IL-PAPA FRANĠISKU
UDJENZA
ĠENERALI
Pjazza
San Pietru - L-Erbgħa 15 ta’ Mejju 2013
Għeżież
ħuti, l-għodwa t-tajba!
Il-lum nixtieq nieqaf nitkellem fuq l-azzjoni li
l-Ispirtu s-Santu jwettaq biex imexxi lill-Knisja u lil kull wieħed u
waħda minna lejn il-Verità. Ġesù nnifsu jgħid hekk lid-dixxipli: “iwassalkom għall-verità
kollha” (Ġw 16:13),
billi hu nnifsu hu “l-Ispirtu tal-verità” (ara
Ġw 14:17; 15:26; 16:13).
Qed ngħixu fi żmien ta’ ħafna
xettiċiżmu fil-konfront tal-verità. Benedittu
XVI kemm-il darba tkellem dwar ir-relattiviżmu, jiġifieri dwar it-tendenza li
nżommu li m’hemm xejn definittiv u li naħsbu li l-verità tiġi mill-kunsens tagħna jew
minn dak li rridu aħna. Tqum il-mistoqsija: Teżisti
tassew il-verità? Liema
hi l-verità? Nistgħu nagħrfuha? Nistgħu
nsibuha? Hawn tiġini f’moħħi l-mistoqsija tal-Prokuratur
Ruman Ponzju Pilatu meta Ġesù jurih x’inhu s-sens profond tal-missjoni
tiegħu: “U l-verità x’inhi?” (Ġw
18:37-38). Pilatu ma jirnexxilux jifhem li l-Verità qiegħda
quddiemu, ma jirnexxilux jara f’Ġesù l-wiċċ tal-verità, li hu l-wiċċ ta’ Alla. U safrattant,
Ġesù hu propju dan: il-Verità,
li, fil-milja taż-żminijiet, “sar[et] laħam” (Ġw 1:1,14), ġiet fostna biex
aħna nagħrfuha. Il-verità ma taqbadhiex
b’idejk kif tagħmel b’oġġett, il-verità tiltaqa’
magħha. M’hix oġġett li tippossedi, hi laqgħa ma’
Persuna.
Imma min sa jurina li Ġesù hu l-Kelma tal-verità, l-Iben
waħdieni ta’ Alla l-Missier? San Pawl jgħallem li “ħadd ma
jista’ jgħid: ‘Ġesù hu l-Mulej!’ jekk mhux imqanqal mill-Ispirtu
s-Santu” (1 Kor 12:3). Hu sewwa sew l-Ispirtu s-Santu, id-don ta’ Kristu
Rxoxt, li jlaqqagħna mal-Verità.
Ġesù jsejjaħlu l-“Paraklitu”, jiġifieri “dak li jaqbeż
għalina fil-bżonn”, li jimxi magħna biex iqawwina f’din il-mixja
ta’ għarfien; u, fl-Aħħar Ikla, Ġesù jiżgura
lid-dixxipli tiegħu li l-Ispirtu s-Santu se jgħallimhom kollox, u
jfakkarhom fil-kliem li qalilhom (ara Ġw 14:26).
Mela liema hi l-azzjoni ta’ l-Ispirtu s-Santu
fil-ħajja tagħna u fil-ħajja tal-Knisja li tiggwidana lejn
il-verità? Qabel
xejn, hu jistampa fil-qlub ta’ dawk li jemmnu u jfakkarhom il-kelmiet li
Ġesù qal, u, propju permezz ta’ dawn il-kelmiet, il-liġi ta’ Alla –
kif kienu ħabbru l-profeti tat-Testment il-Qadim – tiġi mnaqqxa fuq
qalbna u ssir fina prinċipju ta’ valutazzjoni fl-għażliet li
nagħmlu u ta’ gwida fl-għemejjel ta’ kuljum, issir prinċipju
tal-ħajja. Hawn isseħħ il-profezija kbira ta’
Eżekjel: “Tissaffew mit-tinġis kollu tagħkom; mill-idoli kollha tagħkom insaffikom. U nagħtikom
qalb ġdida, u ruħ ġdida nqiegħed ġo fikom… U nqiegħed ruħi ġo fikom, u nagħmel li timxu skond il-kmandamenti
tiegħi, u li żżommu
l-preċetti tiegħi
u tħarsuhom” (36:25-27). Fil-fatt, hu mill-istess ġewwieni tagħna li jitwieldu
l-għemejjel tagħna: hi propju l-qalb li trid iddur lejn Alla, u
l-Ispirtu s-Santu jibdilha jekk aħna nkunu lesti li ninfetħu
għaliH.
