SOLENNITÀ TAL-IMMAKULATA KUNĊIZZJONI
TAL-BEATA VERĠNI MARIJA
IL-PAPA FRANĠISKU
ANGELUS
Pjazza
San Pietru
is-Sibt,
8 ta’ Diċembru,
2018
Għeżież ħuti, il-jum it-tajjeb u l-festa t-tajba!
Il-Kelma t’Alla llum ittina alternattiva. Fl-ewwel qari hemm raġel li fil-bidu jgħid le lil Alla u fl-Evanġelju hemm Marija li għall-aħbar tgħid iva lil Alla. Fiż-żewġ qari huwa Alla li qed ifittex lill-bniedem. Fl-ewwel każ imur għand Adam, wara d-dnub, u jistaqsih: “Fejn int?” (Ġen 3,9) u dan iwieġeb: “Inħbejt” (v. 10). Fit-tieni każ, imur għand Marija, bla tebgħa, li twieġeb: “Hawn hi l-qaddejja tal-Mulej” (Lu 1, 38). Hawn jien hu l-maqub ta’ qed nistaħba. Hawn jien jinfetaħ għal Alla, filwaqt li d-dnub jagħlaq, jiżola, iħallik waħdek miegħek innifsek.
Il-kelma hawn jien hi l-qofol tal-ħajja, Tittimbra l-mogħdija mill-ħajja oriżżontali, moħħha biss fiha nfisha u l-ħtiġijiet tagħha, għal ħajja vertikali, li titla’ lejn Alla. Hawn jien ifisser li tkun disponibbli għall-Mulej, hija l-kura għall-egoiżmu, u l-antidotu tal-ħajja insodisfatta li dejjem jonqosha xi ħaġa. Hawn jien hi r-rimedju kontra l-kallu tad-dnub, hija t-terapija biex nibqgħu żgħażagħ minn ġewwa. Hawn jien hi l-emmna li Alla għandu valur akbar mill-’jien’. Hi l-għażla li s-sigurtà tagħna huwa l-Mulej, li nkunu doċli għas-sorpriżi tiegħu. Għaldaqstant, hawn jien hu l-akbar tifħir li nistgħu noffrulu. Għaliex ma nibdewx il-ġurnata tagħna ngħidulu: “hawn jien, Mulej”? Ikun sabih li kull filgħodu ngħidu: “Hawn jien, Mulej, illum ħa jsir minni skont ir-rieda tiegħek”. Ngħiduha fit-talba tal-Angelus, imma nistgħu ntennuha anki issa, flimkien: “Hawn jien, Mulej ħa jsir minni skont ir-rieda tiegħek!”
Marija żżid “Ħa jsir minni skont kelmtek”. Ma tgħidx: “ħa jsir minni skont kelmti”, imma “skont kelmtek”. Lil Alla ma tgħamillux ħtian. Ma jgħaddix minn moħħha: nagħti ftit lilu, neħles, imbagħad nagħmel dak li jiftilli”. Le, Marija ma tħobbx lill-Mulej meta jidhrilha hi, bis-sulluzzu. Tgħejx bil-fiduċja f’Alla f’kollox u għal kollox. Dan hu s-sigriet tal-ħajja. Dak li jafda f’Alla f’kollox, kollox jista’. Iżda, għeżież ħuti, il-Mulej isofri meta nweġbuh bħal Adam: “qed nibża’ u nħbejt”. Alla hu teneru, l-aktar missier teneru, u jixtieq li wliedu jkollhom fiduċja fih. Iżda kemm drabi nissuspettaw fih, nissuspettaw f’Alla! Naħsbu li jista’ jibagħtilna xi ‘test’, jiċħdilna l-libertà, jabbandunana. Imma dan hu ingann kbir, hi t-tentazzjoni tal-bidu, it-tentazzjoni tax-xitan: bl-ingann idaħħal l-isfiduċja f’Alla. Marija tirbaħ din l-ewwel tentazzjoni bl-hawn jien tagħha. U llum inħarsu lejn is-sbuħija tal-Madonna, li twieldet u għexet bla dnub, dejjem doċli u trasparenti għal Alla.
