Il-Papa Franġisku minn Dar Santa Marta Il-Vanġelu ma jitħabbarx biex nikkonvinċu bi kliem għaref, imma bl-umiltà, It-Tnejn, 1 ta' Settembru 2014
Il-Vanġelu ma jitħabbarx biex nikkonvinċu bi kliem għaref, imma bl-umiltà, għaliex il-qawwa tal-Kelma t’Alla hi Ġesù stess u jista’ jilqgħu biss min għandu qalb miftuħa.
Wara l-waqfa tas-sajf, dalgħodu l-Papa Franġisku reġa’ beda l-omelija dwar il-qari tal-ġurnata waqt il-quddiesa li jiċċelebra kuljum fid-Dar Santa Marta.
Fil-kumment dwar il-qari l-Papa spjega x’inhi l-Kelma t’Alla u kif għandha tintlaqa’. San Pawl ifakkar lill-Korintin li hu kien ħabbar il-Vanġelu mingħajr ma bbaża’ l-argumenti tiegħu fuq kliem perswasiv u għaref.
“Pawlu jgħid: Imma jien ma ġejtx għandkom biex nikkonvinċikom bl-argumenti, bil-kliem jew bit-tixbihat sbieħ….. Le, jiena ġejt mod ieħor, bi stil ieħor. Jien ġejt bil-manifestazzjoni tal-Ispirtu u tal-qawwa tiegħu. Biex il-fidi tagħkom ma tieqafx fuq l-għerf tal-bniedem imma fuq il-qawwa t’Alla”.
Għalhekk, il-Kelma t’Alla hija hi xi ħaġa differenti, xi ħaġa li mhix l-istess bħall-kelma umana, bħall-kelma għarfa, kelma xjentifika, kelma filosofika….. le, hi xi ħaġa oħra. Tasal mod ieħor” qal Franġisku.
Dak hu li jiġri lil Ġesù meta jikkummenta l-Iskrittura fis-Sinagoga ta’ Nażaret, il-post fejn għex. Għall-bidu, in-nies tal-post ammirawh għal dak li kien qiegħed jgħid imma mbagħad irrabjaw u riedu joqtluh.
Għaddew min-naħa għal-oħra, spjega l-Papa, għax il-kelma t’Alla hija xi ħaġa differenti mill-kelma tal-bniedem. Fil-fatt, Alla jkellimna permezz ta’ Ibnu, li jfisser li l-Kelma t’Alla hija Ġesù, Ġesù stess, u Ġesù hu skandlu. Is-salib ta’ Kristu jiskandaliżża. U din hi l-qawwa tal-Kelma t’Alla: Ġesù Kristu, il-Mulej. U kif għandna nilqgħu l-Kelma t’Alla? Kif nirċievu lil Ġesù Kristu? Il-Knisja tgħidilna li Ġesù hu preżenti fl-Iskrittura, fil-Kelma tiegħu. Għalhekk, afferma l-Papa, hu tant importanti li matul il-ġurnata naqraw silta mill-Vanġelu.
“Għalfejn? Biex nitgħallmu?” Le! Biex insibu lil Ġesù, għaliex Ġesù jinsab propju fil-Kelma tiegħu, fil-Vanġelu tiegħu. Kull darba li jiena naqra l-Vanġelu nsib lil Ġesù.
Imma kif qed nirċevi din il-Kelma? Din għandha tintlaqa’ kif nilqgħu lil Ġesù, b’qalb miftuħa, b’qalb umli, bl-ispirtu tal-Beatitudnijiet. Għaliex Ġesù hekk ġie, fl-umlità. Ġie fil-faqar. Ġie bid-dilka tal-Ispirtu s-Santu.
Hu l-qawwa, kompla l-Papa, huwa l-Kelma t’Alla għax hu l-midluk mill-Ispirtu s-Santu. Aħna wkoll, jekk irridu nisimgħu u nirċievu l-Kelma t’Alla, irridu nitolbu lill-Ispirtu s-Santu u nitolbu din id-dilka tal-qalb li hi d-dilka tal-Beatitudnijiet. Qalb bħalma hi l-qalb tal-Beatitudnijiet.
Jagħmlilna tajjeb illum nistaqsu lilna nfusna: kif nirċeviha jien il-Kelma t’Alla? Qiesha xi ħaġa interessanti? Ah, is-saċerdot illum dan ipprietka….. kemm kien interessanti! Kemm hu għaref das-saċerdot!, Jew il-Kelma nirċeviha hekk, sempliċiment għax Ġesù hu ħaj?
U jien għandi ħila, isimgħu sewwa l-mistoqsija, jien għandi ħila nixtri ktieb tal-Evanġelu żgħir, li jiswa’ ftit flus? Ixtru ktieb tal-Vanġelu żgħir u ħuduh dejjem magħkom kull fejn tkunu, fil-basket, u meta tkunu tistgħu, matul il-jum, aqraw silta biex issibu lil Ġesù hemmhekk. Dawn iż-żewġ mistoqsijiet jagħmlulna tajjeb u jalla l-Mulej jgħinna, temm il-Qdusija Tiegħu.
|
