Eminenza, Għażiż ħija fl-Episkopat, Għeżież ħuti sorijiet!
Kuntent li llum qed niltaqa’ magħkom u nixtieq insellem lil kull waħda minnkom u nirringrazzjakom għal dak kollu li qed tagħmlu biex il-ħajja konsagrata tkun dejjem aktar ta’ dawl fil-mixja tal-Knisja. Għeżież ħuti, nixtieq l-ewwelnett nirringrazzja lill-għażiż Ħija, il-Kardinal João Braz de Aviz, għall-kliem li qalli. Qed nieħu gost nara li hawn ukoll is-Segretarjat tal-Kongrezzjoni. “Is-servizz tal-awtorità skont l-Evanġelju”, is-suġġett li għażiltu għal-laqgħa tagħkom , hu importanti ferm għall-ħidma fdata f’idejkom. U fid-dawl ta’ dan il-kliem nixtieq nipproponilkom tliet ħsibijiet sempliċi, biex intom tkunu tistgħu tidħlu aktar fil-fond dwarhom kemm personalment, kif ukoll bħala komunità. 1.Fl-Aħħar Ikla li għamel mal-Appostli, Ġesù qalilhom: “Mhux intom għażiltu lili, imma jien għażilt lilkom” (Ġw 15,16), u dan ifakkar lil kulħadd, u mhux biss lilna s-saċerdoti, li l-vokazzjoni hi dejjem inizjattiva t’Alla. Huwa Kristu li sejħilkom biex timxu warajh fil-ħajja konsagrata, u dan ifisser li tridu twettqu “eżodu” kontinwu minnkom infuskom biex tiċċentraw il-ħajja tagħkom fuq Kristu u l-Evanġelju tiegħu, fuq ir-rieda t’Alla, u tneżżgħu lilkom infuskom mill-pjanijiet tagħkom ħalli flimkien ma’ San Pawl tgħidu: “Ngħix, imma mhux jien, iżda jgħix fija Kristu” ( Gal 2, 20). Dan “l-eżodu” minna nfusna jfisser mixja ta’ adorazzjoni u qadi; eżodu li jwassalna biex naduraw lill-Mulej u biex naqduh f’ħutna l-bnedmin. Naduraw u naqdu: żewġ attaġġamenti li ma nistgħux nifirduhom minn xuxlin, imma li jeħtieġ jimxu dejjem flimkien. Naduraw lill-Mulej u naqdu lill-oħrajn billi ma nżommu xejn għalina nfusna: għal min jeżerċita l-awtorità, dan hu li jfisser “titneżża’ minnek innifsek”. Għixu u ftakru dejjem fiċ-ċentralità ta’ Kristu u fl-identità evanġelika tal-ħajja konsagrata. Għinu lill-komunitajiet tagħkom jgħixu “l-eżodu” minnhom infushom f’mixja ta’ adorazzjoni u qadi, l-ewwelnett permezz tat-tliet kunsilli evanġeliċi. Ħarsu lejn l-ubbidjenza bħala smigħ tar-rieda t’Alla, imqanqla fina mill-Ispirtu s-Santu u awtentikata mill-Knisja, filwaqt li taċċettaw li din tasal anki permezz tal-medjazzjonijiet umani. Ftakru li r-rabta awtorità-ubbidjenza għandha postha fil-kuntest aktar wiesa’ tal-misteru tal-Knisja u fit-twettiq partikulari tal-funzjoni tagħha ta’ medjatriċi (ara Kongregazzjoni għall-Istituti tal-Ħajja Konsagrata u s-Soċjetajiet ta’ Ħajja Appostolika, is-servizz tal-awtorità u tal-ubbidjenza, 12). Ħarsu lejn il-faqar bħala superament ta’ kull xorta ta’ egoiżmu skont il-loġika tal-Vanġelu li jgħallimna biex nafdaw fil-Providenza t’Alla. Il-faqar juri lill-Knisja kollha, li m’aħniex aħna li nibnu s-Saltna t’Alla, mhumiex il-mezzi umani li jkabbruha, imma hi primarjament il-qawwa t’Alla, il-grazzja tiegħu li taħdem permezz tad-dgħufija tagħna. “Biżżejjed għalik il-grazzja tiegħi; għax il-qawwa tiegħi tidher fl-aqwa tagħha fejn hemm id-dgħajjef”, jisħaq l-Appostlu tal-ġnus ( 2 Kor 12,9). Ngħixu l-faqar li