Dan ma jfissirx li għaliha l-ħajja kienet faċli, le. Li tkun ma’ Alla mhix soluzzjoni maġika tal-problemi. Ifakkarulna t-tmiem tal-Evanġelju tal-lum: “L-anġlu telaq minn ħdejha” (v. 38). Telaq, huwa verb iebes. L-anġlu jħalli lil Mairja waħedha f’sitwazzjoni diffiċli. Hi kienet taf b’liema mod kellha ssir Omm Alla – kien qalulha l-anġlu – imma l-anġlu ma kienx mar jispjega dan lill-oħrajn, qalu lilha biss. U mill-ewwel bdew il-problemi: naħsbu ftit fis-sitwazzjoni irregolari fid-dawl tal-liġi, fit-turment li ħass San Ġużepp, fil-pjanijiet tal-ħajja li taru mar-riħ, dwar dak li kienu se jibdew jgħidu n-nies.. Iżda quddiem il-problemi Marija tqiegħed il-fiduċja tagħha f’Alla. U l-anġlu telaqha, iżda Hi temmen li magħha, fiha, baqa’ Alla. U jkollha l-fiduċja. Tafda f’Alla. Hi ċerta li mal-Mulej, anki jekk bla mistenni, kollox imur tajjeb. Dan hu l-atteġġjament dehni: li ma tgħejxx tiddependi mill-problemi – tispiċċa waħda u tinbet oħra! - imma bil-fiduċja f’Alla u billi kuljum nafdaw ruħna f’idejh: Hawn jien. “Hawn jien” hija l-kelma. “Hawn jien” hija t-talba. Nitolbu lill-Immakulta biex ittina l-grazzja li ngħejxu hekk.
Wara l-Angelus
Għeżież ħuti,
Illum fis-Santwarju ta’ Notre-Dame de Santa Cruz f’Oran, fl-Alġerija, qed jiġu dikjarati Beati l-Isqof Pietro Claviere u tmintax sħabu reliġjużi rġiel u nisa, li nqatlu minħabba l-mibgħeda lejn il-fidi. 19-il beati ġodda! Dawn il-martri ta’ żmienna kienu ħabbara fidili tal-Evanġelju, bennejja umli tal-paċi u xhieda erojċi tal-karità nisranija: isqof, saċerdoti, reliġjużi nisa, reliġjużi rġiel u lajċi. Ix-xhieda kuraġġuża tagħhom hi għajn ta’ tama għall-komunità kattolika Alġerina u żerriegħa ta’ djalogu għas-soċjetà kollha kemm hi. Jalla dil-beatifikazzjoni tkun għal kulħadd stimolu għall-bini ta’ dinja ta’ fraternità u solidarjetà. Nagħtu applaws lill-Beati l-ġodda, ilkoll flimkien.
Niżgura t-talb tiegħi għaż-żgħażagħ u l-omm li mietu dal-lejl f’disco f’Corinaldo, qrib Ancona, kif ukoll għall-bosta feruti. Nitlob l-interċessjoni tal-Madonna għal kulħadd.
Insellem minn qalbi lilkom, pellegrini li ġejjin mill-Italja u minn diversi pajjiżi, speċjalment il-familji, il-gruppi parrokkjali u l-assoċjazzjonijiet. F’dil-festa tal-Immakulata, fil-parroċċi Taljani tiġġedded is-sħubija fl-Azzjoni Kattolika, assoċjazzjoni li għal 150 sena baqgħet tkun don u riżorsa għall-mixja tal-Knisja fl-Italja. Nagħmel kuraġġ lill-oqsma djoċesani u parrokkjali biex jimpenjaw ruħhom fil-formazzjoni tal-lajċi ħalli dawn jiksbu l-ħila li jkunu xhieda tal-Evanġelju, u jsiru ħmira ta’ soċjetà aktar ġusta u solidali.
Inbierek minn qalbi lil-fidili minn Rocca di Papa u l-fjakkola li biha se jixgħelu l-istilla kbira fuq il-fortizza tal-belt tagħhom, ad unur ta’ Marija Immakulata.
Illum waranofsinhar se mmur Santa Maria Maggiore biex nitlob quddiem il-Madonna, u wara mmur Piazza di Spagna biex inġedded it-tradizzjon tal-qima u tat-talb f’riġlejn il-monument tal-Immakulata. Nitlobkom tingħaqdu miegħi spiritwalment f’dan il-ġest li jesprimi d-devozzjoni filjali lejn l-Omm Ċelesti tagħna.
U nawgura lil kulħadd il-festa t-tajba u l-mixja tal-Avvent it-tajba bil-gwida tal-Verġni Marija. Jekk jogħġobkom, tinsewx titolbu għalija. Il-pranzu t-tajjeb u arrivederci!
Miġjub għall-Malti mit-Taljan minn Joe Huber