PAPA
FRANĠISKU
UDJENZA
ĠENERALI
Pjazza
San Pietru - L-Erbgħa 3 ta’
April 2013
Għeżież ħuti,
l-għodwa t-tajba,
Il-lum qed naqbdu mill-ġdid il-Katekeżi
tas-Sena tal-Fidi. Fil-Kredu ntennu din l-espressjoni:
“Fit-tielet jum qam minn bejn l-imwiet skont il-Kotba
Mqaddsa”. Din hi propju l-ġrajja li qed niċċelebraw:
il-Qawmien ta’ Ġesù, ċentru tal-messaġġ Nisrani, imtenni sa
mill-bidu u mgħoddi biex jasal għandna. San Pawl jikteb hekk
lill-Insara ta’ Korintu: “Qabel xejn, jien
għallimtkom dak li tgħallimt jien, jiġifieri, li Kristu miet minħabba
dnubietna, skond l-Iskrittura; difnuh u qam mill-imwiet fit-tielet jum, skond
l-Iskrittura. U deher lil Kefa, u mbagħad lit-Tnax” (1 Kor
15:3-5). Din l-istqarrija qasira ta’ fidi tħabbar sewwa sew
il-Misteru ta’ l-Għid, bl-ewwel dehriet ta’ l-Irxoxt lil Pietru u
lit-Tnax: il-Mewt u l-Qawmien ta’ Ġesù huma sewwa sew il-qalba
tat-tama tagħna. Mingħajr din il-fidi fil-mewt u
fil-qawmien ta’ Ġesù, it-tama tagħna tkun dgħajfa, anzi lanqas
tkun tama, għax propju l-mewt u l-qawmien ta’ Ġesù huma l-qalba
tat-tama tagħna. L-Appostlu jżid jgħid: “U jekk Kristu ma
kienx imqajjem, fiergħa l-fidi tagħkom, u intom għadkom fi
dnubietkom” (v. 17). B’xorti ħażina, spiss kien hemm min fittex
li jitfa’ dell fuq il-fidi fil-Qawmien ta’ Ġesù, u anki fost dawk stess li
jemmnu ddaħħlu d-dubji. Din hi xi ftit il-fidi “tal-qoxra”, kif
ngħidu aħna; m’hix il-fidi b’saħħitha. U dan
minħabba s-superfiċjalità, xi kultant minħabba l-indifferenza,
għax aħna mħabbtin b’elf ħaġa oħra li nqisu iktar
importanti mill-fidi, jew anki minħabba viżjoni orizzontali biss
tal-ħajja. Imma hu sewwa sew il-Qawmien li jiftħilna qalbna
għat-tama l-iktar kbira, għax jiftħilna ħajjitna u
l-ħajja tad-dinja għall-futur etern ta’ Alla, għall-hena
sħiħ, għaċ-ċertezza li l-ħażen, id-dnub,
il-mewt jistgħu jintrebħu. U dan iwassalna biex ngħixu
b’iżjed fiduċja r-realtajiet ta’ kuljum, naffrontawhom
bil-kuraġġ u l-impenn. Il-Qawmien ta’ Kristu jdawwal b’dawl
ġdid dawn ir-realtajiet ta’ kuljum. Il-Qawmien ta’ Kristu hu l-qawwa
tagħna!
Imma kif tgħaddiet lilna l-verità tal-fidi
fil-Qawmien ta’ Kristu? Fit-Testment il-Ġdid għandna
żewġ tipi ta’ xhieda: xi wħud huma fl-għamla ta’ stqarrija
ta’ fidi, jiġifieri ta’ formuli sintetiċi li jippuntaw lejn il-qalba
tal-fidi tagħna; oħrajn, min-naħa l-oħra, huma
fl-għamla ta’ rakkont tal-ġrajja tal-Qawmien u tal-fatti marbuta
miegħu. Ta’ l-ewwel: l-għamla ta’ l-istqarrija tal-fidi,
ngħidu aħna, hi dik li għadna kemm smajna, jew dik ta’ l-Ittra
lir-Rumani fejn San Pawl jikteb: “Għax jekk inti tistqarr b’fommok ‘Ġesù hu
l-Mulej’, u temmen b’qalbek li Alla qajmu mill-imwiet, inti ssalva” (10:9). Sa mill-ewwel passi tal-Knisja hi
diġà soda u ċara l-fidi fil-Misteru tal-Mewt u l-Qawmien ta’
Ġesù. Il-lum, imma, nixtieq nieqaf fuq it-tieni, fuq ix-xhieda
fl-għamla ta’ rakkont, li nsibu fil-Vanġeli. Qabel xejn
ninnutaw li l-ewwel xhieda ta’ din il-ġrajja kienu n-nisa. Kmieni
mas-sebħ, huma jinġabru ħdejn il-qabar biex jidilku l-ġisem
ta’ Ġesù, u jsibu l-ewwel sinjal: il-qabar vojt (ara Mk 16:1).
Imbagħad tiġi l-laqgħa ma’ Messaġġier ta’ Alla li
jħabbrilhom: Ġesù ta’ Nazareth, il-Mislub, m’huwiex hawn, qam (ara
vv. 5-6). In-nisa huma mqanqla mill-imħabba u jafu jilqgħu din
l-aħbar bil-fidi: jemmnu, u minnufih jgħadduha, ma jżommuhiex
għalihom, ixandruha. Il-ferħ li jafu li Ġesù hu ħaj,
it-tama li timla l-qalb, ma jistgħux iżommuhom għalihom
infushom. Dan għandu jseħħ ukoll f’ħajjitna.
