PAPA
FRANĠISKU
UDJENZA ĠENERALI
Pjazza San Pietru - L-Erbgħa 10 ta’ April 2013
Għeżież ħuti, l-għodwa
t-tajba!
Fil-Katekeżi tal-ġimgħa l-oħra waqafna
nitkellmu fuq il-ġrajja tal-Qawmien ta’ Ġesù, li fiha n-nisa kellhom
rwol partikulari. Il-lum nixtieq nirrifletti fuq it-tifsira salvifika
tagħha. U għaliex mingħajru l-fidi tagħna tkun
fiergħa? Il-fidi tagħna hi mibnija fuq il-Mewt u l-Qawmien ta’
Kristu, l-istess kif dar tistrieħ fuq il-pedamenti: jekk dawn iċedu,
tikkrolla d-dar kollha. Fuq is-salib, Ġesù offra lilu nnifsu meta
ħa fuqu d-dnubiet tagħna u niżel fl-abbiss tal-mewt, u
fil-Qawmien jirbaħhom, ineħħihom u jiftħilna t-triq biex
nitwieldu mill-ġdid għal ħajja ġdida. San Pietru dan
jiġbru fil-qosor u jesprimih fil-ftuħ ta’ l-Ewwel Ittra tiegħu,
kif għadna kemm smajna: “Ikun imbierek Alla u Missier Sidna Ġesù
Kristu, li fil-ħniena kbira tiegħu reġa’ wilidna għal
tama ħajja bil-qawmien
ta’ Ġesù Kristu mill-imwiet u għal wirt li la jitħassar, la jittabba’, u lanqas jinxef” (1:3-4).
L-Appostlu jgħidilna li bil-Qawmien ta’
Ġesù sseħħ xi ħaġa għal kollox ġdida:
niġu meħlusin mill-jasar tad-dnub u nsiru wlied ta’ Alla,
jiġifieri niġu mnisslin għal ħajja ġdida. Dan għalina
meta jseħħ? Fis-Sagrament tal-Magħmudija. Fl-antik,
dan normalment kien jingħata bit-tagħdis. Dak li kellu
jiġi mgħammed kien jinżel fil-fonti kbir tal-Battisteru, u
jħalli l-ilbies tiegħu warajh, u l-Isqof jew il-Presbiteru kien
isawwab għal tliet darbiet l-ilma fuq rasu, u jgħammdu fl-isem
tal-Missier, ta’ l-Iben u ta’ l-Ispirtu s-Santu. Imbagħad
l-imgħammed kien jitla’ mill-fonti u jxidd fuqu l-libsa l-ġdida, dik
bajda: jiġifieri hu twieled għal ħajja ġdida, billi
ġie mgħaddas fil-Mewt u l-Qawmien ta’ Kristu. Sar iben ta’
Alla. San Pawl fl-Ittra lir-Rumani jikteb: Intom “irċevejtu l-Ispirtu li jagħmel minnkom
ulied adottivi; u li bih aħna nistgħu ngħajtu: ‘Abbà!
Missier!’” (Rum 8:15). Hu propju l-Ispirtu li rċivejna
fil-Magħmudija li jgħallimna, iwassalna biex lil Alla nsejħulu
“Missier”, jew aħjar, “Abbà!”, li tfisser “pa”. Dan hu Alla tagħna:
għalina hu pa. L-Ispirtu s-Santu jwettaq fina din il-kundizzjoni
ġdida ta’ wlied Alla. U dan hu l-akbar don li nirċievu
fil-Misteru ta’ l-Għid ta’ Ġesù. U Alla jittrattana bħala
wlied, jifhimna, jaħfrilna, jgħannaqna miegħu, iħobbna anki
meta niżbaljaw. Diġà fit-Testment il-Qadim, il-profeta Isaija stqarr li
anki jekk omm tinsa lil binha, Alla ma jinsiena qatt, fl-ebda waqt (ara
49:15). U dan hu s-sabiħ!
