UDJENZA
ĠENERALI
L-Erbgħa
5 ta’ Settembru
2018
Katekeżi
fuq il-Kmandamenti: 7.
Jum il-mistrieħ
Għeżież
ħuti, l-għodwa t-tajba!
Il-vjaġġ
mad-Dekalogu llum iwassalna għall-kmandament fuq il-jum tal-mistrieħ.
Jidher kmandament ħafif biex inwettquh, imma din hi impressjoni
żbaljata. Li tistrieħ tassew mhuwiex sempliċi, għax hemm
mistrieħ falz u hemm mistrieħ veru. Kif nistgħu nagħrfuhom
minn xulxin?
Is-soċjetà
tal-lum hi għatxana għad-divertiment u l-vaganzi. L-industrija
tad-distrazzjoni qed tikber mhux ħażin u l-pubbliċità
tpinġi d-dinja ideali bħala park kbir tal-logħob fejn
kulħadd jiddeverti. Il-kunċett dominanti tal-ħajja fi żmienna m’għadx għandu l-fus
tiegħu fil-ħidma u fl-impenn, imma fil-ħarba. Naraw kif nagħmlu l-flus ħalli nkunu
nistgħu niddevertu, biex nissodisfaw lilna nfusna. Ix-xbieha-mudell hi dik
ta’ persuna ta’ suċċess li tista’ tippermetti lilha nfisha spazji
wiesgħa u diversi ta’ pjaċir. Imma din il-mentalità twassal għaż-żelqa
lejn in-nuqqas ta’ sodisfazzjon ta’ ħajja lluppjata mid-divertiment li mhuwiex
veru mistrieħ, imma aljenazzjoni u ħarba mir-realtà. Il-bniedem qatt
ma straħ daqskemm qed jistrieħ illum, u madankollu qatt daqs illum il-bniedem
ma daq tant vojt! Il-possibbiltajiet ta’ divertiment, ta’ ħruġ, ta’
safar fuq il-cruise liners, ta’ vjaġġi,
ta’ tant affarijiet oħra, ma jimlewlekx qalbek. Anzi: ma jserrħukx.
Kliem id-Dekalogu
jfittex u jsib il-qalba tal-problema, billi jixħet dawl differenti fuq
x’inhu l-mistrieħ veru. Il-kmand għandu aspett partikulari:
jagħti motivazzjoni. Il-mistrieħ f’isem il-Mulej għandu motiv
preċiż: “Għax f’sitt ijiem il-Mulej għamel is-smewwiet u
l-art; il-baħar u kulma hemm fihom, u strieħ fis-seba’ jum.
Għalhekk il-Mulej bierek is-seba’ jum u qaddsu” (Eż 20:11).
Dan jeħodna
lura għal tmiem l-opra tal-ħolqien, meta jingħad: “U ħares
Alla lejn kulma kien għamel, u, ara, kollox kien tajjeb ħafna”
(Ġen 1:31). U allura jibda jum il-mistrieħ, li hu l-ferħ ta’
Alla għal kulma ħalaq. Hu l-jum tal-kontemplazzjoni u tal-barka.
Mela, skont dan
il-kmandament, liema hu l-veru mistrieħ? Huwa l-mument
tal-kontemplazzjoni, hu l-mument tat-tifħir, mhux tal-ħarba. Hu
ż-żmien biex inħarsu lejn ir-realtà u ngħidu: kemm hi
sabiħa l-ħajja! Kontra l-mistrieħ bħala ħarba
mir-realtà, id-Dekalogu jurina l-mistrieħ bħala barka tar-realtà. Għalina l-Insara, iċ-ċentru ta’
jum il-Mulej, il-Ħadd, hi l-Ewkaristija, li tfisser “radd il-ħajr”. Hu l-jum biex lil Alla ngħidulu: grazzi,
Mulej, tal-ħajja, tal-ħniena tiegħek, tad-doni kollha
tiegħek. Il-Ħadd mhuwiex jum biex inħassru l-ġranet
l-oħra imma biex niftakru fihom, inberkuhom u nagħmlu paċi ma’
ħajjitna. Kemm persuni għandhom tant possibbiltajiet biex jiddivertu,
u xorta ma jgħixux fil-paċi mal-ħajja! Il-Ħadd hu l-jum
biex nagħmlu paċi mal-ħajja, billi ngħidu: il-ħajja hi
prezzjuża; mhijiex ħafifa, xi drabi hi ta’ tbatija, imma hi
prezzjuża.