Ejjew inħossuh il-ferħ li aħna Nsara! Aħna nemmnu fi
Rxoxt li rebaħ fuq il-ħażen u fuq il-mewt! Ħa jkollna
l-kuraġġ li “noħorġu” biex inwasslu dan il-ferħ u dan
id-dawl fl-irkejjen kollha tal-ħajja tagħna! Il-Qawmien ta’
Kristu hu l-akbar ċertezza li għandna; hu t-teżor l-aktar
prezzjuż! Kif nistgħu ma naqsmux ma’ l-oħrajn dan
it-teżor, din iċ-ċertezza? M’hix biss għalina, imma
qiegħda hemm biex ngħadduha, biex nagħtuha lill-oħrajn,
naqsmuha ma’ l-oħrajn. Hi tabilħaqq ix-xhieda tagħna.
Element ieħor. Fl-istqarrija tal-fidi
tat-Testment il-Ġdid, bħala xhieda tal-Qawmien insibu
mniżżla biss irġiel, l-Appostli, imma mhux in-nisa. Dan
għax, skond il-Liġi Lhudija ta’ dak iż-żmien, in-nisa u
t-tfal ma setgħux jagħtu xhieda li tista’ toqgħod fuqha, li
titwemmen. Fil-Vanġeli, imma, in-nisa għandhom rwol primarju, fundamentali.
Hawn insibu element favur l-istoriċità tal-Qawmien: kieku dan kien fatt
ivvintat, fil-kuntest ta’ dak iż-żmien ma kienx sa jintrabat
max-xhieda ta’ nisa. Imma l-evanġelisti jirrakkuntaw
sempliċement dak li seħħ: l-ewwel xhieda tat-twelid ta’
Ġesù huma r-rgħajja, nies sempliċi u umli; l-ewwel xhieda
tal-Qawmien huma n-nisa. U dan hu s-sabiħ. U din hi xi ftit
jew wisq il-missjoni tan-nisa: ta’ l-ommijiet, tan-nisa! Li jagħtu
xhieda quddiem uliedhom, quddiem in-neputijiet, li Ġesù hu ħaj, hu
dak li jgħix, hu qam mill-mewt. Ommijiet u nisa, ibqgħu agħtu din ix-xhieda! Għal Alla, li tiswa hi l-qalb, kemm
aħna miftuħin għaliH, jekk aħniex bħal tfal li jafu
jafdaw. Imma dan iġegħilna nirriflettu wkoll fuq kif in-nisa,
fil-Knisja u fil-mixja tal-fidi, kellhom u anki l-lum għandhom rwol
partikulari li bih jiftħulna l-bibien għall-Mulej, jimxu warajh u
jħabbru l-Wiċċ tiegħu, għax il-ħarsa tal-fidi
dejjem għandha bżonn tal-ħarsa sempliċi u profonda ta’
l-imħabba. L-Appostli u d-dixxipli jsibuha iżjed bi tqila biex
jemmnu. In-nisa le. Pietru jiġri lejn il-qabar, imma jieqaf
mal-qabar vojt; Tumas irid imiss b’idejh il-ġrieħi tal-ġisem ta’
Ġesù. Anki fil-mixja tal-fidi tagħna hu importanti li nkunu
nafu u nħossu li Alla jħobbna, u ma nibżgħux inħobbuh:
il-fidi tiġi mistqarra bil-fomm u bil-qalb, bil-kelma u bl-imħabba.
Wara d-dehriet lin-nisa, jiġu oħrajn:
Ġesù jsir preżenti b’mod ġdid: hu l-Mislub, imma ġismu hu
glorjuż; ma reġax lura għall-ħajja ta’ din l-art, imma
għal kundizzjoni ġdida. Għall-bidu ma jagħrfuhx, u
huwa biss għal kliemu u għall-ġesti tiegħu li
l-għajnejn jinfetħu: il-laqgħa ma’ l-Irxoxt tibdel, tagħti
qawwa ġdida lill-fidi, pedament li ma jitfarrakx. Anki fil-każ
tagħna hemm tant sinjali li fihom l-Irxoxt iħallina nagħrfuh:
l-Iskrittura Mqaddsa, l-Ewkaristija, is-Sagramenti l-oħra, il-karità, dawk il-ġesti ta’ mħabba li jġorru fihom
raġġ ta’ l-Irxoxt. Inħallu jdawwalna l-Qawmien ta’ Kristu,
inħallu l-qawwa tiegħu tibdilna, biex anki permezz tagħna
fid-dinja s-sinjali tal-mewt iħallu posthom lis-sinjali
tal-ħajja. Qed nara ħafna żgħażagħ
fil-pjazza. Arahom! Lilkom ngħidilkom: wasslu din
iċ-ċertezza: il-Mulej hu ħaj u jimxi magħna fil-ħajja
tagħna. Din hi l-missjoni tagħkom! Ġorru fikom din
it-tama. Ankraw ruħkom f’din it-tama: din l-ankra li hi fis-Sema;
żommu sod il-ħabel f’idejkom, kunu ankrati u mexxu ’l quddiem din
it-tama. Intom, xhieda ta’ Ġesù, agħtu xhieda li Ġesù hu
ħaj u dan jagħtina t-tama, jagħti t-tama lil din id-dinja xi
ftit imxejħa bil-gwerer, bil-ħażen, bid-dnub. Imxu,
żgħażagħ!
miġjuba mit-Taljan għall-Malti minn
Francesco Pio Attard