Madankollu, din ir-relazzjoni tagħna ma’ Alla
bħala wlied m’hix bħal xi teżor li nsorru f’xi rokna ta’
ħajjitna, imma hemm bżonn li tikber, hemm bżonn li
nitimgħuha kuljum bis-smigħ tal-Kelma ta’ Alla, bit-talb, bis-sehem
tagħna fis-Sagramenti, spejċalment tal-Penitenza u ta’ l-Ewkaristija,
u bil-karità. Aħna
nistgħu ngħixu ta’ wlied! U din hi d-dinjità tagħna –
aħna għandna d-dinjità ta’ wlied –
li nġibu ruħna ta’ wlied
tassew! Dan ifisser li kull jum irridu nħallu lil Kristu jibdilna u
jagħmilna bħalU; dan ifisser li nfittxu li ngħixu ta’ Nsara, li
nfittxu li nimxu warajh, anki jekk naraw kemm huma kbar il-limiti tagħna u
d-dgħufijiet tagħna. Għandna dejjem tiġri warajna
t-tentazzjoni li nwarrbu lil Alla għall-ġenb biex inqiegħdu
lilna nfusna fiċ-ċentru, u l-esperjenza tad-dnub
iġġerraħ il-ħajja Nisranija tagħna, il-fatt li
aħna wlied Alla. Hu għalhekk li jrid ikollna l-kuraġġ
tal-fidi u ma nħallux tmexxina dik il-mentalità li tgħidilna:
“Alla ma jiswiex, m’hux importanti għalik”, u kliem bħal dan.
Hu propju bil-kontra: ħajjitna tista’ tkun ġdida u mmexxija
mis-serenità u mill-ferħ biss jekk inġibu ruħna ta’ wlied
Alla, mingħajr ma nħallu jaqtgħulna qalbna l-waqgħat
tagħna, id-dnubiet tagħna, u billi nħossuna maħbubin
minnU. Alla hu l-qawwa tagħna! Alla hu t-tama tagħna!
Għeżież ħuti, l-ewwel irid ikollna
aħna din it-tama soda u rridu nsiru sinjal viżibbli u ċar
tagħha li jdawwal lil kulħadd. Il-Mulej Rxoxt hu t-tama li qatt
ma tonqos, li ma tqarraqx bina (ara Rum 5:5). It-tama ma tqarraqx
bina. Dik li tiġi mill-Mulej! Kemm drabi f’ħajjitna
tgħib kull tama, kemm drabi x-xewqat li nġorru f’qalbna jibqgħu
ma jseħħux! It-tama tagħna l-Insara hi
b’saħħitha, żgura, konkreta f’din id-dinja, fejn Alla
sejħilna biex nimxu, u fl-istess ħin hi miftuħa
għall-eternità, għax isserraħ fuq Alla, li hu dejjem fidil.
Ma rridux ninsew: Alla hu dejjem fidil; Alla hu dejjem fidil magħna.
La permezz tal-Magħmudija qomna ma’ Kristu, bid-don tal-fidi, għal
wirt li ma jitħassarx, dan iwassalna biex infittxu aktar
il-ħwejjeġ ta’ Alla, biex naħsbu iżjed dwarU, biex nitolbuh
iżjed. Li aħna Nsara ma jfissirx sempliċement li nobdu
l-ordinijiet, imma jfisser li nkunu fi Kristu, naħsbu bħalU,
naġixxu bħalU, inħobbu bħalU; u nħalluH jieħu
f’idejh ir-riedni tal-ħajja tagħna u jibdilha, jittrasformaha,
jeħlisha mid-dlamijiet tal-ħażen u tad-dnub.
Għeżież ħuti, lil dawk li
jitolbuna nagħtuhom tweġiba ta’ l-għala tat-tama li għandna
fina (ara 1 Piet 3:15), ejjew nuruhom lil Kristu Rxoxt. Nuruhulhom
bit-tħabbira tal-Kelma, imma fuq kollox bl-istess ħajja tagħna
li qamet miegħU. Nuruhom kemm aħna ferħana li aħna
wlied Alla, u l-libertà li għandna għax qed ngħixu fi Kristu, li
hi l-libertà vera, dik li ssalvana mill-jasar tal-ħażin, tad-dnub, tal-mewt! Indawru
ħarsitna lejn Pajjiżna tas-Sema, u hekk ikollna dawl u qawwa
ġdida anki fl-impenn tagħna u fil-ħidmiet tagħna ta’
kuljum. Hu servizz prezzjuż li jeħtieġ nagħtu lil din
id-dinja tagħna, li spiss m’għadhiex kapaċi tgħolli
ħarsitha ’l fuq, m’għadhiex kapaċi tgħolli ħarsitha
lejn Alla.
miġjuba mit-Taljan għall-Malti minn
Francesco Pio Attard