jgħallem is-solidarjetà, il-kondiviżjoni u l-karità, u li jesprimi ruħu wkoll f’sobrjetà u f’ferħ għal dak li hu essenzjali. Dan ħarsina minn dawk l-idoli materjali li jdallmu s-sens awtentiku tal-ħajja. Il-faqar nitgħallmuh mill-umli, mill-foqra, mill-morda u minn dawk kollha li jinsabu fil-periferiji eżistenzjali tal-ħajja. Il-faqar teoriku ma jgħoddx għalina. Nitgħallmu l-faqar meta nmissu l-ġisem ta’ Kristu fqir, fl-umli, fil-foqra, fil-morda, fit-tfal. Imbagħad hemm is-safa, kariżma prezzjuża li tagħmilna aktar ħielsa biex nagħtu lilna nfusna lil Alla u lill-oħrajn u biex inkunu qrib tagħhom b’qalb tenera u ħanina bħal dik ta’ Kristu. Il-kastità mgħixa għas-Saltna t’Alla turi li l-affettività għandha postha fil-libertà matura u ssir sinjal għad-dinja tal-ġejjieni fejn jiddi l-fatt li Alla dejjem għandu l-ewwel post. Imma, jekk jogħġobkom, għixu kastità “fekonda” li tiġġenera wlied spiritwali fil-Knisja. Il-persuna konsagrata hi omm, għandha tkun omm u mhux “mara li baqgħet ma żżewġitx”! Skużawni jekk qed nitkellem b’dan il-mod, imma din il-maternità u fekondità tal-ħajja konsagrata hi importanti! Dan il-ferħ tal-fekondità spiritwali jagħti ħajja lill-eżistenza tagħkom. Intom ommijiet fuq ix-xbieha ta’ Maria Omm u tal-Knisja Omm. Ma tistax tifhem lil Maria mingħajr il-maternità tagħha, ma tistax tifhem il-Knisja mingħajr il-maternità tagħha, u intom ikona ta’ Maria u tal-Knisja 2. It-tieni element li nixtieq nisħaq fuqu fl-eżerċizzju tal-awtorità huwa l-qadi: m’għandna qatt ninsew li l-veru poter, ikun f’liema livell ikun, huwa l-qadi, li l-quċċata mdawla tiegħu tinsab fuq is-Salib. Benedittu XVI, bl-għerf kbir tiegħu, ħafna drabi fakkar lill-Knisja li jekk għall-bniedem l-awtorità spiss tfisser li jaħkem, li jiddomina, li jkollu suċċess, għal Alla, awtorità tfisser qadi, umiltà, imħabba. Tfisser li wieħed jidħol fil-loġika ta’ Ġesu li tbaxxa biex jaħsel riġlejn l-Appostli ( ara Anġelus, 29 ta’ Jannar 2012) u li jgħid lid-dixxipli tiegħu: “ Tafu intom, fost il-pagani l-kapijiet qegħdin biex jikkmandaw u l-kbarat biex iħaddmu s-setgħa tagħhom. Fostkom m’għandux ikun hekk; imma min irid ikun il-kbir fostkom,għandu jkun il-qaddej tagħkom u min irid ikun l-ewwel fostkom għandu jkun l-ilsir tagħkom” ( Mt 20, 25 -27). Aħsbu ftit fil-ħsara li ssir lill-Poplu t’Alla minn dawk l-irġiel u n-nisa tal-Knisja li jimmiraw lejn il-karriera, li jridu jilħqu, li “jużaw” il-poplu, il-Knisja, lil ħuthom – lil dawk li suppost għandhom jaqdu – biex jiksbu l-interessi u l-ambizzjonijiet personali tagħhom. Dawn jagħmlu ħsara kbira lill-Knisja. Araw li waqt li teżerċitaw l-awtorità, tkunu qed takkumpanjaw, tifhmu, tgħinu, u tħobbu, li tħaddnu lil kuħadd, speċjalment lil dawk li jħossuhom waħidhom, imwarrba, li qed iħossu vojt fil-ħajja tagħhom, lil dawk li ma tantx għandhom min jurihom imħabba fil-ħajja tagħhom. Ejjew inżommu l-ħarsa tagħna fuq is-Salib: hemm hu l-post ta’ kull awtorità fil-Knisja, għax hemm il-Mulej għamel lilu nnifsu l-qaddej billi ta lilu nnifsu għalina b’mod sħiħ.