L-Ispirtu s-Santu, imbagħad, kif wegħidna
Ġesù, imexxina “għall-verità kollha”
(Ġw 16:13); imexxina mhux biss lejn il-laqgħa tagħna ma’
Ġesù, milja tal-Verità, imma jmexxina wkoll ġol-Verità, jiġifieri
jdaħħalna f’komunjoni dejjem iżjed profonda ma’ Ġesù, u
jagħtina l-għerf tal-ħwejjeġ ta’ Alla. U dan ma
nistgħux nilħquh bis-saħħa tagħna. Jekk Alla ma
jdawwalniex minn ġewwa, il-fatt li aħna Nsara jibqa’
superfiċjali. It-Tradizzjoni tal-Knisja tistqarr li l-Ispirtu
tal-verità jaħdem fil-qalb tagħna u jnissel dak
is-“sens tal-fidi” (sensus fidei) li permezz tiegħu, kif jafferma
l-Konċilju Vatikan II, il-Poplu ta’ Alla, taħt il-gwida
tal-Maġisteru, jintrabat għal dejjem mal-fidi mgħoddija
lilu, jifhimha tajjeb u aktar fil-fond, u japplikaha b’mod iktar sħiħ
fil-ħajja (ara Kostituzzjoni Dommatika Lumen gentium,
12). Nippruvaw nistaqsu lilna nfusna: Jien miftuħ/a
għall-azzjoni ta’ l-Ispirtu s-Santu, nitolbu jagħtini d-dawl,
jagħmilni aktar sensibbli għall-ħwejjeġ ta’ Alla? Din
hi talba li għandna nagħmlu ta’ kuljum: “Spirtu s-Santu, agħmel
li qalbi tkun miftuħa għall-Kelma ta’ Alla, li l-qalb tiegħi
tkun miftuħa għat-tajjeb, li l-qalb tiegħi tkun miftuħa
kuljum għall-ġmiel ta’ Alla”. Nixtieq nagħmel din
il-mistoqsija lilkom ilkoll: Kemm minnkom jitolbuh kuljum lill-Ispirtu
s-Santu? Forsi huma ftit, imma jeħtieġ nissodisfaw din ix-xewqa
ta’ Ġesù u nitolbu kuljum lill-Ispirtu s-Santu, biex jiftħilna qalbna
għal Ġesù.
Naħsbu f’Marija, li “baqgħet tgħożż
f’qalbha dawn il-ħwejjeġ
kollha u taħseb fuqhom bejnha u bejn ruħha” (Lq 2:19,51). Biex il-kelmiet u
l-veritajiet tal-fidi jsiru ħajja fina, jeħtieġ nilqgħuhom
taħt id-dawl ta’ l-Ispirtu s-Santu. F’dan is-sens tajjeb li
nitgħallmu minn Marija, nerġgħu ngħixu l-“iva” tagħha,
id-disponibbiltà totali tagħha biex tilqa’ lill-Iben ta’ Alla
f’ħajjitha, li minn dak il-waqt ’il quddiem ġiet mibdula.
Permezz ta’ l-Ispirtu s-Santu, il-Missier u l-Iben jiġu jgħammru
fostna: aħna ngħixu f’Alla u b’Alla. Imma l-ħajja
tagħna tassew hi mmexxija minn Alla? Kemm ħwejjeġ oħra
npoġġi qabel Alla?
Għeżież ħuti, għandna
bżonn inħallu d-dawl ta’ l-Ispirtu s-Santu jimlina, biex Hu
jlaqqagħna mal-Verità ta’ Alla, li
hu s-Sid waħdieni ta’ ħajjitna. F’din is-Sena
tal-Fidi nistaqsu lilna nfusna jekk konkretament għamilniex xi
pass biex insiru nafu iktar lil Kristu u l-veritajiet tal-fidi, bil-qari u
l-meditazzjoni ta’ l-Iskrittura Mqaddsa, bl-istudju tal-Katekiżmu,
bil-frekwenza kostanti tas-Sagramenti. Imma fl-istess ħin nistaqsu
lilna nfusna liema passi qed nagħmlu biex tkun il-fidi li torjenta
l-eżistenza kollha tagħna. Ma jeżistux Insara “tal-mument”,
li jkunu hemm biss f’xi waqtiet, f’xi ċirkustanzi, f’xi
għażliet. Ma nistgħux inkunu Nsara hekk, għax
aħna Nsara l-ħin kollu! Totalment! Jalla l-verità ta’ Kristu, li l-Ispirtu
s-Santu jgħallimna u jagħtina bħala don,
taffettwa għal dejjem u b’mod sħiħ il-ħajja tagħna ta’
kuljum. Insejħulu iżjed ta’ spiss, biex idawwalna fit-triq
tad-dixxipli ta’ Kristu. Insejħulu kuljum. Qed
nagħmlilkom din il-proposta: insejħulu kuljum lill-Ispirtu s-Santu,
biex hekk l-Ispirtu s-Santu jqarribna lejn Ġesù Kristu.
miġjuba mit-Taljan għall-Malti minn
Francesco Pio Attard