Omelija fil-Quddiesa f’Dar Santa Marta, 16 ta’ Mejju 2013
Il-Gwaj ta’ San Pawl
Bix-xhieda tiegħu għall-verità n-nisrani jrid “jagħti fastidju” lill-“istrutturi komdi tagħna”, ukoll jekk dan ikun ifisser li jsib ruħu “fil-gwaj”, u jagħmel dan għax ikun imħeġġeġ minn “ġenn spiritwali b’saħħtu” għall-“periferiji eżistenzjali” kollha.
Fuq l-eżempju ta’ San Pawl, li għadda “minn battalja ħarxa għall-oħra”, min jemmen m’għandux ifittex il-kenn “f’ħajja trankwilla” jew fil-kompromessi. Illum, fil-Knisja hemm ħafna “insara tas-salott, dawk edukati”, “bierda”, li għalihom dejjem “kollox sew”, imma li m’għandhom ebda ħeġġa appostolika fir-ruħ tagħhom. Fil-Quddiesa ċelebrata llum, il-Ħamis 16 ta’ Mejju fil-Kappella tad-Domus Santa Marta, il-Papa Franġisku appella b’mod qawwi għall-missjoni mhux biss f’artijiet imbiegħda imma wkoll fl-ibliet tagħna.
Ir-riflessjoni tiegħu bdiet mis-silta tal-Atti tal-Appostli (22, 30; 23, 6-11) li fiha naraw lil San Pawl bħala l-protagonista f’waħda mill-battalji ħarxa tiegħu. Imma l-Papa qal li din id-darba l-battalja “bdieha hu, bil-furbizja tiegħu. Meta nduna bil-firda bejn dawk li kienu akkużawh”, bejn is-Sadduċej u l-Fariżej, hu ra kif għamel biex bdew joħduha “kontra xulxin. Matul ħajtu San Pawl għadda minn battalja ħarxa għall-oħra, minn persekuzzjoni għall-oħra. Għadda minn ħafna provi; il-Mulej kien qal li dan kellu jkun id-destin tiegħu”, destin “b’tant slaleb; imma hu baqa’ miexi ‘l quddiem; kien iħares lejn il-Mulej u jibqa’ miexi ‘l quddiem”.
Il-Papa fisser li: “Pawlu kien jagħti fastidju; kien raġel li bil-priedki tiegħu, bil-ħidma tiegħu, bl-imġiba tiegħu kien jagħti fastidju, propju għax ħabbar lil Ġesù Kristu. Ħafna drabi t-tħabbira ta’ Ġesù Kristu tagħti fastidju lill-istrutturi komdi tagħna, anki dawk insara. U l-Mulej irid li aħna nibqgħu dejjem mexjin aktar ‘l quddiem, li naqdfu ‘l quddiem”. Irid li “aħna ma nfittxux il-kenn f’ħajja trankwilla jew fi strutturi li malajr jgħaddu”. Pawlu kien jagħti fastidju għax kien jippriedka lil Ġesù. Imma kien jibqa’ miexi ‘l quddiem, għax kellu fih dak l-attaġġament nisrani li hu ż-żelu appostoliku. Kellu fih il-fervur appostoliku. Le, ma kienx raġel ta’ kompromessi, imma tal-verita u kien jibqa’ miexi ‘l quddiem! Kien iħabbar lil Kristu u jibqa’ miexi ‘l quddiem. U dan ma kienx jagħmlu biss minħabba t-temperament tiegħu: hu kien bniedem mimli nar”.
Imbagħad il-Papa reġa’ mar lura lejn l-Atti tal-Appostli u wera kif “anki il-Mulej daħal” fil-ġrajja ta’ Pawlu, “propju għax fil-lejl ta’ wara din il-battalja ħarxa, il-Mulej deher lil Pawlu u qallu: “Agħmel il-qalb!” U Pawlu baqa’ miexi aktar ‘l quddiem. Il-Mulej qanqlu biex jibqa’ miexi ‘l quddiem billi qallu: “Kif tajt xhieda għalija f’Ġerusalemm, hekk ukoll jeħtieġ li tagħti xhieda f’Ruma”. U l-Papa kompla jżid: “(..)Jogħġbuni dawn il-kliem li juru li l-Mulej ħa ħsieb din id-djoċesi tagħna sa mill-ewwel żmenijiet: aħna privileġġati!”.
«Mela ż-żelu appostoliku” – ippreċiża l-Papa – “ mhuwiex entużjażmu biex ikollok il-poter, biex ikollok xi ħaġa, imma jiġi minn ġewwa; huwa dak li l-Mulej stess irid minna: insara b’żelu appostoliku. U mnejn jiġi dan iż-żelu appostoliku? Ikollna dan iż-żelu għax insiru nafu lil Ġesù Kristu. Pawlu sab lil Ġesù; iltaqa’ miegħu, mhux b’għarfien intellettwali u xentifiku – dan importanti li nkunu nafuh għax jgħinna - imma għarfu bil-qalb tiegħu, billi ltaqa’ miegħu b’mod personali. Nagħraf lil Ġesu li salvani u li miet għalija: dan kien l-għarfien profond ta’ Pawlu, li mbuttah biex jibqa’ miexi ‘l quddiem u jħabbar lil Ġesu.”