3. U fl-aħħar hemm l-ekkleżjalità bħala waħda mid-dimensjonijiet kostituttivi tal-ħajja konsagrata, dimensjoni li hemm bżonn nagħrfuha u nidħlu fil-fond tagħha kontinwament. Il-vokazzjoni tagħkom hi kariżma fundamentali fil-mixja tal-Knisja, u ma jistax ikun li persuna konsagrata ma “tħossx” mal-Knisja. Irridu “nħossu” mal-Knisja, li ġġeneratna fil-Magħmudija, irridu “nħossu” mal-Knisja li ssib espressjoni filjali tagħha fil-fedeltà lejn il-Maġisteru, fil-komunjoni mar-Rgħajja u s-Suċċessur ta’ Pietru, Isqof ta’ Ruma, sinjal viżibbli tal-għaqda fil-Knisja. Għan-nisrani, għal kull nisrani, it-tħabbira u x-xhieda tal-Evanġelju qatt m’ huma att iżolat. Din hi xi ħaġa importanti; it-tħabbira u x-xhieda tal-Evanġelju qatt m’ huma att iżolat jew ta’ grupp. Kif ifakkarna tant tajjeb il-Papa Pawlu VI, kull evanġelizzatur qatt ma jaġixxi “bil-qawwa ta’ ispirazzjoni personali, imma f’għaqda mal-missjoni tal-Knisja u f’isimha” ( Ezort. Ap. Evangelii nuntiandi, 80). Pawlu VI jkompli jgħid: hi dikotomija assurda li wieħed jaħseb li jgħix ma’ Ġesu mingħajr il-Knisja, li jimxi wara Ġesu barra mill-Knisja, li jħobb lil Ġesù mingħajr ma jħobb il-Knisja (arar ibid., 16). Ħossuha r-responsabbiltà li tieħdu ħsieb il-formazzjoni tal-Istituti tagħkom skont id-duttrina sana tal-Knisja, fl-imħabba tal-Knisja u fl-ispirtu ekkleżjali.
Mela, it-tliet indikazzjonijiet li nixtieq inħallilkom huma dawn: iċ-ċentralità ta’ Kristu u l-Evanġelju tiegħu, l-awtorità bħala servizz ta’ mħabba, u li “tħossu” mal-Knisja u fil-Knisja. U għal darb’oħra ma’ dawn inżid il-gratitudni tiegħi għall-ħidma tagħkom, li mhux dejjem tkun faċli. Mingħajrkom xi tkun il-Knisja? Tkun nieqsa mill-maternità, mill-imħabba, mit-tenerezza, mill-intuwizzjoni ta’ omm! Għeżiez ħuti, kunu żguri li jiena nsegwikom bl-imħabba tiegħi. Nitlob għalikom, imma anki intom itolbu għalija. Sellu għall-komunitajiet tagħkom, speċjalment għas-sorijiet morda u għaż-żgħażagħ. Inħeġġiġkom ilkoll biex tagħmlu kuraġġ u timxu wara l-Evanġelju ta’ Kristu b’parresia u b’ferħ. Kunu ferħana għax hi ħaġa sabiħa li timxi wara Ġesu, hi ħaġa sabiħa li ssir ikona ħajja tal-Madonna u ta’ Ommna l-Knisja Mqaddsa fil-ġerarkija tagħha. Grazzi.
Miġjub għall-Malti mit-Taljan minn Vivienne Attard.
|