Hi l-opra ta’ Alla
fina li ddaħħalna fil-mistrieħ veru, imma dan jitlob minna li
nitbiegħdu mis-saħta u mill-faxxinu tagħha (ara
Eżortazzjoni appostolika Evangelii
gaudium, 83). Fil-fatt hu faċli ħafna li nimlew qalbna
b’ħafna dwejjaq bla bżonn, għax neħlu ma’ raġunijiet
għala m’għandniex inkunu ferħana. Il-barka u l-ferħ jitolbu
ftuħ tal-qalb għal dak li hu tajjeb u dan hu mod matur ta’ kif
taġixxi l-qalb. It-tajjeb jimxi bl-imħabba u qatt ma jimponi
ruħu. Jitlob minna biss li nagħżluh.
Il-paċi
aħna rridu nagħżluha, ma timponix ruħha fuqna u lanqas se nsibuha
b’kumbinazzjoni. Waqt li jitbiegħed mill-għeluq morr ta’ qalbu,
il-bniedem għandu bżonn jagħmel paċi ma’ dak li minnu qed
jaħrab. Hemm bżonn nirrikonċiljaw ruħna mal-istorja
tagħna, bil-fatti li ma nistgħux naċċettaw, bil-partijiet
diffiċli ta’ ħajjitna. Nistaqsikom: kull wieħed u waħda
minnkom irnexxielu jirrikonċilja ruħu mal-istorja tiegħu?
Mistoqsija biex taħsbu fuqha: jiena rrikonċiljajt ruħi
mal-istorja tiegħi? Fil-fatt, il-paċi vera mhix qiegħda f’li
nibdlu l-istorja tagħna, imma f’li nilqgħuha, nagħtuha valur,
hekk kif ġrat.
Kemm drabi ltqajna
ma’ Nsara morda li farrġuna b’serenità li ma ma ssibhiex f’min dejjem
igawdi u fl-edonisti! U rajna persuni umli u foqra jithennew bi grazzji
ċkejknin b’ferħ li għandu minn tal-eternità.
Jgħid
il-Mulej fid-Dewteronomju: “Il-ħajja u l-mewt, li jien illum qegħedt
quddiemek, il-barka u s-saħta. Agħżel il-ħajja biex
tgħix int u nislek” (30:19). Din l-għażla hi l-“fiat” tal-Verġni Marija, hi
ftuħ għall-Ispirtu s-Santu li jpoġġina fuq il-passi ta’
Kristu, dak li fil-mument l-iżjed traġiku jqegħedna fi ħdan
il-Missier u hekk jiftħilna t-triq li twassalna għall-qawmien.
Meta ssir
sabiħa l-ħajja? Meta nibdew naħsbu tajjeb dwarha, tkun xi tkun
l-istorja tagħna. Meta d-don ta’ dubju jagħmel wisa’ għal dak li
kollox hu grazzja,[1] u dak
il-ħsieb qaddis iġarraf il-ħajt interjuri tan-nuqqas ta’
sodisfazzjon u jġib il-mistrieħ veru. Il-ħajja ssir sabiħa
meta niftħu qalbna għall-Providenza u niskopru kemm huwa minnu dak li
jgħid is-Salm: “F’Alla biss il-mistrieħ ta’ ruħi” (62:2). Kemm
hi sabiħa din il-frażi tas-Salm: “F’Alla biss il-mistrieħ ta’
ruħi”.
miġjub mit-Taljan għall-Malti minn
Francesco Pio Attard
[1] Kif tfakkarna Santa Tereża tal-Bambin
Ġesù, meħud minn G. Bernanos, Diario
di un curato di campagna,
Milano 1965, 270.