Il-Papa Franġisku minn Dar Santa Marta Ix-xitan hemm qiegħed, anki fis-seklu 21 Il-Ġimgħa11 ta' April 2014
Ejjew nitgħallmu mill-Vanġelu kif niġġieldu lid-demonju, afferma l-Papa Franġisku fil-quddiesa tal-lum fid-Dar Santa Marta. Il-Qdusija tiegħu enfasiżża li lkoll kemm aħna nkunu ttentati għax ix-xitan ma jridx li aħna nkunu qaddisin. Fil-fatt, il-ħajja nisranija hija taqbida mal-ħażen.
Il-ħajja ta' Ġesù kienet taqbida. Hu ġie biex jegħleb il-ħażen, biex jirbaħ fuq il-prinċep ta' did-dinja, biex jegħleb lid-demonju. Il-Papa Franġisku beda l-omelija b'din l-affermazzjoni, omelija dedikata kollha għall-ġlieda max-xitan. Taqbida, qal il-Papa, li kull nisrani jrid jaffaċċja. Id-demonju, saħaq il-Papa, ittanta lil Ġesù kemm-il darba u f'ħajtu Ġesù ħass it-tentazzjonijiet bosta drabi, minbarra li kellu l-persekuzzjonijiet. Aħna l-insara li rridu nimxu wara Ġesù jeħtiġilna nkunu nafuha sewwa din il-verità.
Aħna ukoll ikollna t-tentazzjonijiet, anki aħna suġġetti għall-attakki mid-demonju għax l-ispirtu tal-ħażen ma jridniex inkunu qaddisin, ma jridx ix-xhieda nisranija, ma jridx li aħna nkunu dixxipli ta' Ġesù.
Kif jagħmel l-ispirtu tal-ħażen biex ibegħedna minn Ġesù bit-tentazzjonijiet tiegħu, staqsa l-Papa? It-tentazzjoni tad-demonju għandha tliet karatteristiċi u aħna rridu nkunu nafuhom biex ma naqgħux fin-nassa.
Kif jagħmel id-demonju biex ibegħedna minn Ġesù? It-tentazzjoni tibda' bil-ftit imma tibqa' tissaħħaħ. It-tieni, minbarra li tissaħħaħ tniġġes lil xi ħaddieħor, tgħaddi għand l-oħrajn u ssir komunitarja. U fl-aħħar, biex titraqqad il-kuxjenza, tiġġustifika ruħha. Tikber, tniġġes u tiġġustifika ruħha.
L-ewwel tentazzjoni ta' Ġesù tidher qisha “seduzzjoni”. Ix-xitan jgħid lil Ġesù biex jintefa' għal isfel minn fuq it-tempju biex b'hekk, isostni x-xitan, kulħadd jgħid “araw lill-Messija”. L-istesss kif għamel ma' Adam u Eva: hija seduzzjoni. Ix-xitan, qal il-Papa, jitkellem kważi qiesu surmast spiritwali. U meta t-talba tiegħu tkun irrifjutata, jiġi lura b'aktar qawwa. Ġesù jgħid dan fil-Vanġelu ta' Luqa: meta niċħdu lid-demonju, hu jmur isib leġjun miegħu u jiġi lura magħhom. Għalhekk jitqawwa għax ikollu 'l min qiegħed miegħu.
Hekk ġara
ma' Ġesù, id-demonju jsib l-appoġġ tal-għedewwa tiegħu. U dak li
deher qisu ħajta ilma, ħajta ilma kalm, isir tempesta. It-tentazzjoni
tikber u tniġġes. U fl-aħħar tiġġustifika ruħha. Il-Papa fakkar li
meta Ġesù pprietka fis-sinagoga, l-għedewwa mill-ewwel ippruvaw
iċekknuh għax bdew jgħidu: dan mhux Bin Ġużeppi l-mastrudaxxa, Bin
Marija? Qatt ma mar l-università! B'liema awtorità qed jitkellem?
Ma studjax! Hekk, it-tentazzjoni daħlu fiha kollha, kulħadd kontra Ġesù. Il-quċċata ta' dan kollu, aktar qawwija mill-ġustifikazzjoni, żied il-Papa, hi dik tas-saċerdot meta jgħid: Mhux aħjar li jmut bniedem wieħed, biex insalvaw lill-poplu? Għandna tentazzjoni li tikber u tibqa' tikber u tniġġes lill-oħrajn. Naħsbu ftit dwar l-għijdut, kelma waħda...jien għandi ftit għira għal dik il-persuna, għall-oħra..... u l-ewwel nibda' ngħir għaliha ġo fija, waħdi, imbagħad ikolli bżonn naqsam ħsiebi ma' xi ħadd ieħor u ngħid: imma int rajtha lil dik il-persuna? U b'hekk tikber u tniġġes lil xi ħadd ieħor u lil xi ħadd ieħor.....
Dan hu l-mekkaniżmu tal-għijdut u lkoll kemm aħna jkollna t-tentazzjoni li nqassu! Forsi xi ħadd minnkom, jekk hu qaddis, le, imma anki jien kont ittentat biex nisparla! Din hi tentazzjoni ta' kuljum. Tibda' fin fin, ħelu ħelu bħall-ħajta ilma, tikber, tniġġes u tiġġustifika ruħha.
Noqgħodu
attenti, żied jgħid Franġisku, meta fi qlubna nħossu xi ħaġa li
tisġiċċa biex teqred lill-persuni. Noqgħodu attenti għax jekk ma
nieqfux fil-ħin, dik il-ħajta ilma, meta tikber u tniġġes issir
tempesta li twassalna biss biex niġġustifikaw il-ħażen li nkunu
għamilna, kif iġġustifikaw ruħhom dawn in-nies tal-Vanġelu meta
affermaw li aħjar imut wieħed għall-poplu. Ilkoll kemm aħna nkunu ttentati għax il-liġi tal-ħajja spiritwali, il-ħajja nisranija tagħna, hija taqbida, taqbida. Għax il-prinċep ta' did-dinja – id-demonju – ma jridx il-qdusija tagħna, ma jridx li aħna nimxu wara Kristu. Forsi xi ħadd minnkom jista' jgħid: Imma Padre, kemm int antikwat: titkellem dwar ix-xitan fis-seklu 21! Imma ħarsu 'l hawn, qal Franġisku, ix-xitan hemm qiegħed, anki fis-seklu 21! U niftħu għajnejna u ma nkunux boloħ, eh? Irridu nitgħallmu mill-Vanġelu kif niġġieldulu, temm il-Papa.
Mill-Kamra tal-Aħbarijiet ta' Radju Marija, Rabat, Malta. |