Oriġinarjament, is-silta 'Inħobbok Mulej' tinsab fis-cd
"Lilek Irrid" maħrug mis-sorijiet Klarissi ta' Malta
ftit tas-snin ilu. Il-kliem oriġinali ta' din is-silta
huma miktubin minn Sr Claire Agnes Xerri filwaqt li l-mużika
hija ta' Patrick Richard.
Wieħed faċilment jista' jagħraf li din is-silta bħal
donnha tpoġġi fi kliem sempliċi dak li l-qalb tkun
tixtieq tgħid lil Alla quddiem id-dixxerniment
spiritwali. Din is-silta bħal tirrapreżenta storja ta'
vokazzjoni fejn quddiem is-sejħa li Alla qiegħed
jagħmlilha, l-awtriċi tagħmel minnha nnifisha għotja
sħiħa lil Alla. Quddiem l-imħabba ta' dan Alla tagħna l-qalb
tagħna wkoll tkun trid tistqarr, "Inħobbok Mulej!"
L-arranġament tal-cover version ta' din is-silta ħadu
ħsiebu Br Roderick White, Analise Mifsud u Mirko Galea.
Il-kantant huwa Br Roderick White, li bħalissa jinsab
fil-formazzjoni reliġjuza mal-Franġiskani Kapuċċini.
Il-backing vocalist hija Analise Mifsud. Il-cover
version għandha lirika miżjuda miktuba mill-istess
Roderick White. Mill-banda l-oħra, id-daqq tal-mużika
sar minn Analise Mifsud (pjanu), Br Mark Scicluna (vjolin)
u Br Roderick White (kitarra). Il-produzzjoni tal-cover
version ħa ħsiebha Mirko Galea (Med Music Studio).
J'Alla kull min jisma' u jagħmel użu minn din is-silta
jagħmel minnha esperjenza ta' talb.