ŻJARA LILL-PARROĊĊA RUMANA
TA’ SANTA ELIŻABETTA U SAN ŻAKKARIJA
OMELIJA TAL-QDUSIJA TIEGĦU FRANĠISKU
Solennità tat-Trinità Qaddisa
Il-Ħadd 26 ta’ Mejju 2013
Fil-bidu tal-Quddiesa, wara t-tislima tal-Kappillan, il-Papa lissen dawn il-kelmiet.
Għażiża l-ewwel sentinella, għażiża tieni sentinella, għeżież sentinelli, għoġobni dak li għidt: li l-periferija għandha sens negattiv, imma anki sens pożittiv. Taf għaliex? Għax ir-realtajiet kollha flimkien jinftiehmu l-aħjar mhux miċ-ċentru, imma mill-periferiji. Jinftiehmu aħjar. Anki dan li għidt int: li nsiru sentinelli, le?
Nirringrazzjak ta’ dan l-uffiċċju, ta’ din il-ħidma tagħkom ta’ sentinella. Nirringrazzjakom ukoll tal-merħba tagħkom, f’dan il-jum tal-festa tat-Trinità. Hawn miegħi s-saċerdoti li intom tafuhom sew, li huma ż-żewġ segretarji tal-Papa, il-Papa li jgħix il-Vatikan, eħ? Il-lum hawn ġie l-Isqof! U dawn it-tnejn jaħdmu tajjeb. Imma wieħed minnhom, Dun Alfred, il-lum qed jagħmel l-anniversarju ta’ l-ordinazzjoni presbiterali tiegħu: 29 sena. Applaws! Nitolbu għalih u nitolbu għal ta’ l-inqas 29 sena oħra. Veru? Hekk nibdew il-Quddiesa, bi spirtu ta’ qima, fis-skiet, miġbura lkoll flimkien fit-talb għal kulħadd.
* * *
Il-Qdusija Tiegħu għamel l-omelija f’forma ta’ djalogu mat-tfal ta’ l-Ewwel Tqarbina.
Għeżież ħuti,
Il-Kappillan, fid-diskors tiegħu, fakkarni f’ħaġa sabiħa li għamlet il-Madonna. Meta l-Madonna, malli rċiviet l-aħbar li kellha ssir omm Ġesù, u anki l-aħbar li l-kuġina tagħha Eliżabetta kienet tqila – jgħid il-Vanġelu – qamet u marret tħaffef; ma stennietx. Ma qalitx: “Imma issa jiena tqila, u rrid nieħu ħsieb saħħti. Kuġinti aktarx għandha ħbieb oħra jgħinuha”. Hi ħasset xi ħaġa fiha u “marret tħaffef”. Kemm hu sabiħ dan il-ħsieb fuq il-Madonna, fuq l-Omm tagħna, li titlaq tħaffef, għax ġo fiha hemm din il-ħaġa: li tgħin. Titlaq biex tgħin, ma tmurx biex toqgħod tiftaħar u lil kuġintha tgħidilha: “Imma isma’, issa jien nikkmanda, għax jien Omm Alla!”. Le, m’għamlitx hekk. Marret biex tagħti l-għajnuna tagħha! U l-Madonna dejjem hekk. Hi l-Omm tagħna, li dejjem tiġi tħaffef meta aħna jkollna bżonnha. Tkun ħaġa sabiħa kieku mal-Litanija tal-Madonna nżidu waħda tgħid hekk: “Sinjura li titlaq tħaffef, itlob għalina!”. Kemm hi sabiħa, hux? Għax Hi dejjem titlaq tħaffef, Hi ma tinsihom qatt lil uliedha. U meta wliedha jinsabu f’xi diffikultà, għandhom xi bżonn u jitolbuha, Hi tiġi tħaffef. U dan jagħtina ċertezza, ċertezza li għandna lil Ommna magħna, dejjem maġenbna. Fil-ħajja nimxu aħjar jekk għandna qrib tagħna lil ommna. Ejjew naħsbu f’din il-grazzja ta’ Marija, din il-grazzja li hi tagħtina: li tkun qrib tagħna, imma mingħajr ma żżommna nistennew. Dejjem! Hi – u ejja nkunu fiduċjużi li hu hekk – qiegħda hemm biex tgħinna. Il-Madonna li dejjem tħaffef, għalina.