U għal Pawlu “kienet tispiċċa ħaġa u tibda oħra. Dejjem kien isib ruħu fil-gwaj, mhux għall-gwaj fih innifsu, imma għal Ġesu. It-tħabbira ta’ Ġesu ġġib magħha dawn il-konsegwenzi. Għax għaraf lil Ġesù, Pawlu sar bniedem mimli ħeġġa appostolika. Kien ikun f’dik il-Knisja, jaħseb fl-oħra, jerġa’ jmur lejn waħda, imbagħad imur fl-oħra. U din hija grazzja. Il- fervur appostoliku, iż-żelu appostoliku hu l-attaġġament tan-nisrani”. Imbagħad Papa Franġisku rrefera għall-Eżerċizzi Spiritwali ta’ Sant Injazju ta’ Loyola u ssuġġerixxa din il-mistoqsija: “Jekk Kristu għamel dan għalija, x’jeħtieġ li nagħmel jien għalih?” U wieġeb: “Il-ħeġġa appostolika, iż-żelu appostoliku tista’ tifhmu biss fejn hemm atmosfera ta’ mħabba: mingħajr l-imħabba ma tifhmux għax iż-żelu appostoliku għand fih xi ħaġa tal-ġenn, ġenn spiritwali, imma ġenn b’saħħtu. U Pawlu kellu dan il-ġenn b’saħħtu”.
Il-Papa kompla jgħid «Huwa l-Ispirtu s-Santu li jikkustodixxi dan iż-żelu appostoliku, huwa l-Ispirtu s-Santu li jkabbru. Hu jimla r-ruħ b’dak in-nar li jwassalna biex inkomplu nħabbru lil Ġesù Kristu. Jeħtieġ nitolbuhielu l-grazzja taż-żelu appostoliku”. U dan jgħodd “ mhux biss għall-missjunarji, li tant huma bravi. F’dawn il-ġranet ltqajt ma’ xi wħud li qaluli: ‘Ili sittin sena fl-Amazzonja!’ Sittin sena u baqgħu mexjin ‘l quddiem! Illum fil-Knisja hemm ħafna minn dawn li huma mimlija żelu: hemm ħafna rġiel u nisa li għandhom dan il-fervur u jibqgħu mexjin ‘l quddiem. Imma fil-Knisja hemm ukoll oħrajn bierda; għandhom ċertu bruda; huma tajbin imma ma ma jħossux li għandhom jibqgħu mexjin ‘l quddiem. Hemm ukoll dawk l-insara tas-salott; dawk edukati, li għalihom kollox sew, imma ma jafux ikunu wlied il-Knisja u jwasslu l-bxara t-tajba u jkollhom il-ħeġġa appostolika”.
Għalhekk il-Papa talab lill-Ispirtu s-Santu “ biex jagħti din il-ħeġġa appostolika lilna lkoll; biex jagħtina l-grazzja li nagħtu fastidju lill-affarijiet li huma trankwilli wisq fil-Knisja; il-grazzja li nersqu lejn il-periferiji eżistenzjali. Il-Knisja għandha bżonn kbir ta’ dan! Mhux biss f’artijiet imbiegħda, fil-Knejjes li ma tantx ilhom li twaqqfu, fil-popli li għadhom ma jafux lil Ġesù Kristu. Imma hemm bżonn tat-tħabbira ta’ Kristu hawnhekk fil-belt tagħna. Għalhekk nitolbu lill-Ispirtu s-Santu din il-grazzja taż-żelu appostoliku: li nkunu nsara b’żelu appostoliku. U jekk nagħtu fastidju, ikun imbierek il-Mulej. Nimxu ‘l quddiem u kif qal lil Pawlu: “Nagħmlu il-qalb!”
Fost dawk li kkonċelebraw mal-Papa kien hemm il-Kardinal Peter Kodwo Appiah Turkson u l-Isqof Mario Toso, li huma l-president u s-segretarju tal-Kunsill Pontifiċju għall-Ġustizzja u l-Paċi, Monsinjur Luigi Mistò, segretarju tal-Amministrazzjoni għall-Patrimonju tas-Sede Appostolika (Apsa), u l-ġiżwita Hugo Guillermo Ortiz, li hu responsabbli tal-programmi bil-lingwa Spanjola fir-Radjuo Vatikana. Fost dawk preżenti kien hemm l-istaff fid-dikasteru Ġustizzja u Paċi u grupp ta’ impjegati max-xandir tal-Vatikan.
Miġjub għall-Malti mit-Taljan minn Vivienne Attard.
|