IL-PAPA FRANĠISKU
ANGELUS
Pjazza
San Pietru
Il-Ħadd,
9 ta’ Diċembru,
2018
Għeżież ħuti, il-jum it-tajjeb!
Il-Ħadd li għadda l-liturġija stednitna ngħejxu ż-żmien tal-Avvent u l-istennija tal-Mulej bl-atteġġjament tas-sahra u wkoll tat-talb: ishru u itolbu. Illum, it-tieni Ħadd tal-Avvent, il-liturġija qed turina kif inlaħħmu din l-istennija: billi nibdew mixja ta’ konverżjoni, u kif din l-istennija nagħmluha konkreta. Bħala gwida għal dil-mixja, l-Evanġelju jippreżentalna l-figura ta’ Ġwanni l-Għammiedi, li ġera mal-inħawi kollha tal-Ġordan jipprietka magħmudija ta’ konverżjoni għall-maħfra tad-dnubiet (Lq 3,3). Biex jiddeskrivi l-missjoni tal-Battista, l-evanġelista Luqa jikkwota l-profezija antika ta’ Iżaija li tgħid hekk: Leħen jgħajjat fid-deżert: ħejju t-triq għall-Mulej, iddrittaw il-mogħdijiet tiegħu. Kull wied jimtela, kull muntanja u għolja titbaxxa (vv. 4-5).
Biex inħejju t-triq tal-Mulej li ġej, jeħtieġ nagħtu każ tal-konverżjoni li qed jistedinna nagħmlu l-Battista. Liema huma l-esiġenzi ta’ konverżjoni ? Qabelxejn aħna msejħin biex nistgħadru l-art tagħna mill-ħofor tal-kesħa u l-indifferenza, nirriġenerawha billi ninfetħu għall-oħrajn bl-istess sentimenti ta’ Ġesù, jiġifieri b’dik il-kordjalità u l-attenzjoni fraterna li tgħabbi fuq spallejha l-ħtiġijiet tal-proxxmu. Inwittu l-ħofor li ġġib magħha l-indifferenza. Ma jistax ikollna relazzjoni ta’ mħabba, ta’ karità, ta’ fraternità mal-proxxmu jekk għad hemm ‘Il-ħofor” u daqstant ieħor ma nistgħux nimxu fi triq mimlija ħofor. Dan jitlob minna li nibdlu l-atteġġjament. U dan kollu nagħmluh bi premura speċjali lejn min hu fil-bżonn. Imbagħad jeħtieġ inwittu l-ħafna ħotob li ġġib magħha l-kburija u s-suppervja. Kemm nies, forsi bla ma jindunaw, huma suppervi, huma iebsin, neqsin minn relazzjoni ta’ kordjalità. Jeħtieġ ngħelbu dil-ġabra (ta’ indifferenzi) b’ġesti konkreti ta’ rikonċiljazzjoni ma’ ħutna, billi nitolbu maħfra għall-ħtijiet tagħna. Mhux faċli r-rikonċiljazzjoni. Dejjem naħsbu: “Min se jagħmel l-ewwel pass?”. F’dan jgħinna l-Mulej, jekk aħna jkollna rieda tajba. Infatti l-konverżjoni tkun sħiħa jekk twassalna nagħrfu bl-umiltà l-iżbalji tagħna, l-infedeltajiet tagħna, in-nuqqasijiet tagħna.
Min jemmen hu dak li għax joqrob lejn ħuh, bħal Ġwanni l-Għammiedi, jiftaħ triq fid-deżert, jiġifieri juri l-prospettivi tat-tama wkoll fil-kuntest eżistenzjali ta’ taħbit iebes, immarkat bil-falllimenti u t-telf. Ma nistgħux inċedu quddiem is-sitwazzjonijiet negattivi ta’ għeluq u rifjut; ma nistgħux inħallu l-mentalità tad-dinja tjassarna, għax iċ-ċentru ta’ ħajjitna hu Ġesù u l-kelma mdawwla ta’ mħabba u ta’ faraġ tiegħu. Huwa Hu! Il-Battista kien isejjaħ lin-nies ta’ żmienu għall-konverżjoni, bil-qawwa, bl-enerġija, bid-deċiżjoni. Madankollu, kien jaf jisma’, kien jaf jagħmel ġesti ta’ tenerezza, ġesti ta’ maħfra lill-għadd kbir ta’ rġiel u nisa li kienu jmorru għandu biex jistqarru dnubiethom u jitgħammdu bil-magħmudija tal-penitenza.
Ix-xhieda ta’ Ġwanni l-Battista, tgħinna nimxu ’l quddiem fix-xhieda tal-ħajja tagħna. Is-safa tal-aħbar li kien iwwasal, il-kuraġġ tiegħu li jxandar il-, irnexxilhom iqanqlu l-istennija u t-tama fil-Messija li għal żmien kenu mħeddla. Illum ukoll, id-dixxipli ta’ Ġesù huma msejħin biex ikunu xhieda tiegħu umli u kuraġġużi sabiex jerġgħu jixgħelu t-tama, biex ifehemu li, minkejja kollox, is-Saltna t’Alla għadha qed tinbena kull jum li jgħaddi bil-qawwa tal-Ispirtu s-Santu. Kull wieħed u waħda minna naħsbu: kif nista’ nibdel xi ħaġa fl-atteġġjament tiegħi biex inħejji t-triq għall-Mulej?
Il-Verġni Marija tgħinna nħejju jum wara ieħor it-triq tal-Mulej billi nibdew minna nfusna; u biex bil-paċenzja soda tagħna nxerrdu madwarna żerriegħa ta’ paċi, ta’ ġustizzja u ta’ fraternità.
Wara l-Angelus
Għeżież ħuti,
insellem minn qalbi lilkom ilkoll, pellegrini li ġejjin minn Ruma, mill-Italja u minn diversi nħawi tad-dinja.
Insellem b’mod partikolari lill-bosta żgħażagħ mid-djoċesi ta’ Orvieto-Todi. Grazzi u l-mixja tal-Avvent it-tajba!
Insellem lill-fidili minn Trapani, Caltagirone u Bronte, lil dawk li se jagħħmlu l-Griżma mill-oratorju ta’ Almè (Bergamo).
Awguri kordjali tal-Ħadd it-tajjeb lil kulħadd. U, jekk jogħġobkom, tinsewx titolbu għalija. Il-pranzu t-tajjeb u arrivederci!
Miġjub għall-Malti mit-Taljan minn Joe Huber