MESSAĠĠ BIL-VIDJO TAL-QDUSIJA TIEGĦU FRANĠISKU
FL-OKKAŻJONI TA’ L-OSTENSJONI STRAORDINARJA
TAL-LIŻAR TA’ TURIN
Sibt il-Għid, 30 ta’ Marzu 2013
"Wiċċ ta’ persuna mejta, imma safrattant hu jħares lejna, u fis-skiet ikellimna."
Għeżież ħuti,
Anki jien nersaq magħkom quddiem il-Liżar imqaddes, u rrodd ħajr lill-Mulej li qed joffrilna, bl-għodda tal-lum, din il-possibbiltà.
Anki jekk qed iseħħ f’din l-għamla, dan l-att tagħna m’hux sempliċi osservazzjoni, imma hu qima, hu ħarsa li titlob. U ngħid iżjed: ifisser li nħalluH imexxina. Dan il-Wiċċ għandu l-għajnejn magħluqa, u l-wiċċ ta’ persuna mejta, imma safrattant hu jħares lejna, u fis-skiet ikellimna. Kif jista’ jkun dan? X’inhi din li l-poplu fidil, bħalma intom intom, jixtieq jieqaf quddiem din l-Ikona ta’ Bniedem imsawwat u mislub? Għax ir-Raġel tal-Liżar jistedinna nikkonetemplaw lil Ġesù ta’ Nazaret. Din ix-xbieha – immarkata fuq il-liżar – qed tkellem lil qalbna u timbuttana biex nitilgħu fuq l-Għolja tal-Kalvarju, biex inħarsu lejn l-għuda tas-Salib, u nintelqu fis-sikta elokwenti ta’ l-imħabba.
Mela ejjew inħallu tilħaqna din il-ħarsa, li m’hix tfittex lil għajnejna imma lil qalbna. Nisimgħu xi jrid jgħidilna, fis-skiet, hu li għadda mill-istess mewt għall-ħajja. Permezz tal-Liżar imqaddes taslilna l-Kelma waħdanija u aħħarija ta’ Alla: l-Imħabba li saret laħam, inkarnata fl-istorja tagħna; l-Imħabba kollha ħniena ta’ Alla li ħa fuqu l-ħażen kollu tad-dinja biex jeħlisna mill-ħakma tiegħu. Dan il-Wiċċ imbiċċer jixbah lil tant uċuħ ta’ rġiel u nisa miġruħa minn ħajja li ma tirrispettax id-dinjità tagħhom, minn gwerer u vjolenzi li jolqtu lill-iktar dgħajfa… Madankollu l-Wiċċ tal-Liżar jikkomunika paċi kbira; dan il-Ġisem ittorturat jesprimi maestà sovrana. Bħallikieku ħalla tgħaddi minnu enerġija miżmuma imma qawwija, donnu qed jgħidilna: Agħmlu l-qalb, ara taqtgħu jieskom; il-qawwa ta’ l-imħabba ta’ Alla, il-qawwa ta’ l-Irxoxt kollox tirbaħ.
Għalhekk, aħna u nikkontemplaw lill-Bniedem tal-Liżar, nagħmel tiegħi, f’dan il-waqt, it-talba li San Franġisk ta’ Assisi lissen quddiem il-Kurċifiss:
O Alla, l-aktar Għoli u Glorjuż,
dawwal id-dlamijiet ta’ qalbi.
U sawwab fija fidi vera,
tama ċerta u mħabba perfetta.
Agħtini, Mulej, li nħoss u nagħraf lilek
biex nagħmel ir-rieda vera u mqaddsa tiegħek. Ammen.
miġjub mit-Taljan għall-Malti minn Francesco Pio Attard