Il-Madonna tgħinna wkoll nifhmu tajjeb lil Alla, lil Ġesù, biex nifhmu tajjeb il-ħajja ta’ Ġesù, il-ħajja ta’ Alla, biex nifhmu tajjeb x’inhu l-Mulej, kif inhu l-Mulej, min hu Alla. Lilkom, tfal, nistaqsikom: “Min minnkom jaf min hu Alla?”. Għollu jdejkom. Għidli? Hekkhu! Il-Ħallieq tad-Dinja. U kemm-il Alla hemm? Wieħed? Imma lili qaluli li hemm tlieta: il-Missier, l-Iben u l-Ispirtu s-Santu! Dan kif nispjegawh? Hemm wieħed jew hemm tlieta? Wieħed? Wieħed? U kif nispjegawha din li wieħed hu l-Missier, l-ieħor l-Iben u l-ieħor l-Ispirtu s-Santu? Għajtu, għajtu! Tweġiba tajba. Huma tlieta f’wieħed, tliet persuni f’wieħed. U l-Missier x’jagħmel? Il-Missier hu l-bidu, il-Missier, li ħalaq kollox, ħalaq lilna. U l-Iben x’jagħmel? X’jagħmel Ġesù? Min jaf jgħidli x’jagħmel Ġesù? Iħobbna? U iżjed? Iwasslilna l-Kelma ta’ Alla! Ġesù jiġi biex jgħallimna l-Kelma ta’ Alla. Tajjeb ħafna! U mbagħad? X’għamel Ġesù fuq din l-art? Fdiena! U Ġesù ġie biex jagħti ħajtu għalina. Il-Missier jaħlaq id-dinja; Ġesù jifdina. U l-Ispirtu s-Santu x’jagħmel? Iħobbna! Jagħtik l-imħabba! It-tfal kollha flimkien: il-Missier joħloq lil kulħadd, joħloq id-dinja; Ġesù jifdina; u l-Ispirtu s-Santu? Iħobbna! U din hi l-ħajja Nisranija: nitkellmu mal-Missier, nitkellmu ma’ l-Iben u nitkellmu ma’ l-Ispirtu s-Santu. Ġesù fdiena, imma jimxi wkoll magħna fil-ħajja tagħna. Veru dan? U kif jimxi? X’jagħmel meta jimxi magħna fil-ħajja? Din diffiċli. Min iweġibha tajjeb jirbaħ id-derby! X’jagħmel Ġesù meta jimxi magħna? Għajtu! L-ewwel: jgħinna. Imexxina! Tajjeb ferm! Jimxi magħna, jgħinna, imexxina u jgħallimna kif nimxu ’l quddiem. U Ġesù jagħtina wkoll il-qawwa biex nimxu. Veru? Isostnina! Tajjeb! Fid-diffikultajiet, le? U anki fix-xogħol ta’ l-iskola! Isostnina, jgħinna, imexxina, isostnina. Hekkhu! Ġesù jimxi dejjem magħna. Tajjeb. Imma isma’, Ġesù jagħtina wkoll il-qawwa. Kif jagħtina l-qawwa Ġesù? Intom dan tafuh, kif jagħtina l-qawwa! Għajtu, m’iniex nisma’! Fit-Tqarbin jagħtina l-qawwa, jgħinna propju bil-qawwa tiegħu. Hu jiġi għandna. Imma meta intom tgħidu “jagħtina t-Tqarbin”, biċċa ħobż tista’ timliek b’tant qawwa? Dak kull ma hu mhux ħobż? Dak mhux ħobż? Hu ħobż? Dan hu ħobż, imma dak li hemm fuq l-altar hu ħobż jew le? Jidher ħobż! Imma propjament m’hux ħobż. Mela x’inhu? Hu l-Ġisem ta’ Ġesù. Ġesù jiġi fil-qalb tagħna. Hekkhu, ejjew naħsbu f’dan, ilkoll: il-Missier tana l-ħajja; Ġesù tana l-fidwa, jimxi magħna, imexxina, isostnina, jgħallimna; u l-Ispirtu s-Santu? X’jagħtina l-Ispirtu s-Santu? Iħobbna! Jagħtina l-imħabba. Naħsbu f’Alla b’dan il-mod u nitolbu lill-Madonna, Ommna l-Madonna, li dejjem tiġi tħaffef biex tgħinna, ħalli tgħallimna nifhmu tajjeb kif inhu Alla: kif hu l-Missier, kif hu l-Iben u kif hu l-Ispirtu s-Santu.
miġjuba mit-Taljan għall-Malti minn Francesco Pio Attard