreb, Alla nnifsu jsejjaħ lil Mosè minn ħuġġieġa nar qalb l-għollieq. Fuq is-Sinaj, jerġa jkellmu u jagħtih il-liġi sabiex jwassalha lill-poplu. Huwa huwa permezz ta’ din il-liġi li f’riġlejn is-Sinaj, twieled il-poplu Lhudi, għaliex hija l-liġi (il-kostituzzjoni) li lill-poplu tagħmlu ħieles u sovran. Nilmaħ lil Ġesù … Fuq din il-muntanja li jsemmi Mattew, l-Evanġelista jurina lill-Ġesù, li mhux biss qiegħed jgħallem imma, l-istess bħal Mosè qiegħed jagħti liġi ġdida lill-poplu ġdid ta’ Alla. Fit-testi li jmiss għad irridu nisemgħu lil Ġesù jgħid diversi drabi, “Smajtu x’intqal lin-nies ta’ dari …. Imma jiena ngħidilkom…” Fit-test li jmiss, Ġesù huwa ppreżentat bħala Mosè l-ġdid li ħeles lil ġensu mill-jasar, tah liġi ġdida u għamlu poplu l-Poplu Ġdid ta’ Alla. Mill-banda l-oħra Mosè tela’ waħdu fuq il-muntanja tal-Mulej u l-poplu baqa’ jistenna isfel. Ġesù mhux biss tela’ hu, iżda miegħu tella l-folla kollha. U f’dik il-folla hemm ukoll jiena u int. Kemm drabi hares f’għajmejja u stedinni, “Inti ġej?” Wieħed mill-Folla … U jiena, u inti, u dak, u dik u l-ieħor, u l-oħra … ilkoll flimkien għamilna folla. Kollha bl-istorja tagħna. Kollha biċ-ċirkustanzi tagħna. Kollha bin-niket u l-ferħ tagħna. Kollha bit-tamiet tagħna. Min b’ħeġga. Min b’ħafna dubji. U Ġesù għaddej minn nofsna, jsejjaħ lil kulħadd… wieħed, wieħed u waħda, waħda. Għandu kelma għal kulħadd. Imma ma jinponiha fuq ħadd. Kemm drabi għadda minn ħdejja u dawwart wiċċa. Għamilt ta’ bir-ruħi li ma rajtux. Li għandi x’nagħmel. Kultant forsi lanqas biss inbaħt bih. Ġie biex jwassalli messaġġ minn għand Missieru u Missieri, imma jiena kelli wisq x’nagħmel. Fuq kollox Ġesù, mhux biss huwa l-messaġġier li ġie biex jwasslilna l-messaġġ, imma huwa l-Messaġġ innifsu. Ma ġiex biss biex jagħtina l-kelma, imma huwa nnifsu huwa l-istess Kelma. Kull darba li nirċievi l-Kelma ta’ Alla b’indifferenza, nkunu qed nimxi miegħu bl-istess mod. Tasal kif tasal, u tasal minn għand min tasal, din hija dejjem il-Kelma ta’ Alla. Nindiehes mad-Dixxipli … Il-folla spiss marret wara Ġesù għall-kurżità jew biex takkwista jew tara xi miraklu. Darba Ġesù qalilhom, “Intom qegħdin tfittxuni għax kiltu u xbajtu. Tħabtu mhux għall-ikel li jgħaddi, imma għal dak li jibqa’ għall-ħajja ta’ dejjem.” Fost din il-folla kbira kien hemm grupp żgħir, id-dixxipli – dawk li emmnu fih. Kelmtu laqtithom. Fih raw xi ħadd speċjali. Mhux dejjem fehmuh. Spiss kien joħodhom waħedhom u joqgħod jispjegahom fid-dettal dak li lil folla kien jgħidulhom bil-parraboli. Hemm fih. Iżda huwa wkoll emmen fihom. Anzi emmen fihom aktar milli emmnu fih huma. U jiena f’din il-folla fejn qiegħed? Ngħid li jiena nisrani. Imma jiena nqis lili nnifsi mad-dixxipli tal-Kelma? U jekk iva, dan id-dixxiplulat tiegħi kif insarrfu fil-ħajja tiegħi ta’ kuljum? Mhux biss meta nkun il-Knisja, imma wkoll barra; fid-dar, fil-ħanut, fuq ix-xogħol, fit-triq, waqt id-divertiment? TALB … Tkellem, Mulej għax il-qaddej tiegħek qiegħed jisma’. Grazzi Mulej tal-Kelma tiegħek li inti twasslilna permezz tal-Kotba Mqaddsa, permezz tal-Knisja. Aħfirli, Mulej ta’ kemm drabi ma lqajtx il-Kelma tiegħek b’qalb miftuħa. Għinni nifetah għal-Kelma tieghek Mulej li fija tħalli l-frott. Agħtini l-Ispirtu tiegħek Mulej biex meta niftah fommi, nwassal biss il-Kelma tiegħek u mhux dik tiegħi. KONTEMPLAZZJONI … Dan huwa l-aħħar pass. Wara li qrajt il-Kelma, wara li immeditajt fuqha u tlabt permezz tagħha, issa irid nieqaf minn kollox, u fis-skiet u l-ġabra nintelaq fil-Missier li tani l-Ibnu biex ikun il-Kelma tiegħu għalija. Nintelaq fl-Iben li huwa l-istess Kelma Inkarnata fil-persuna ta’ Ġesù Kristu; dak li mill-paġni tal-Evanġelju qiegħed jitkellem miegħi kif elfejn sena ilu tkellem mad-dixxipli fit-toroq tal-Palestina. Nintelaq fl-Ispirtu Qaddis li nebbaħ il-Kelma lil dawk li kitbuha u issa qiegħed ifissirha lili u jħeġġiġni biha. Inwarrab minni kull ħsieb, kull xewqa anke dawk l-aktar qaddisa. Nitbattal minn kollox u nħalli lilu jima hu il-vojt ta’ ġo fija. Għal ftit minuti li ġejjin m’hemmx għalfejn inkompli nitolbu l-ħtiġijiet tiegħi jew dawk ta’ l-oħrajn. Hu jaf x’għandi bżonn qabel nitlobhomlu. Għalhekk fil-ħemda nieqaf nitfaxxa bil-preżenza tiegħu. U anke jekk ma nħossux, madankollu jiena ċert li Huwa qiegħed hawn. Anke jekk ma nisemgħux ikellimni, huwa qiegħed ħdejja, jwennisni. …….
|